Si-phian 第 66 章 - 巴克禮全羅

1

Chit phiⁿ si-koa, kau hō͘ Ga̍k-koaⁿ.1) Chôan-tōe lóng tio̍h tùi Siōng-tè lâi chhut hoaⁿ-hí ê siaⁿ;

2

Chhiùⁿ-koa o-ló I ê miâ ê êng-kng; Ēng o-ló ê ōe lâi hián-bêng I ê êng-kng.

3

Tio̍h tùi Siōng-tè kóng, Lí ê só͘-chòe kàu hiah thang kiaⁿ! In-ūi Lí ê tōa kôan-lêng, Lí ê tùi-te̍k beh hâng-ho̍k Lí.

4

Chôan-tōe beh kèng-pài Lí, Gîm-si o-ló Lí; Beh gîm-si o-ló Lí ê miâ. [Sè-la̍h

5

Lín tio̍h lâi, lâi khòaⁿ Siōng-tè só͘-kiâⁿ ê sū, I tùi sè-kan-lâng só͘-chòe--ê, put-chí thang kiaⁿ.

6

I chiong hái piàn-chòe ta-tōe; In pō͘-kiâⁿ kè-hô; Tī-hia góan in-ūi I lâi hoaⁿ-hí.

7

I ēng I ê kôan tī-lí, tı̍t kàu éng-óan; I ê ba̍k-chiu kàm-chhat lia̍t-pang; Pōe-ge̍k ê lâng m̄ thang chū-ko. [Sè-la̍h

8

Bān peh-sìⁿ ah, lín tio̍h o-ló góan ê Siōng-tè; Hō͘ lâng thiaⁿ-kìⁿ o-ló I ê siaⁿ.

9

I hō͘ góan ê sìⁿ-miā o̍ah-teh; Ia̍h bô hō͘ góan ê kha iô-tāng.

10

Siōng-tè ah, Lí bat chhì-giām góan; Thòan-liān góan chhin-chhiūⁿ thòan-liān gûn chı̍t-iūⁿ.

11

Lí hō͘ góan jı̍p lô-bāng; Ēng tāng-tàⁿ hē tī góan ê sin-chiūⁿ.

12

Lí hō͘ lâng chē-chhia, pôaⁿ-kè góan ê thâu-khak; Góan keng-kè chúi-hé. Chóng-sī Lí hō͘ góan kàu pù-ū ê só͘-chāi.

13

Góa beh ēng sio-chè chìn-jı̍p Lí ê chhù; Góa beh tùi Lí siā góa ê gōan,

14

Chiū-sī tī góa hōan-lān ê sî, góa ê chhùi-tûn só͘ kóng--ê, Góa ê chhùi só͘ hē ê gōan.

15

Góa beh ēng pûi ê cheng-siⁿ ê sio-chè, Kap kang-iûⁿ ê phang-bī, hiàn hō͘ Lí; Koh ēng kang ê gû, kang ê soaⁿ-iûⁿ, lâi hiàn. [Sè-la̍h

16

Hōan-nā kèng-ùi Siōng-tè ê lâng, lín lóng tio̍h lâi thiaⁿ; Góa beh kóng-khí I ūi góa só͘ kiâⁿ ê sū.

17

Góa bat ēng góa ê chhùi kiû-kiò I; Ēng góa ê chı̍h o-ló I chòe kôaiⁿ.

18

Góa nā sim-lāi chù-tiōng chōe-ok, Chú tek-khak bô beh thiaⁿ;

19

Chóng-sī Siōng-tè sı̍t-chāi ū thiaⁿ-kìⁿ; Í-keng àⁿ-lo̍h thiaⁿ góa kî-tó ê siaⁿ.

20

Siōng-tè sī eng-kai o-ló--ê, I bē-bat the-sî góa ê kî-tó, ia̍h bē-bat hō͘ I ê chû-ài lī-khui góa.