Chhòng-sè-kì 第 9 章 - 巴克禮全羅

1

Siōng-tè sù-hok Ná-a, kap i ê kiáⁿ, ia̍h tùi in kóng, Lín tio̍h siⁿ-thòaⁿ chōe-chōe, chhiong-móa tōe-chiūⁿ.

2

Kìⁿ-nā tōe-chiūⁿ ê cháu-siù, kap thiⁿ-nı̍h ê chiáu, lóng beh kiaⁿ lín ùi lín; liân tōe-chiūⁿ it-chhè ê thâng-thōa, kap hái-nı̍h it-chhè ê hî, lóng kau-hù lín ê chhiú.

3

Kìⁿ-nā o̍ah ê tōng-bu̍t lóng chòe lín ê chia̍h-mı̍h; chiah-ê it-chhè Góa lóng hō͘ lín, chhin-chhiūⁿ hō͘ lín chhài-soe chı̍t-iūⁿ.

4

To̍k-to̍k ū o̍ah-miā ê bah, chiū-sī ū kâⁿ-huih-ê, lín m̄-thang chia̍h.

5

Lâu lín ê huih, chiū-sī lâu lín o̍ah-miā ê huih ê chōe, Góa beh thó-i; Góa beh tùi kok-iūⁿ cháu-siù thó, ia̍h beh tùi lâng ê chhiú, í-kı̍p ta̍k-lâng hiaⁿ-tī ê chhiú, lâi thó lâng ê o̍ah-miā.

6

Kìⁿ-nā hō͘ lâng lâu huih-ê, lâng iā beh hō͘ i lâu-huih; in-ūi Siōng-tè chō lâng, sī chhin-chhiūⁿ I ka-kī ê siōng.

7

Lín tio̍h siⁿ-thòaⁿ chōe-chōe, tī tōe-bīn-chiūⁿ tio̍h heng-ōng, ke-thiⁿ chin-chōe.

8

Siōng-tè kā Ná-a kap i ê kiáⁿ kóng,

9

Góa, Góa kap lín í-kı̍p lín ê hō͘-è lı̍p Góa ê iok;

10

ia̍h kap hiah ê kap lín tī-teh it-chhè ê o̍ah-mı̍h, chiū-sī kap lín tī-teh ê pe-chiáu, cheng-siⁿ, it-chhè cháu-siù; kìⁿ-nā tùi tōa-chûn chhut-lâi tōe-chiūⁿ it-chhè ê cháu-siù lı̍p-iok.

11

Góa kap lín lı̍p Góa ê iok; kìⁿ ū jio̍k-thé ê, bô koh hō͘ tōa-chúi bia̍t-bô, ia̍h bô koh ū tōa-chúi húi-hōai thó͘-tōe.

12

Siōng-tè kóng, Góa kap lín ia̍h kap hiah-ê kap lín tī-teh ta̍k-iūⁿ ê o̍ah-mı̍h só͘ lı̍p éng sè-tāi ê iok, sī ū kì-hō.

13

Góa chiong Góa ê khēng hē tī hûn-nı̍h, thang chòe Góa kap tōe lı̍p iok ê kì-hō.

14

Í-āu Góa hō͘ hûn khí jia tōe ê sî, beh ū khēng chhut-hiān tī hûn-nı̍h.

15

Góa chiū kì-liām Góa kap lín í-kı̍p ta̍k-iūⁿ ū jio̍k-thé ê o̍ah-mı̍h só͘ lı̍p ê iok, chúi bô koh hòan-lām sún-hōai it-chhè ū jio̍k-thé ê mı̍h.

16

Khēng beh chhut-hiān tī hûn-nı̍h, Góa beh khòaⁿ-i, hō͘ Góa kì-liām Siōng-tè kap tōe-chiūⁿ ta̍k-iūⁿ ū jio̍k-thé ê o̍ah-mı̍h só͘ lı̍p éng-óan ê iok.

17

Siōng-tè tùi Ná-a kóng, Che chiū-sī Góa kap tōe-chiūⁿ it-chhè ū jio̍k-thé ê mı̍h só͘ lı̍p ê iok ê kì-hō.

18

Ná-a ê kiáⁿ, chhut tōa-chûn-ê, chiū-sī Siám, Hâm, Ngá-hut; Hâm sī Ka-lâm ê lāu-pē.

19

Chí saⁿ-ê sī Ná-a ê kiáⁿ; tùi in piàn-móa chôan-tōe.

20

Ná-a khí-chhiú chòe lông-hu, chai-chèng phû-tô-hn̂g;

21

lim hit ê chiú lâi chùi, tī pò͘-pîⁿ-lāi thǹg-pak-theh.

22

Ka-lâm ê lāu-pē, Hâm, khòaⁿ in lāu-pē thǹg-theh, khì gōa-bīn kā in nn̄g ê hiaⁿ-tī kóng.

23

Siám kap Ngá-hut the̍h chı̍t niá saⁿ, khòa tī in ê keng-thâu; tò-thè kiâⁿ lâi jia lāu-pē ê thǹg-theh; in ê bīn ǹg-chhut, bô khòaⁿ-khì lāu-pē ê thǹg-theh.

24

Ná-a chiú-chùi chhíⁿ, chiah chai tē jī-kiáⁿ ê só͘-chòe.

25

Chiū kóng, Ka-lâm tio̍h siū chiù-chó͘; I beh chòe i ê hiaⁿ-tī lô͘-po̍k ê lô͘-po̍k.Koh kóng,

26

Tio̍h o-ló Iâ-hô-hoa, Siám ê Siōng-tè; Ka-lâm chòe Siám ê lô͘-po̍k.

27

Gōan Siōng-tè hō͘ Ngá-hut hoat-tián, Hō͘ i tòa tī Siám ê pò͘-pîⁿ; Ka-lâm ia̍h chòe i ê lô͘-po̍k.

28

Tōa-chúi liáu-āu Ná-a iáu o̍ah saⁿ-pah gō͘-cha̍p nî.

29

Ná-a kè-kiōng hióng-siū káu-pah gō͘-cha̍p hè, chiah sí.