Si-phian 第 64 章 - 巴克禮全羅

1

Tāi-pı̍t ê si, kau hō͘ Ga̍k-koaⁿ.1) Siōng-tè ah, góa ai-siong ê sî, kiû Lí thiaⁿ góa ê siaⁿ; Kiû Lí pó-hō͘ góa ê o̍ah-miā bián kiaⁿ tùi-te̍k.

2

Kiû Lí chiong góa khǹg-ba̍t, hō͘ góa thoat-lī chòe-pháiⁿ ê lâng àm-chīⁿ ê kè-bô͘, Kap kiâⁿ put-gī ê lâng ê jiáu-lōan.

3

In bôa in ê chı̍h chhin-chhiūⁿ to; In pí-chún in ê chìⁿ, chiū-sī ok-to̍k ê ōe.

4

Beh tī àm-chīⁿ ê só͘-chāi siā ôan-chôan ê lâng; In hut-jiân siā-tio̍h i, ia̍h m̄-kiaⁿ.

5

In saⁿ bián-lē siat pháiⁿ kè-bô͘; In chham-siông àm-chīⁿ tiuⁿ lô-bāng; Kóng, Chī-chūi ōe khòaⁿ-kìⁿ in?

6

In tô͘-bô͘ pháiⁿ-tāi, kóng, Góan chīn-la̍t tô͘-bô͘ í-keng ū tú-hó ê kè-bô͘; In ta̍k-lâng ê liām-thâu kap sim-su put-chí chhim.

7

Chóng-sī Siōng-tè beh ēng chìⁿ siā in; In hut-jiân tio̍h-siong.

8

In beh tio̍h-tak, in ê chı̍h ōe hāi in pún-sin; Hōan-nā khòaⁿ-kìⁿ in ê , lóng beh iô-thâu.

9

Chèng-lâng lóng beh kiaⁿ-hiâⁿ, Beh pò-iông Siōng-tè só͘ chòe--ê, Koh siông-sè siūⁿ I ê só͘-kiâⁿ.

10

Gī-lâng beh in-ūi Iâ-hô-hoa lâi hoaⁿ-hí, ia̍h beh óa-khò I; Hōan-nā sim chèng-tı̍t ê lâng, lóng beh khoa-kháu.