Si-phian 第 89 章 - 巴克禮全羅

1

Í-su-la̍h lâng, Í-thàm, kà-sī ê si.1) Góa beh chhiùⁿ-koa o-ló Iâ-hô-hoa ê chû-ài kàu tī éng-óan. Beh ēng góa ê chhùi thôan Lí ê sìn-sı̍t kàu tāi-tāi.

2

In-ūi góa bat kóng, Chû-ài beh siū kiàn-lı̍p kàu éng-óan; Lí beh chiong Lí ê sìn-sı̍t kian-kò͘ tī thiⁿ--nih.

3

Góa kap Góa só͘ kéng ê lâng lı̍p-iok, Tùi Góa ê lô͘-po̍k Tāi-pı̍t chiù-chōa.

4

Góa beh hō͘ lí ê hō͘-è kian-kò͘ kàu éng-óan, Koh hō͘ lí ê pó-chō kiàn-lı̍p kàu tāi-tāi. [Sè-la̍h

5

Iâ-hô-hoa ah, chiah ê thiⁿ beh o-ló Lí ê kî-sū; Tī sèng--ê ê hōe-tiong, beh o-ló Lí ê sìn-sı̍t.

6

Tī khong-tiong chī-chūi ōe pí-tit Iâ-hô-hoa? Tōa kôan-lêng--ê ê chèng-kiáⁿ-tiong, chī-chūi ōe chhin-chhiūⁿ Iâ-hô-hoa?

7

I tī sèng--ê ê gī-hōe tiong, sī tōa-tōa ū ui-giâm ê Siōng-tè; Pí it-chhè tī I sì-ûi ê, koh-khah thang kiaⁿ-ùi.

8

Bān-kun ê Siōng-tè Iâ-hô-hoa ah, Toh-lo̍h chı̍t-ê tōa kôan-lêng--ê, chhin-chhiūⁿ Lí Iâ-hô-hoa? Lí ê sìn-sı̍t tī Lí ê sì-ûi.

9

Hái-chúi tiòng-kôaiⁿ, Lí kóan-hat--i; Hái-éng giâ--khí-lâi, Lí hō͘ i pîⁿ.

10

Lí phah chhùi La̍h-hap-pek, chhin-chhiūⁿ í-keng thâi-sí ê lâng; Lí ēng ū khùi-la̍t ê chhiú phah-sòaⁿ Lí ê tùi-te̍k.

11

Thiⁿ sio̍k Lí, tōe ia̍h sio̍k Lí; Sè-kài kap kî-tiong só͘ chhiong-móa--ê, lóng sī Lí só͘ kiàn-lı̍p.

12

Lâm-pak sī Lí só͘ chhòng-chō; Tha-po̍k kap Hek-bûn, in-ūi Lí ê miâ lâi hoaⁿ-hí.

13

Lí ū tōa kôan-lêng ê chhiú, Lí ê chhiú ū la̍t, Lí ê chiàⁿ-chhiú kia̍h kôaiⁿ-kôaiⁿ.

14

Kong-pêng kap gī-lí sī Lí ê pó-chō ê tōe-ki; Chû-ài kap sêng-sı̍t kiâⁿ tī Lí ê bīn-chêng.

15

Ōe bat hoaⁿ-hí ê siaⁿ--ê, hit ê peh-sìⁿ ū hok-khì; Iâ-hô-hoa ah, in tī Lí ê bīn só͘ hoat-chhut ê kng teh kiâⁿ.

16

In jı̍t-jı̍t in-ūi Lí ê miâ lâi hoaⁿ-hí; In-ūi Lí ê kong-gī tit-tio̍h seng-kôaiⁿ.

17

In-ūi Lí sī in khùi-la̍t ê êng-kng; Koh in-ūi Lí hoaⁿ-hí góan, góan ê kak beh tit-tio̍h kia̍h-kôaiⁿ.

18

Góan ê tîn-pâi sio̍k tī Iâ-hô-hoa; Góan ê ông sio̍k tī Í-sek-lia̍t ê Sèng--ê.

19

Tng-sî Lí tī īⁿ-siōng-tiong hoan-hù Lí sèng ê peh-sìⁿ, kóng, Góa ēng pang-chān ê la̍t, hē tī hit ê ū kôan-lêng--ê ê sin-chiūⁿ; Tùi peh-sìⁿ-tiong kéng--ê, Góa ko-seng--i.

20

Góa chhē-tio̍h Góa ê lô͘-po̍k Tāi-pı̍t; Ēng Góa ê sèng-iû boah--i.

21

Góa ê chhiú beh siông-siông kap i tī-teh, Góa ê chhiú-kut ia̍h beh kian-kò͘--i.

22

Tùi-te̍k bōe-ōe le̍k-sek i; Hiong-ok ê lâng bōe-ōe khó͘-chhó͘--i.

23

Góa beh tī i ê bīn-chêng phah-chhùi i ê tùi-te̍k; Kong-kek hit ê òan-hūn i ê lâng.

24

Chóng-sī Góa ê sìn-sı̍t, kap Góa ê chû-ài, beh kap i tī-teh; In-ūi Góa ê miâ, i ê kak beh tit-tio̍h kia̍h-kôaiⁿ.

