雅歌 第 8 章

1

(THR) Khó͘ bōe tit-tio̍h lí chòe góa ê hiaⁿ-tī, Bat suh góa lāu-bú ê ni ê; Chiū góa nā tī gōa-bīn tú-tio̍h lí, chiū kap lí chim-chhùi, Iā bô lâng ōe khòaⁿ-khin góa.

(BCL) 苦得著你做我的兄弟，曾吸我老母的奶的；就我若佇外面抵著你就及你唚嘴，也無人會看輕我。

2

(THR) Góa beh ín-chhōa lí, chhōa lí jı̍p góa lāu-bú ê ke, I beh kà-sī góa; Góa beh hō͘ lí lim tiau-hô ê chiú, kap sia̍h-liû ê chiap.

(BCL) 我欲引導你，導你入我老母的家；伊欲教示我，我欲互你飲調和的酒及石榴的汁。

3

(THR) I ê tò-chhiú ōe phô͘ góa ê thâu-khak, I ê chiàⁿ-chhiú beh phō góa.

(BCL) 伊的倒手會扶我的頭殼；伊的正手欲抱我。

4

(THR) Iâ-lō͘-sat-léng ê chèng cha-bó͘-gín-ná ah, Góa chhiat-chhiat hoan-hù lín, Bo̍h-tit phah-chhíⁿ i, bo̍h-tit kiáu-jiáu góa só͘-thiàⁿ-ê, Thèng-hāu i ka-kī chêng-gōan.

(BCL) 耶路撒冷的眾查某囝仔啊，我切切吩咐恁：莫得拍醒伊、莫得攪擾我所疼者，聽候伊家己情願。

5

(THR) Hit-ê khò tī i só͘ lôan-ài-ê, tùi khòng-iá chiūⁿ-lâi-ê, Che sī chī-chūi? Góa tī pîn-kó chhiū-ē kiò-chhíⁿ lí, Lí ê lāu-bú tī-hia keng-kè thòng-khó͘, Tī-hia keng-kè thòng-khó͘ siⁿ lí.

(BCL) 彼個靠佇伊所戀愛的對曠野上來的這是是誰？我佇蘋果樹下叫醒你。你的老母佇遐經過痛苦；佇遐經過痛苦生你。

6

(THR) Kiû lí chiong góa hē tī lí ê sim, chhin-chhiūⁿ ìn, hē tī lí ê chhiú-kut chhin-chhiūⁿ ìn; In-ūi ài-chêng ū tōa-la̍t chhin-chhiūⁿ sí, Tò͘-khī chân-jím chhin-chhiūⁿ im-hú; Só͘ hoat-chhut ê jia̍t-iām chhin-chhiūⁿ hé-iām; Sī ke̍k béng-lia̍t ê iām-hé.

(BCL) 求你將我下佇你的心親像印，下佇你的手骨親像印。因為愛情有大力親像死，妒忌殘忍親像陰府；所發出的熱炎親像火焰，是極猛烈的炎火。

7

(THR) Chōe-chōe chúi bōe-ōe bia̍t ài-chêng, Tōa-chúi iā bōe-ōe im-ba̍t i; Nā ū lâng beh ēng ke-lāi chôan-gia̍p ōaⁿ ài-chêng, Tek-khak hō͘ lâng biáu-sī.

(BCL) 多多水會滅愛情，大水也會淹密伊。若有人欲用家內全業換愛情，的確互人藐視。

8

(THR) Góan ū chı̍t ê sòe-hàn sió-bē, iáu-bē tióng-sêng, Lâng lâi kóng chhin-chiâⁿ ê jı̍t, Góan tio̍h kā góan ê sió-bē cháiⁿ-iūⁿ siat-hoat?

(BCL) 阮有一個細漢小妹；猶未長成，人來講親成的日，阮著給阮的小妹怎樣設法？

9

(THR) I nā sī chhiûⁿ, góan beh tī i ê téng-bīn khí gûn-thah, I nā sī mn̂g, góan beh ēng pek-hiuⁿ-chhâ pán ûi i.

(BCL) 伊若是牆，阮欲佇伊的頂面起銀塔；伊若是門，阮欲用柏香柴板圍伊。

10

(THR) Góa sī chhiûⁿ, góa ê lin chhin-chhiūⁿ lâu-koh; Hit-sî góa tī i ê ba̍k-chiu-tiong chhin-chhiūⁿ tit-tio̍h pêng-an ê lâng.

(BCL) 我是牆；我的奶親像樓閣。彼時，我佇伊的目睭中親像得著平安的人。

11

(THR) Só͘-lô-bûn tī Pa-le̍k-hap-bûn ū chı̍t khu phû-tô-hn̂g; I chiong chit ê phû-tô-hn̂g cho͘-hō͘ kò͘-siú ê lâng; In ta̍k-lâng ūi-tio̍h in ê ké-chí tio̍h la̍p chı̍t-chheng gûn.

(BCL) 所羅門佇巴力哈們有一區葡萄園；伊將此個葡萄園租互顧守的人，逐人為著的果子著納一千銀。

12

(THR) Góa ê phû-tô-hn̂g, góa ka-kī-ê, sī tī góa ê bīn-chêng; Só͘-lô-bûn ah, hit chı̍t-chheng kui hō͘ lí, Nn̄g-pah kui hō͘ kò͘-siú ké-chí ê lâng.

(BCL) 我的葡萄園我家己的是佇我的面前。所羅門啊，彼一千歸互你，二百歸互顧守果子的人。

13

(THR) Lí tiàm tī hn̂g-tiong ê, tâng-phōaⁿ lóng ài thiaⁿ lí ê siaⁿ, Kiû lí hō͘ góa iā tit-tio̍h thiaⁿ-kìⁿ.

(BCL) 你踮佇園中的，同伴攏愛聽你的聲，求你互我也得著聽見。

14

(THR) Góa só͘ lôan-ài-ê ah, lí tio̍h kín-kín lâi, Chhin-chhiūⁿ lêng-iông á-sī lo̍k-á tī phang-chháu ê soaⁿ.

(BCL) 我所戀愛者啊，你著緊緊來！親像羚羊抑是鹿仔佇芳草的山。

Bible Color Mark

• 台語漢字羅馬本
• 巴克禮全羅