Si-phian 第 122 章 - 巴克禮全羅

1

Chiūⁿ kiā-á ê si; Tāi-pı̍t só͘ chòe-ê.1) Lâng tùi góa kóng, Lán lâi khì Iâ-hô-hoa ê chhù, Góa chiū hoaⁿ-hí.

2

Iâ-lō͘-sat-léng ah, Góan ê kha khiā tī lí ê mn̂g-lāi.

3

Iâ-lō͘-sat-léng siū khí-chō, Chhin-chhiūⁿ liân-lo̍k chéng-chôe ê siâⁿ.

4

Chiah ê chi-phài, chiū-sī Iâ-hô-hoa ê chi-phài, Chiàu Í-sek-lia̍t tiāⁿ-tio̍h ê lē, Chiūⁿ-khì hia beh o-ló Iâ-hô-hoa ê miâ.

5

In-ūi tī-hia siat-lı̍p sím-phòaⁿ ê pó-chō, Chiū-sī Tāi-pı̍t ke ê pó-chō.

6

Tio̍h thòe Iâ-lō͘-sat-léng kiû pêng-an; Kìⁿ-nā thiàⁿ lí ê lâng tek-khak an-lo̍k.

7

Gōan Lí siâⁿ-lāi pêng-an, Gōan Lí ê kiong-lāi an-lo̍k.

8

In-ūi góa ê hiaⁿ-tī kap tâng-phōaⁿ ê iân-kò͘, Góa beh kóng, Gōan pêng-an tī lí ê lāi-bīn.

9

In-ūi Iâ-hô-hoa lán ê Siōng-tè ê chhù ê iân-kò͘, Góa beh thòe lí kiû hok-khì.