Si-phian 第 12 章 - 巴克禮全羅

1

Tāi-pı̍t ê si, kau hō͘ Ga̍k-koaⁿ; tiāu, ēng tē poeh.1) Iâ-hô-hoa ah, kiû Lí chín-kiù; In-ūi khiân-sêng ê lâng cho̍at--lah; sè-kan-lâng ê tiong-kan, tiong-sìn ê lâng bô--lah.

2

Lâng-lâng kap chhù-piⁿ kóng pe̍h-chha̍t; Ēng thiám-mī ê chhùi-tûn, kap nn̄g-iūⁿ ê sim lâi kóng-ōe.

3

Iâ-hô-hoa beh koah-tn̄g thiám-mī ê chhùi-tûn, Í-kı̍p kóng tōa-ōe ê chı̍h.

4

In bat kóng, Góan beh ēng chı̍h lâi khah-iâⁿ; Góan ê chhùi-tûn sī góan ê; chī-chūi ōe chòe góan ê chú ah?

5

Iâ-hô-hoa kóng, In-ūi khùn-khó͘ ê lâng ê oan-óng, kap sòng-hiong lâng ê thó͘-khùi, Góa taⁿ beh khí--lâi, an-tì i tī i só͘ chhiat-chhiat him-bō͘ ún-tàng ê só͘-chāi.

6

Iâ-hô-hoa ê ōe sī sûn-chôan chheng-khì ê ōe; Chhin-chhiūⁿ gûn tī thô͘ ê lô͘ thòan-liān, Thòan-kè chhit-pái.

7

Iâ-hô-hoa ah, Lí beh pó-hō͘ in, Beh pì-iū in, éng-óan thoat-lī chit sè-tāi ê lâng.

8

Put-tiòng-iōng lâng ko-seng tī sè-kan-lâng ê tiong-kan, Chiū pháiⁿ-lâng ta̍k só͘-chāi teh kiâⁿ-iû.