Si-phian 第 88 章 - 巴克禮全羅

1

Khó-la̍h hō͘-è ê si-koa, chiū-sī Í-sū-la̍h lâng Hi-bān kà-sī ê si; kau hō͘ Ga̍k-koaⁿ; tiāu, ēng Mô͘-ha̍p-la̍h Lī-àm-ngô͘.1) Iâ-hô-hoa, kiù góa ê Siōng-tè ah, Góa jı̍t-mî tī Lí ê bīn-chêng kiû-kiò.

2

Gōan góa ê kî-tó kàu Lí ê bīn-chêng; Kiû Lí àⁿ hī-khang thiaⁿ góa ê kî-kiû.

3

In-ūi góa ê sim móa-móa hōan-lān, Góa ê sìⁿ-miā kūn tī im-kan.

4

Góa sǹg kap lo̍h-hia̍t ê lâng tâng-lia̍t; Iā chhin-chhiūⁿ bô tit-tio̍h pang-chān ê lâng.

5

Góa siū hiat-ka̍k tī sí-lâng-tiong, Chhin-chhiūⁿ siū-thâi ê lâng tó tī bōng-lāi; In sī Lí bô koh kì-tit-ê, Tùi Lí ê chhiú keh-tn̄g.

6

Lí hē góa tī ke̍k-chhim ê hia̍t; Tī o͘-àm ê tōe-hng, tī chhim-ian.

7

Lí ê siū-khì tāng-tāng teh góa; Lí ēng Lí it-chhè ê hái-éng khó͘-chhó͘ khún-pek góa. [Sè-la̍h

8

Kap góa sio-bat ê lâng Lí hō͘ in lī-khui góa hn̄g-hn̄g, Hō͘ in iàm-ò͘ⁿ góa; Góa siū koaiⁿ-kìm, bōe-tit chhut-lâi.

9

Góa ê ba̍k-chiu in-ūi khùn-khó͘ phah-pháiⁿ; Iâ-hô-hoa ah, góa jı̍t-jı̍t kiû-kiò Lí, Góa ǹg Lí kia̍h-chhiú.

10

Lí kiám beh kiâⁿ kî-sū hō͘ sí-lâng khòaⁿ mah? Chóng-bô im-hûn iáu ōe khí-lâi o-ló Lí ah? [Sè-la̍h

11

Kiám ōe tī bōng-lāi kóng-khí Lí ê chû-ài mah? Kiám ōe tī bia̍t-bô ê tiong-kan kóng-khí Lí ê sìn-sı̍t mah?

12

Tī o͘-àm ê só͘-chāi, kiám ōe chai Lí ê kî-sū mah? Tī bōe-kì-tit tāi-chì ê tōe-hng, kiám ōe chai Lí ê kong-gī mah?

13

Iâ-hô-hoa ah, góa ū kî-kiû Lí; Tī chá-khí-sî góa ê kî-tó beh thàu kàu Lí ê bīn-chêng.

14

Iâ-hô-hoa ah, Lí siáⁿ-sū khì-sak góa? Siáⁿ-sū ng Lí ê bīn, m̄ khòaⁿ góa?

15

Góa tùi siàu-liân siū-khó͘, hiám-hiám sí; Góa siū-tio̍h Lí ê kiaⁿ-hiâⁿ, tì-kàu sim hun-lōan.

16

Lí ê tōa siū-khì im-ba̍t góa; Lí ēng kiaⁿ-hiâⁿ tû-bia̍t góa.

17

Chiah-ê thong-jı̍t chhin-chhiūⁿ chúi ûi góa; Chı̍t-chôe lâi ûi-khùn góa.

18

Lí chiong góa ê liông-pêng bı̍t-iú keh-khui hn̄g-hn̄g; Hō͘ góa só͘ saⁿ-bat ê lâng jı̍p tī o͘-àm ê só͘-chāi.