Si-phian 第 69 章 - 巴克禮全羅

1

Tāi-pı̍t ê si; kau hō͘ Ga̍k-koaⁿ; tiāu sī ēng "Pek-ha̍p-hoe".1) Siōng-tè ah, kiû Lí kiù góa, In-ūi chiah ê chúi beh im góa ê sìⁿ-miā.

2

Góa hām-lo̍h tī chhim ê thô͘-bê-lāi, bô thang khiā-kha ê só͘-chāi; Góa kàu chhim ê chúi-lāi, tōa-chúi im-ba̍t góa.

3

Góa in-ūi góa ê âu-kiò kàu ià-siān, góa ê nâ-âu ta--khì; Góa in-ūi thèng-hāu góa ê Siōng-tè, ba̍k-chiu hoe.

4

Bô in-toaⁿ òan-hūn góa-ê khah chōe góa ê thâu-mn̂g; Lām-sám chòe góa ê tùi-te̍k, beh bia̍t-bô góa-ê, put-chí kiông-béng; Góa só͘ bô chhiúⁿ ê, góa iā tio̍h hêng.

5

Siōng-tè ah, góa ê gû-gōng Lí pún chai; Góa ê chōe-kòa bô ún-môa tī Lí.

6

Bān-kun ê Chú Iâ-hô-hoa ah, kiû Lí m̄-thang hō͘ hiah ê thèng-hāu Lí ê lâng ūi-tio̍h góa lâi kiàn-siàu; Í-sek-lia̍t ê Siōng-tè ah, kiû Lí m̄-thang hō͘ hiah ê chhē Lí ê lâng ūi-tio̍h góa lâi siū lêng-jio̍k.

7

In-ūi góa ūi-tio̍h Lí ê iân-kò͘ siū lóe-mē, Góa móa-bīn kiàn-siàu.

8

Góa ê hiaⁿ-tī khòaⁿ góa chòe kè-lō͘ ê lâng, Góa ê tâng-pau khòaⁿ góa chòe gōa-pang-lâng.

9

In-ūi góa ūi-tio̍h Lí ê chhù sim-lāi chhin-chhiūⁿ hé to̍h; Koh lóe-mē Lí ê lâng ê lóe-mē lóng kàu tī góa.

10

Góa lâu ba̍k-sái, ēng kìm-chia̍h khek-khó͘ góa ê sim; Che hóan-tńg chòe góa ê lêng-jio̍k.

11

Góa ēng môa-pò͘ chòe i-chiûⁿ, Lâng chiū ēng góa chòe chhiàu-tâm.

12

Chē tī siâⁿ-mn̂g--ê tâm-lūn góa; Chiú-hàn ēng góa chòe koa-khek.

13

Chóng-sī góa tī tit-tio̍h chiap-la̍p ê sî, tùi Iâ-hô-hoa Lí kî-tó; Siōng-tè ah, kiû Lí chiàu Lí chû-ài ê hong-sēng, Chiàu Lí chín-kiù ê chin-sı̍t lâi ìn góa.

14

Kiû Lí kiù góa chhut thô͘-bê, hō͘ góa bô tîm--lo̍h-khì; Kiû Lí kiù góa thoat-lī òan-hūn góa ê lâng, hō͘ góa chhut chhim ê chúi.

15

Kiû Lí bo̍h-tit iông-ún tōa-chúi im-ba̍t góa; Bo̍h-tit iông-ún chhim-ian thun góa; Bo̍h-tit iông-ún hām-khiⁿ hām góa.

16

Iâ-hô-hoa ah, kiû Lí ìn góa, in-ūi Lí ê chû-ài sī hó; Kiû Lí chiàu Lí chû-pi ê hong-sēng o̍at--kè-lâi khòaⁿ góa.

17

M̄-thang ng-bīn m̄-khòaⁿ Lí ê lô͘-po̍k; In-ūi góa tī hōan-lān ê tiong-kan, kiû Lí kín-kín lâi ìn góa.

18

Kiû Lí chhin-kūn góa ê lêng-hûn lâi kiù-sio̍k i; Kiû Lí in-ūi góa ê tùi-te̍k lâi sio̍k-hôe góa.

19

Lí chai góa só͘ siū ê lóe-mē, kiàn-siàu, lêng-jio̍k; Góa ê tùi-te̍k lóng tī Lí ê bīn-chêng.

20

Lóe-mē í-keng thiah-lı̍h góa ê sim, góa ê iu-būn móa-móa; Góa ǹg-bāng lâng khó-lîn, iā bô chı̍t-ê, Ǹg-bāng lâng an-ùi, iā chhē bô chı̍t-ê.

21

In the̍h khó͘-táⁿ hō͘ góa chòe chia̍h-mı̍h, Góa chhùi-ta, in ēng chhò͘ hō͘ góa lim.

22

Gōan in ê iân-toh tī in ê bīn-chêng pìⁿ-chòe lô-bāng, Tī in pêng-an ê sî, pìⁿ-chòe o̍ah-tauh.

23

Gōan in ê ba̍k-chiu o͘-àm bōe khòaⁿ-kìⁿ, Gōan Lí hō͘ in ê io siông-siông gī-gī-chhoah.

24

Gōan Lí ê thòng-hūn piàⁿ tī in ê sin-chiūⁿ; Hō͘ Lí lia̍t-lia̍t ê siū-khì jip--tio̍h in.

25

Gōan in khiā-khí ê só͘-chāi pìⁿ-chòe pha-hng; Gōan in ê pò͘-pîⁿ bô lâng khiā-khí.

26

In-ūi Lí só͘ phah hit ê lâng, in chiū khún-pek i; Lí só͘ phah-siong hiah ê lâng, in poaⁿ-tia̍h in ê iu-khó͘.

27

Gōan Lí tī in ê chōe-siōng ka chōe; Bo̍h-tit iông-ún in ū hūn Lí ê gī.

28

Gōan in tùi o̍ah-miā ê chheh siū chhat-bia̍t, Bô kì tī gī-lâng ê tiong-kan.

29

Chóng-sī góa sī khùn-khó͘ iu-siong ê lâng; Siōng-tè ah, gōan Lí ê kiù-un an-tì góa tī kôaiⁿ ê só͘-chāi.

30

Góa beh ēng si-koa o-ló Siōng-tè ê miâ; Iā beh ēng kám-siā chheng I chòe tōa.

31

Che sī hō͘ Iâ-hô-hoa hoaⁿ-hí, iâⁿ-kè hiàn gû, Á-sī hiàn ū-kak ū-tôe ê gû-káng.

32

Khiam-pi ê lâng khòaⁿ-kìⁿ chiū hoaⁿ-hí; Lín chhē Siōng-tè ê lâng, gōan lín ê sim o̍ah--khí-lâi.

33

In-ūi Iâ-hô-hoa thiaⁿ sòng-hiong ê lâng, Bô khòaⁿ-khin ūi-tio̍h I siū koaiⁿ-kaⁿ ê lâng.

34

Gōan thiⁿ kap tōe o-ló I; Hái kap kî-tiong it-chhè ê tōng-bu̍t iā tio̍h o-ló I.

35

In-ūi Siōng-tè beh kiù Sek-an, khí-chō Iû-tāi ê siâⁿ; In beh khiā-khí tī-hia, tit-tio̍h i chòe-gia̍p.

36

I ê lô͘-po̍k ê hō͘-è beh sòa-chiap i, Thiàⁿ I ê miâ ê lâng beh tiàm tī hit tiong-kan.