Si-phian 第 90 章 - 巴克禮全羅

1

Siōng-tè ê lâng Mô͘-se ê kî-tó.1) Chú ah, Lí ta̍k sè-tāi chòe góan khiā-khí ê só͘-chāi.

2

Chiah ê soaⁿ iáu-bē siⁿ-chhut, Tōe kap sè-kài Lí iáu-bē chō-chiâⁿ, Tùi éng-óan kàu éng-óan Lí sī Siōng-tè.

3

Lí hō͘ lâng kui thó͘, Kóng, Lín sè-kan lâng, tio̍h o̍at-tò-tńg.

4

In-ūi chāi Lí khòaⁿ, chı̍t-chheng nî chhin-chhiūⁿ í-keng kè--khì ê chā-jı̍t; Koh chhin-chhiūⁿ mî-kan ê chı̍t-kiⁿ.

5

Lí chhin-chhiūⁿ ēng tōa-chúi kā in lâu--khì; in chhin-chhiūⁿ khùn chı̍t-chhíⁿ; Chá-khí-sî in chhin-chhiūⁿ hoat-siⁿ ê chháu.

6

Chá-khí-sî hoat-siⁿ bō͘-sēng; Ê-hng-sî siū-koah chiū ko͘-tâ.

7

In-ūi góan tùi Lí ê siū-khì chiū siau-bia̍t, Koh góan tùi Lí ê hoat-sèng lâi kiaⁿ-hiâⁿ.

8

Lí chiong góan ê chōe-ok pâi tī Lí ê bīn-chêng, Chiong góan ún-ba̍t ê pháiⁿ pâi tī Lí ê bīn ê kng-bêng-tiong.

9

Góan ê jı̍t-chí lóng keng-kè tī Lí ê tōa siū-khì; Góan ê nî-hè kè-liáu, chhin-chhiūⁿ thó͘ chı̍t ê khùi.

10

Góan it-seng ê nî-jı̍t sī chhit-cha̍p hè, Nā sī ióng-chòng thang kàu poeh-cha̍p hè, Chóng-sī kî-tiong só͘ khoa-kháu--ê, put-kò sī lô-khó͘ iu-chhiû; I kín-kín kè, góan chiū pe--khì.

11

Chī-chūi chai Lí siū-khì ê kôan-sè, Ia̍h chiàu Lí eng-kai siū ê kèng-ùi, chai Lí ê siū-khì ah?

12

Kiû Lí kà-sī góan, cháiⁿ-iūⁿ sǹg ka-kī ê jı̍t-chí; Hō͘ góan tit-tio̍h tì-hūi ê sim.

13

Iâ-hô-hoa ah, beh kàu tī-sî nih? kiû Lí tò-tńg; Ūi-tio̍h Lí ê lô͘-po̍k lâi hôe-sim.

14

Kiû Lí chá-khí-sî ēng Lí ê chû-ài hō͘ góan móa-chiok; Hō͘ góan chı̍t-sì-lâng hoaⁿ-hí khòai-lo̍k.

15

Kiû Lí chiàu Lí khó͘-chhó͘ góan ê jı̍t, Chiàu góan tú-tio̍h hōan-lān ê nî, hō͘ góan hoaⁿ-hí.

16

Gōan Lí ê só͘-chòe tùi Lí ê lô͘-po̍k hián-hiān, Lí ê êng-kng tùi in ê kiáⁿ-sun hián-bêng.

17

Gōan Chú góan ê Siōng-tè ê bí-biāu tiàm tī góan ê téng-bīn; Gōan Lí kian-kò͘ góan ê chhiú só͘ chòe ê kang, Góan ê chhiú só͘ chòe ê kang, gōan Lí kian-kò͘ i.