Chhòng-sè-kì 第 7 章 - 巴克禮全羅

1

Iâ-hô-hoa tùi Ná-a kóng, Lí kap lí chôan-ke lóng tio̍h jı̍p tōa-chûn; in-ūi tī chit sè-tāi ê tiong-kan Góa khòaⁿ-kìⁿ lí tī Góa ê bīn-chêng sī gī-lâng.

2

Kìⁿ-nā chheng-khì ê cheng-siⁿ, lí tio̍h tòa chhit-chiah kang-ê, chhit-chiah bú-ê; bô chheng-khì ê cheng-siⁿ, lí tio̍h tòa chı̍t-chiah kang-ê, chı̍t-chiah bú-ê.

3

Thiⁿ-nı̍h ê chiáu iā tio̍h tòa, chhit-chiah kang-ê, chhit-chiah bú-ê, thang lâu in ê chéng o̍ah tī chôan-tōe.

4

In-ūi koh kè chhit-jı̍t, Góa beh lo̍h-hō͘ tī tōe-chiūⁿ, sì-cha̍p jı̍t sì-cha̍p mî; chiong Góa só͘ chō ta̍k-hō ê o̍ah-mı̍h lóng tùi tōe-chiūⁿ châu-bia̍t.

5

Ná-a chiū chiàu Iâ-hô-hoa só͘ bēng-lēng i ê, it-chīn khì kiâⁿ.

6

Tng tōa-chúi hòan-lām tī tōe chiūⁿ ê sî, Ná-a la̍k-pah hè.

7

Ná-a chiū kap i ê kiáⁿ, i ê bó͘, i ê sim-pū, lóng jı̍p tōa-chûn, siám-pī tōa-chúi.

8

Chheng-khì ê cheng-siⁿ, kap bô chheng-khì ê cheng-siⁿ, pe-chiáu, kap tōe-chiūⁿ it-chhè ê thâng-thōa,

9

lóng chı̍t-tùi chı̍t-tùi, ū kang-ê ū bú-ê, kàu Ná-a hia, chìn-jı̍p tōa-chûn, chiàu Siōng-tè bēng-lēng Ná-a ê.

10

Kè hiah ê chhit-jı̍t tōa-chúi hòan-lām tī tōe-chiūⁿ.

11

Tng Ná-a la̍k-pah hè, jī-ge̍h cha̍p-chhit jı̍t, hit-jı̍t chhim-ian ê chúi-gôan lóng lı̍h-khui, thiⁿ iā phòa-khiah.

12

Sì-cha̍p jı̍t sì-cha̍p mî lo̍h-hō͘ tī tōe-bīn-chiūⁿ.

13

Tú-tú hit-jı̍t Ná-a kap i ê kiáⁿ, Siám, Hâm, Ngá-hut, kap Ná-a ê bó͘, kap i saⁿ ê sim-pū, lóng jı̍p tōa-chûn;

14

in kap pah-siù kok chiàu i ê lūi, it-chhè ê cheng-siⁿ kok chiàu i ê lūi, it-chhè sô tī tōe-chiūⁿ ê thâng-thōa kok chiàu i ê lūi, it-chhè ū-sı̍t-ê kok chiàu i ê lūi, it-chhè ê pe-chiáu kok chiàu i ê lūi, lóng-chóng chìn-jı̍p tōa-chûn.

15

Kìⁿ-nā jio̍k-thé lāi-bīn ū o̍ah-khì-ê, lóng chı̍t-tùi chı̍t-tùi, kàu Ná-a hia, jı̍p tōa-chûn.

16

Kìⁿ-nā jı̍p tōa-chûn-ê, sī ū kang ū bú ê jio̍k-thé, chiàu Siōng-tè só͘ bēng-lēng i-ê; Iâ-hô-hoa chiū kā i koaiⁿ-teh.

17

Chúi hòan-lām tī tōe-chiūⁿ sì-cha̍p-jı̍t; chúi tiòng ná kôaiⁿ, hō͘ tōa-chûn chhèng-phû, chûn chiū lī tōe.

18

Chúi-sè chin-tōa, tī tōe-chiūⁿ tı̍t-tı̍t tiòng-khí-lâi; chûn phiau-liû tī chúi-bīn.

19

Chúi-sè tī tōe-chiūⁿ ke̍k-kî tōa; thiⁿ-ē ê kôaiⁿ-soaⁿ lóng hō͘ i im-ba̍t.

20

Chúi-sè pí soaⁿ ke-tiòng kôaiⁿ cha̍p-gō͘ tiú; soaⁿ lóng hō͘ i im-ba̍t.

21

Kìⁿ-nā tī tōe-chiūⁿ ū jio̍k-thé ê tōng-bu̍t, chiū-sī pe-chiáu, cheng-siⁿ, cháu-siù, kap it-chhè sô tī tōe-chiūⁿ ê thâng-thōa, í-kı̍p só͘ ū ê chèng-lâng, lóng sí.

22

Kìⁿ-nā tī ta-tōe ū phīⁿ-khang chhóan-khùi ê seng-lêng lóng sí.

23

Kìⁿ-nā tōe-chiūⁿ it-chhè ê o̍ah-mı̍h lóng châu-bia̍t; lâng kap cheng-siⁿ, thâng-thōa, í-kı̍p thiⁿ-tiong ê pe-chiáu, in lóng tùi tōe-chiūⁿ siū châu-bia̍t; chí-ū Ná-a chham hiah-ê kap i tī chûn-nı̍h-ê lâu-teh.

24

Chúi-sè chin-tōa tī tōe-chiūⁿ, le̍k-kè chı̍t-pah gō͘-cha̍p-jı̍t.