Si-phian 第 68 章 - 巴克禮全羅

1

Tāi-pı̍t ê si-koa; kau hō͘ Ga̍k-koaⁿ.1) Gōan Siōng-tè khí--lâi, hō͘ I ê tùi-te̍k sì-sòaⁿ; Hō͘ òan-hūn I ê lâng, tùi I ê bīn-chêng tô-cháu.

2

Lí kā in kóaⁿ-sòaⁿ, chhin-chhiūⁿ ian siū chhe-sòaⁿ; Pháiⁿ-lâng kìⁿ-tio̍h Siōng-tè ê bīn chiū siau-bia̍t; Chhin-chhiūⁿ la̍h kìⁿ-tio̍h hé chiū iûⁿ--khì.

3

Chóng-sī gī-lâng beh hoaⁿ-hí, in tī Siōng-tè ê bīn-chêng beh khòai-lo̍k; In ia̍h beh hoaⁿ-hoaⁿ hí-hí.

4

Lín tio̍h tùi Siōng-tè gîm-si, chhiùⁿ-koa o-ló I ê miâ; Ūi-tio̍h hit ê chē-chhia keng-kè khòng-iá--ê, siu-chō tōa-lō͘; I ê miâ sī Iâ-hô-hoa. Tio̍h tī I ê bīn-chêng khòai-lo̍k.

5

Siōng-tè tī I sèng ê só͘-chāi, chòe ko͘-jî ê pē; chòe kóaⁿ-hū ê sin-oan--ê.

6

Siōng-tè hō͘ ko͘-toaⁿ ê lâng ū ke; Hō͘ siū koaiⁿ-kaⁿ ê lâng chhut-lâi hióng-hok; To̍k-to̍k pōe-ge̍k ê lâng tiàm tī ta-sò ê tōe.

7

Siōng-tè ah, chá Lí kiâⁿ tī peh-sìⁿ ê thâu-chêng, Keng-kè khòng-iá; [Sè-la̍h

8

Hit-sî tōe kìⁿ-tio̍h Siōng-tè ê bīn chiū tín-tāng, Thiⁿ ia̍h lo̍h hō͘; Hit ê Se-nái iā tín-tāng, sī kìⁿ-tio̍h Siōng-tè, Í-sek-lia̍t ê Siōng-tè ê bīn.

9

Siōng-tè--ah, Lí lo̍h tōa hō͘, Lí ê sán-gia̍p Í-sek-lia̍t ià-siān ê sî, Lí hō͘ i kian-kò͘.

10

Lí ê hōe-chiòng tiàm tī hit tiong-kan; Siōng-tè ah, Lí ūi-tio̍h sòng-hiong lâng pī-pān un-hūi.

11

Chú chhut bēng-lēng; Thôan hó siau-sit ê hū-lú chiâⁿ tōa-tīn.

12

Kóan-peng ê ông tô-cháu lah, tô-cháu lah, Tiàm tī ke-lāi ê hū-lú pun-tio̍h só͘ chhiúⁿ ê mı̍h.

13

Lín tó tī iûⁿ-tiâu-lāi ê sî, Chhin-chhiūⁿ kap ê sı̍t siuⁿ pe̍h-gûn; I ê mn̂g siuⁿ n̂g-kim.

14

Chôan-lêng--ê tī hit lāi-bīn kóaⁿ-sòaⁿ lia̍t-ông ê sî, Sè-bīn chhin-chhiūⁿ tī Sat-bûn-soaⁿ lo̍h-seh.

15

Pa-san soaⁿ sī Siōng-tè ê soaⁿ; Pa-san soaⁿ sī chōe-chōe soaⁿ-chiam ê soaⁿ.

16

Lín chōe-chōe soaⁿ-chiam ê soaⁿ ah, Lín siáⁿ-sū gîn Siōng-tè só͘ ài khiā-khí ê soaⁿ? Iâ-hô-hoa beh tiàm tī-hia kàu éng-óan.

17

Siōng-tè ê chhia chheng-chheng bān-bān; Chú tī hit tiong-kan, chhin-chhiūⁿ tī Se-nái, tī sèng ê só͘-chāi.

