提多書 第 2 章

1

(THR) Hiah ê ha̍p tī toan-chiàⁿ ê kà-sī ê, lí tio̍h kóng i,

(BCL) 許個合佇端正的教示的，你著講伊。

2

(THR) chiū-sī lāu lâng m̄ thang ài chia̍h chiú, tio̍h toan-chong, siú-kí, koh tī sìn, tī jîn-ài, tī thun-lún, bô m̄ sûn-chôan.

(BCL) 就是老人呣通愛食酒、著端莊、守己，閣佇信、佇仁愛、佇吞，無呣純全。

3

(THR) Lāu hū-jîn-lâng iā tio̍h án-ni, hêng-tōng kú-chí tio̍h ha̍p tī kèng-khiân, bo̍h-tit húi-pòng, iā bo̍h-tit chòe chiú ê lô͘-châi, tio̍h ēng hó kà-sī lâng;

(BCL) 老婦仁人也著按呢，行動舉止著合佇敬虔，莫得誹謗，也莫得做酒的奴才，著用好教示人，

4

(THR) chiah thang kàu-tok siàu-liân ê hū-jîn-lâng thiàⁿ in ê tiōng-hu, thiàⁿ in ê kiáⁿ-jî,

(BCL) 才通教督少年的婦仁人，疼的丈夫，疼的子兒，

5

(THR) siú-kí, cheng-kiat, liāu-lí ke sū, siān-liông, sūn-ho̍k ka-kī ê tiōng-hu, bián-tit Siōng-tè ê tō-lí siū-tio̍h pòng-to̍k.

(BCL) 守己，貞潔，料理家事，善良，順服家己的丈夫，免得上帝的道理受著謗瀆。

6

(THR) Siàu-liân ê ta-po͘-lâng, lí iā tio̍h án-ni khǹg in siú-kí.

(BCL) 少年的查甫人，你也著按呢勸守己。

7

(THR) Lí hōan sū tio̍h ka-kī chòe hó só͘ kiâⁿ ê bô͘-iūⁿ;

(BCL) 你凡事著家己做好所行的模樣；

8

(THR) tī kà-sī tio̍h toan-chong bô siâ, giân-gú toan-chiàⁿ, bô thang hiâm, hō͘ tùi-te̍k ka-kī kiàn-siàu, bô teh thang kóng lán ê pháiⁿ.

(BCL) 佇教示著端莊、無邪，言語端正，無通嫌，互對敵家己見誚，無地通講咱的歹。

9

(THR) Khǹg lô͘-po̍k tio̍h sūn-ho̍k in ê chú-lâng, hōan sū hō͘ in hoaⁿ-hí, bô tú-tak,

(BCL) 勸奴僕著順服的主人，凡事互歡喜，

10

(THR) bô thau-the̍h, ta̍k hāng tio̍h hián-bêng tiong-sìn, hō͘ in hōan sū êng-kng lán ê Kiù-chú Siōng-tè ê kàu.

(BCL) 無抵觸，無偷提，逐項著顯明忠信，互凡事榮光咱的救主上帝的教。

11

(THR) In-ūi Siōng-tè kiù chèng lâng ê un í-keng hián-bêng,

(BCL) 因為上帝救眾人的恩已經顯明，

12

(THR) kéng-kài lán tio̍h khì-sak put-khiân kap chit sè-kan ê su-io̍k, ēng siú-kí, kong-gī, kèng-khiân lâi kè-jı̍t tī chit sè-tāi;

(BCL) 警戒咱著棄拺不虔及此世間的私慾，用守己、公義、敬虔來過日佇此世代，

13

(THR) him-bō͘ hit ê tōa hok-khì ê ǹg-bāng, kap lán chì tōa ê Siōng-tè kap Kiù-chú Iâ-so͘ Ki-tok êng-kng ê hián-hiān.

(BCL) 欣慕彼個大福氣的向望，及咱至大的上帝及救主耶穌基督榮光的顯現。

14

(THR) I ūi-tio̍h lán hiàn ka-kī, beh sio̍k lán thoat-lī it-chhè ê put-hoat; koh ūi-tio̍h pún-sin sóe-chheng lán chòe I ka-kī ê peh-sìⁿ, chiū-sī jia̍t-sim tī chiah ê hó só͘ kiâⁿ ê.

(BCL) 伊為著咱獻家己，欲贖咱脫離一切的不法，閣為著本身洗清咱，做伊家己的百姓，就是熱心佇諸個好所行的。

15

(THR) Chiah ê sū lí tio̍h kóng, tio̍h khó͘-khǹg, ēng lóng-chóng ê kôan lâi chek-pī lâng. M̄ thang hō͘ lâng biáu-sī lí.

(BCL) 諸個事你著講，著苦勸，用攏總的權來責備人；呣通互人藐視你。

Bible Color Mark

• 台語漢字羅馬本
• 巴克禮全羅