Chhòng-sè-kì 第 8 章 - 巴克禮全羅

1

Siōng-tè kì-tit Ná-a, kap it-chhè ê o̍ah-mı̍h, í-kı̍p kap i tī tōa-chûn it-chhè ê cheng-siⁿ; Siōng-tè hō͘ hong chhe tōe, chúi chiū chiām-chiām siau-sı̍h.

2

Chhim-ian ê chúi-gôan, kap thiⁿ ê khang-khiah, lóng koaiⁿ-ba̍t; thiⁿ-nı̍h ê hō͘ ia̍h soah.

3

Chúi tùi tōe-chiūⁿ tı̍t-tı̍t thè; chı̍t-pah gō͘-cha̍p jı̍t āu, chúi chiū chiām-chiām siau.

4

Chhit-ge̍h cha̍p chhit jı̍t, chûn khòa tī A-la̍h-lia̍p ê soaⁿ.

5

Chúi koh chiām-chiām siau, tı̍t-tı̍t kàu cha̍p-ge̍h. Cha̍p-ge̍h chhoe-it jı̍t, soaⁿ-thâu chiah chhut-hiān.

6

Kè sì-cha̍p jı̍t, Ná-a khui i só͘ chòe tōa-chûn ê thang-á;

7

pàng chı̍t chiah o͘-a chhut-khì; o͘-a pe-lâi pe-khì, tı̍t-tı̍t kàu tōe-chiūⁿ ê chúi ta.

8

I koh pàng chı̍t chiah chíⁿ-á chhut-khì, beh khòaⁿ chúi tùi tōe-chiūⁿ thè á-bē.

9

Chóng-sī chíⁿ-á chhē bô hioh-kha ê só͘-chāi, chiū tò-tńg lâi tōa-chûn Ná-a hia; in-ūi piàn-tōe-bīn iáu ū chúi; Ná-a chhun-chhiú chih i, lia̍h jı̍p tōa-chûn.

10

I koh thèng-hāu chhit-jı̍t, koh pàng chíⁿ-á chhut tōa-chûn.

11

Kàu ê-hng chíⁿ-á tò-lâi i hia, chhùi kā chı̍t-hio̍h sin ê kaⁿ-ná-hio̍h; Ná-a chiah chai chúi tùi tōe-chiūⁿ thè lah.

12

I koh thèng-hāu chhit-jı̍t, pàng chíⁿ-á chhut-khì; chíⁿ-á lóng bô koh tò-lâi.

13

Kàu Ná-a la̍k-pah liân chı̍t hè, chiaⁿ-ge̍h chhoe-it jı̍t, tōe-chiūⁿ ê chúi lóng ta; Ná-a chiū hian-khui tōa-chûn ê kòa, lâi khòaⁿ; chiū khòaⁿ-kìⁿ tōe-bīn í-keng ta.

14

Jī-ge̍h jī-chhit-jı̍t, thô͘-tōe lóng ta.

15

Siōng-tè tùi Ná-a kóng,

16

Lí kap lí ê bó͘, lí ê kiáⁿ, lí ê sim-pū, lóng tio̍h chhut tōa-chûn.

17

Tī lí hia kìⁿ-ū jio̍k-thé ê o̍ah-mı̍h, chiū-sī pe-chiáu, cheng-siⁿ, kap it-chhè sô tī tōe-chiūⁿ ê thâng-thōa, lóng tio̍h tòa in chhut; hō͘ in heng-ōng tī tōe-nı̍h, siⁿ-thòaⁿ chin-chōe.

18

Tùi hit-tia̍p Ná-a kap i ê kiáⁿ, i ê bó͘, i ê sim-pū, lóng chhut-lâi.

19

It-chhè ê cháu-siù, it-chhè ê thâng-thōa, it-chhè ê pe-chiáu, kìⁿ-nā tōe-chiūⁿ só͘ ū ê tōng-bu̍t, kok chiàu i ê cho̍k-lūi, ia̍h lóng chhut tōa-chûn.

20

Ná-a ūi-tio̍h Iâ-hô-hoa khí chı̍t chō tôaⁿ; tùi ta̍k-iūⁿ chheng-khì ê cheng-siⁿ, ta̍k-iūⁿ chheng-khì ê pe-chiáu, chhú lâi hiàn tī tôaⁿ-téng chòe sio-chè.

21

Iâ-hô-hoa phīⁿ i ê phang-bī; Iâ-hô-hoa sim-lāi chiū kóng, Góa bô koh in-ūi lâng ê iân-kò͘ chiù-chó͘ tōe, in-ūi lâng tùi sòe-hàn ê sî, sim só͘ siūⁿ chiū pháiⁿ; Góa bô beh chiàu Góa só͘ ū kiâⁿ-ê, koh bia̍t kok-chéng ê o̍ah-mı̍h.

22

Tōe iáu tī-teh ê sî, chai-chèng siu-sêng, kôaⁿ jo̍ah, tang-thiⁿ, hē-thiⁿ, jı̍t mî, lóng bô hioh.