Chhòng-sè-kì 第 6 章 - 巴克禮全羅

1

Lâng tī tōe-chiūⁿ ná khah-chōe, iā siⁿ cha-bó͘-kiáⁿ ê sî,

2

Siōng-tè ê kiáⁿ khòaⁿ-kìⁿ lâng ê cha-bó͘-kiáⁿ súi, chiū chiàu in só͘ ài, chhōa in chòe bó͘.

3

Iâ-hô-hoa kóng, Lâng kì-jiân sio̍k tī jio̍k-thé, Góa ê Sîn bô beh éng-óan tiàm tī in; nā-sī in ê jı̍t-chí beh kàu chı̍t-pah jī-cha̍p nî.

4

Tī hit-sî ū tōa-hàn lâng tī tōe-bīn-chiūⁿ; āu-lâi Siōng-tè ê kiáⁿ kap lâng ê cha-bó͘-kiáⁿ tâng-pâng, in chiū siⁿ kiáⁿ, chiū-sī tùi kó͘-chá eng-hiông ū miâ-siaⁿ ê lâng.

5

Iâ-hô-hoa khòaⁿ-kìⁿ lâng tī tōe-chiūⁿ, chōe-ok chin tōa, sim-lāi só͘ siūⁿ ê liām-thâu ta̍k-jı̍t lóng sī pháiⁿ.

6

Iâ-hô-hoa thè-hóe I chō lâng tī sè-kan; sim-lāi iu-būn.

7

Iâ-hô-hoa kóng, Góa beh tùi tōe-chiūⁿ châu-bia̍t Góa só͘ chhòng-chō ê lâng; chiong lâng kap cháu-siù, thâng-thōa, pe-chiáu, lóng châu-bia̍t; in-ūi Góa chō in liáu ū thè-hóe.

8

Chí-ū Ná-a tit-tio̍h un-tián tī Iâ-hô-hoa ê bīn-chêng.

9

Ná-a ê sè-hē kì tī ē-tóe. Ná-a sī gī-lâng; tī hit sè-tāi ê tiong-kan sī ôan-chôan ê lâng; Ná-a kap Siōng-tè saⁿ-kap kiâⁿ.

10

Ná-a siⁿ saⁿ ê kiáⁿ, chiū-sī Siám, Hâm, Ngá-hut.

11

Sè-kài pāi-hōai tī Siōng-tè ê bīn-chêng; sè-kài chhiong-móa kiông-pō.

12

Siōng-tè khòaⁿ sè-kài lóng pāi-hōai; in-ūi kìⁿ ū jio̍k-thé-ê in tī sè-kài ê kiâⁿ-chòe lóng sī pāi-hōai.

13

Siōng-tè tùi Ná-a kóng, Kìⁿ ū jio̍k-thé-ê Góa khòaⁿ in ê bo̍at-kî í-keng kàu, in-ūi in ê kiông-pō chhiong-móa tī sè-kài; lí khòaⁿ, Góa beh chiong in kap tōe chòe chı̍t-ē húi-bia̍t.

14

Lí tio̍h ēng chhêng-peh-chhâ chòe tōa-chûn, chûn-lāi tio̍h keh pâng-keng, lāi-gōa ēng le̍k-chhiⁿ-iû kô͘ i.

15

Tōa-chûn ê chō-hoat sī án-ni: tn̂g saⁿ-pah tiú, khoah gō͘-cha̍p tiú, kôaiⁿ saⁿ-cha̍p tiú.

16

Chûn tio̍h chòe thang-á, kôaiⁿ chı̍t tiú; mn̂g tio̍h hē tī chûn-piⁿ; chûn tio̍h chòe saⁿ-chân, hun siōng, tiong, hā.

17

Lí khòaⁿ, Góa, Góa beh hō͘ tōa chúi hòan-lām tī tōe-chiūⁿ, lâi húi-bia̍t thiⁿ-ē kìⁿ-nā ū o̍ah-khì ê jio̍k-thé; kìⁿ-nā tī tōe-chiūⁿ-ê lóng ōe sí.

18

Chóng-sī Góa beh kap lí lı̍p Góa ê iok. Lí kap lí ê kiáⁿ, lí ê bó͘, lí ê sim-pū, lóng tio̍h jı̍p tōa-chûn.

19

Kìⁿ-nā ū o̍ah-khì ê jio̍k-thé, ta̍k-iūⁿ chı̍t-tùi, chı̍t-chiah kang-ê, chı̍t-chiah bú-ê, lí tio̍h tòa in jı̍p tōa-chûn, kap lí saⁿ-kap pó-chôan o̍ah-miā.

20

Pe-chiáu kok chiàu i ê lūi, cheng-siⁿ kok chiàu i ê lūi, tōe-chiūⁿ ê thâng-thōa kok chiàu i ê lūi, ta̍k-iūⁿ chı̍t-tùi beh kàu lí hia lâi pó-chôan in ê o̍ah-miā.

21

Lí tio̍h the̍h ta̍k-iūⁿ ê chia̍h-mı̍h chek-chū-teh, thang chòe lí kap in ê chia̍h-mı̍h.

22

Ná-a chiū án-ni kiâⁿ; chiàu Siōng-tè lóng-chóng só͘ bēng-lēng-ê khì kiâⁿ.