Si-phian 第 65 章 - 巴克禮全羅

1

Tāi-pı̍t ê si-koa, kau hō͘ Ga̍k-koaⁿ.1) Siōng-tè ah, tī Sek-an ū lâng o-ló teh thèng-hāu Lí; Ia̍h beh tùi Lí siā só͘ hē ê gōan.

2

Thiaⁿ lâng kî-tó ê Chú ah, Kìⁿ ū hiat-khì-ê lóng beh chiū-kūn Lí.

3

Chōe-ok khah-iâⁿ góa; Lūn-kàu góan ê kè-sit, Lí lóng beh sià-bián.

4

Lí só͘ kéng-sóan, hō͘ i chhin-kūn Lí, Tiàm tī Lí ê īⁿ-lāi--ê, chit-hō lâng ū hok-khì; Góan beh in-ūi Lí ê chhù, Lí ê sèng-tiān ê hok-khì, Lâi sim-móa ì-chiok.

5

Kiù góan ê Siōng-tè ah, Lí beh ēng ui-giâm, péng kong-gī lâi ìn góan; Lí sī tōe-ke̍k kap hái-bīn hn̄g-hn̄g ê lâng, Lóng-chóng só͘ óa-khò--ê.

6

I í-keng ēng tōa kôan-lêng hâ-io; Chiū ēng I ê khùi-la̍t an-tiāⁿ chiah ê soaⁿ.

7

Chiah ê hái hōa-hōa-háu, kap kî-tiong hái-éng hōa-hōa-háu, Í-kı̍p bān peh-sìⁿ ê soan-hoa, I hō͘ in pêng-chēng.

8

Khiā-khí tōe-ke̍k ê lâng in-ūi Lí ê sîn-jiah lâi kiaⁿ-hiâⁿ; Jı̍t-chhut jı̍t-lo̍h ê só͘-chāi, Lí hō͘ in lóng hoaⁿ-hí.

9

Lí kòan-kò͘ thó͘-tōe, lo̍h hō͘ kòan-ak i, hō͘ i chin-pûi; Siōng-tè ê hô, i ê chúi móa-móa; Lí án-ni pī-pān thó͘-tōe, chiū-sī thòe lâng pī-pān gō͘-kak.

10

Lí kòan-ak chhân-hn̂g, móa i ê kau, siu pîⁿ i ê lêng; Lo̍h hó ê hō͘-chúi, hō͘ thó͘-tōe nńg-nńg; Kî-tiong só͘ hoat-siⁿ--ê tit-tio̍h Lí sù-hok.

11

Lí ēng Lí ê un-tián chòe nî-tang ê bián-liû, Lí ê lō͘-kèng lóng ū iû teh tih.

12

Tih tī khòng-iá ê chháu-po͘; Soaⁿ-thâu ēng hoaⁿ-hí chòe-tòa lâi hâ.

13

Chháu-po͘ ēng iûⁿ-kûn chòe saⁿ lâi chhēng; Soaⁿ-kok ēng gō͘-kak chòe moa lâi khàm; In lóng hoaⁿ-hí chhut-siaⁿ, lâi gîm-si.