18

Lí í-keng chiūⁿ kàu kôaiⁿ ê só͘-chāi, lia̍h hiah ê siū-lia̍h--ê; Lí tī lâng ê tiong-kan siū in só͘ hiàn--ê, liân pōe-ge̍k ê lâng ia̍h hiàn; Hō͘ Iâ-hô-hoa Siōng-tè thang khiā-khí in tiong-kan.

19

Chú sī eng-kai o-ló--ê, I jı̍t-jı̍t pē góan ê tàⁿ; Chiū-sī kiù góan ê Siōng-tè. [Sè-la̍h

20

Siōng-tè sī kā góan kiâⁿ ta̍k-iūⁿ chín-kiù ê Siōng-tè; Ōe thoat-lī sí-bô, sī chāi-tī Chú Iâ-hô-hoa.

21

Chóng-sī Siōng-tè beh phah-phòa I ê tùi-te̍k ê thâu-khak; Chiū-sī hit ê siông-siông hōan-chōe ê lâng ê thâu-khak.

22

Chú kóng, Góa beh hō͘ in tùi Pa-san tò-tńg--lâi, Tùi chhim-ian hō͘ in tò-tńg-lâi;

23

Hō͘ lí phah-chhùi in, lí ê kha ta̍h tī tùi-te̍k ê huih; Lí ê káu ê chı̍h chī--in.

24

Siōng-tè ah, Lí sī góa ê Siōng-tè, góa ê ông; Lâng í-keng khòaⁿ-kìⁿ Lí teh kiâⁿ, kiâⁿ jı̍p sèng ê só͘-chāi.

25

Chhiùⁿ-koa--ê kiâⁿ tī thâu-chêng, chok-ga̍k--ê tè tī āu-bīn, Iô lin-long-kó͘ ê cha-bó͘-gín-á tī tiong-kan.

26

Tùi Í-sek-lia̍t ê gôan-thâu lâi--ê, Tī ta̍k ê hōe-tiong, tio̍h o-ló Siōng-tè, chiū-sī Chú.

27

Tī-hia ū kóan-hat in ê sió Piān-ngá-bín, Ū Iû-tāi ê cho̍k-tiúⁿ kap in kui-kûn ê chèng-lâng; Ū Se-pò͘-lûn ê cho̍k-tiúⁿ, ū Ná-hut-tha-lī ê cho̍k-tiúⁿ.

28

Lí ê Siōng-tè tiāⁿ-tio̍h lí ê khùi-la̍t; Siōng-tè ah, kiû Lí kian-kò͘ Lí kā góan só͘ chiâⁿ ê sū.

29

Ūi-tio̍h Lí Iâ-lō͘-sat-léng ê tiān, Lia̍t-ông beh tòa lé-mı̍h hiàn hō͘ Lí.

30

Kiû Lí chek-pī lô͘-úi-tiong ê iá-siù, Kap kui-kûn ê gû-káng, í-kı̍p lia̍t-pang-tiong ê gû-á, Chiong gûn ta̍h tī kha-ē; Siōng-tè kóaⁿ-sòaⁿ ài kau-chiàn ê peh-sìⁿ.

31

Tōa-koaⁿ beh tùi Ai-kı̍p lâi; Kó͘-sı̍t beh kóaⁿ-kín ǹg Siōng-tè lâi kia̍h-khí chhiú.

32

Sè-chiūⁿ ê lia̍t-kok ah, lín tio̍h tùi Siōng-tè chhiùⁿ-koa, Gōan lín gîm-si o-ló Chú. [Sè-la̍h

33

Chiū-sī o-ló hit ê chē tī tùi kó͘-chá chiū ū, ke̍k-kôaiⁿ ê thiⁿ ê Chú. I hoat-chhut I ê siaⁿ, chiū-sī ke̍k-tōa ê siaⁿ.

34

Lín tio̍h chiong kôan-lêng kui hō͘ Siōng-tè; I ê ui-giâm tī Í-sek-lia̍t ê téng-bīn, I ê kôan-lêng sī tī kiong-chhong.

35

Siōng-tè ah, Lí tùi Lí sèng ê só͘-chāi chin-chiàⁿ thang kiaⁿ; Í-sek-lia̍t ê Siōng-tè sī hit ê chiong khùi-la̍t kôan-lêng siúⁿ-sù I ê peh-sìⁿ ê, Siōng-tè sī eng-kai o-ló ê.