Si-phian 第 91 章 - 巴克禮全羅

1

Tiàm tī Chì-kôaiⁿ--ê ún-ba̍t ê só͘-chāi--ê, Hit ê lâng beh khiā-khí tī Chôan-lêng--ê ê ìm-ńg.

2

Lūn-kàu Iâ-hô-hoa, góa beh kóng, I sī góa tô-siám ê só͘-chāi, sī góa ê soaⁿ-chē; Sī góa ê Siōng-tè, góa só͘ óa-khò--ê.

3

In-ūi I beh kiù lí thoat-lī tng chiáu-á ê lô-bāng, Kap to̍k-hāi ê un-e̍k.

4

I beh ēng I ê sı̍t-kó͘ âⁿ lí, Lí beh bih tī I ê sı̍t-ē, I ê sêng-sı̍t sī tōa-sòe ê tîn-pâi.

5

Lí m̄-bián kiaⁿ mî-kan ê kiaⁿ-hiâⁿ, Á-sī jı̍t--sî teh pe ê chìⁿ.

6

Ia̍h bián kiaⁿ o͘-àm-tiong liû-hêng ê un-e̍k, Á-sī jı̍t tiong-tàu bia̍t-bô lâng ê to̍k-chèng.

7

Ū chheng lâng lek--lo̍h-khì tī lí ê sin-piⁿ, Ū bān lâng lek--lo̍h-khì tī lí ê chiàⁿ-pêng, Che ia̍h bōe óa-kūn lí.

8

Put-kò lí ōe chhin-ba̍k khòaⁿ-kìⁿ, Ia̍h khòaⁿ-kìⁿ pháiⁿ-lâng siū pò-èng.

9

In-ūi Iâ-hô-hoa Lí sī góa tô-siám ê só͘-chāi; Lí bat ēng Chì-kôaiⁿ--ê chòe lí khiā-khí ê só͘-chāi;

10

Chiū chai-hāi bōe kàu tī lí, Un-e̍k ia̍h bōe óa-kūn lí ê pò͘-pîⁿ.

11

In-ūi I beh ūi-tio̍h lí hoan-hù I ê sù-chiá, Tī lí it-chhè ê lō͘ pó-hō͘ lí.

12

In beh ēng chhiú hû lí, Bián-tit lí ê kha tak-tio̍h chio̍h.

13

Lí beh ta̍h sai kap to̍k-chôa, Lap sai-á-thûn kap tōa-bé chôa.

14

In-ūi i chin thiàⁿ Góa, Góa chiū beh kiù i; In-ūi i bat Góa ê miâ, Góa chiū beh an-tì i tī kôaiⁿ ê só͘-chāi.

15

I kiû-kiò Góa, Góa chiū beh ìn--i; I tī gûi-kip ê sî, Góa beh kap i tī-teh; Góa beh kiù i, hō͘ i chun-kùi.

16

Góa beh ēng tn̂g hè-siū hō͘ i móa-chiok, Hō͘ i khòaⁿ-kìⁿ Góa ê kiù-un.