25

Góa beh hō͘ i ê chhiú chhun kàu hái; Chiàⁿ-chhiú chhun kàu chiah ê hô.

26

I beh chheng-ho͘ Góa kóng, Lí sī góa ê pē, Sī góa ê Siōng-tè, sī kiù góa ê chio̍h-pôaⁿ.

27

Góa ia̍h beh siat-lı̍p i chòe tōa-kiáⁿ, Chòe sè-chiūⁿ tē-it kôaiⁿ ê kun-ông.

28

Góa beh ūi-tio̍h i pó-chûn Góa ê chû-ài kàu éng-óan; Góa kap i só͘ lı̍p ê iok, tek-khak bô piàn-ōaⁿ.

29

Góa ia̍h beh pó-chûn i ê hō͘-è kàu tāi-tāi; Hō͘ i ê pó-chō chhin-chhiūⁿ thiⁿ ê kú.

30

Siat-sú i ê kiáⁿ-sun pàng-sak Góa ê lu̍t-hoat; Bô kiâⁿ Góa ê hoat-tō͘;

31

Pōe-biū Góa ê lu̍t-lē, Bô siú Góa ê kài-bēng;

32

Góa chiū beh ēng kóaiⁿ-á chek-ho̍at in ê kè-sit; Ēng piⁿ chek-ho̍at in ê chōe-ok.

33

Chóng-sī Góa tek-khak bô chiong góa ê chû-ài it-chīn tùi i siu-hôe; Ia̍h tek-khak bô hō͘ Góa ê sìn-sı̍t hòe-bô.

34

Góa tek-khak bô sit Góa ê iok, Ia̍h bô kóe-ōaⁿ Góa ê chhùi só͘ kóng--ê.

35

Góa chı̍t-pái kí ka-kī ê sèng-kiat lâi chiù-chōa, Góa koat-tòan bô tùi Tāi-pı̍t kóng pe̍h-chha̍t;

36

I ê hō͘-è beh thôan kàu éng-óan; I ê pó-chō tī Góa ê bīn-chêng, chhin-chhiūⁿ jı̍t ê kú-tn̂g;

37

Ia̍h chhin-chhiūⁿ ge̍h ê éng-óan kiàn-lı̍p; Koh chhin-chhiūⁿ thiⁿ-téng khak-sı̍t ê kan-chèng. [Sè-la̍h

38

Chóng-sī Lí ū siū-khì Lí ê siū-boah-iû--ê, Iàm-chiān khì-sak i.

39

Lí í-keng iàm-ò͘ⁿ kap Lí ê lô͘-po̍k só͘ lı̍p ê iok, Chiong i ê bián-liû chau-that tī tōe--nih.

40

Lí í-keng thiah i it-chhè ê lî-pa; Hō͘ i ê ōe-só͘ pìⁿ chòe pha-hng ê só͘-chāi.

41

Kè-lō͘ lâng lóng chhiúⁿ-the̍h i; I chiâⁿ-chòe keh-piah kok só͘ lêng-jio̍k--ê.

42

Lí hō͘ i ê tùi-te̍k ê chiàⁿ-chhiú kia̍h-kôaiⁿ; Hō͘ i ê kiû-siû lóng hoaⁿ-hí.

43

Lí hō͘ i ê to-kiàm tó-mî, Hō͘ i tī kau-chiàn ê sî khiā-bōe-tiâu.

44

Lí hō͘ i ê êng-hián bô--khì, Chiong i ê pó-chō chhia-tó tī tōe--nih.

45

Lí kiám-chió i chheng-liân ê jı̍t-chí; Koh hō͘ i móa-móa kiàn-siàu. [Sè-la̍h

46

Iâ-hô-hoa ah, Lí beh jōa-kú ka-kī khǹg-ba̍t, kàu éng-óan mah? Lí ê siū-khì chhin-chhiūⁿ hé to̍h, beh jōa-kú ah?

47

Kiû Lí kì-tit góa ê sî-kan, cháiⁿ-iūⁿ hiah té-chió; Lí chhòng-chō it-chhè ê sè-kan lâng, hō͘ in kàu hiah khang-hu ah!

48

Sím-mı̍h lâng ōe tn̂g-tn̂g o̍ah, bô kìⁿ-tio̍h sí, Ōe kiù i ê lêng-hûn thoat-lī im-kan ê kôan-pèng ah? [Sè-la̍h

49

Chú ah, Lí chêng pîn Lí ê sìn-sı̍t, tùi Tāi-pı̍t chiù-chōa--ê, Hiah ê chû-ài taⁿ tī toh-lo̍h?

50

Chú ah, kiû Lí kì-liām Lí ê lô͘-po̍k só͘ siū ê lêng-jio̍k, Kì-liām góa cháiⁿ-iūⁿ chiong it-chhè kiông-sēng ê peh-sìⁿ ê lêng-jio̍k chûn tī góa ê sim-lāi;

51

Iâ-hô-hoa ah, Lí ê tùi-te̍k ēng chit ê lêng-jio̍k, Chiū-sī lêng-jio̍k Lí siū boah-iû--ê ê chong-chek.

52

Tio̍h o-ló Iâ-hô-hoa kàu éng-óan. A-bēng, koh A-bēng.