Si-phian 第 92 章 - 巴克禮全羅

1

An-hioh-jı̍t ê si-koa.1) Chin-hó ah, kám-siā Iâ-hô-hoa, Chhiùⁿ-koa o-ló Lí Chì-kôaiⁿ--ê ê miâ;

2

Chá-khí-sî pò-iông Lí ê chû-ài; Ê-hng-sî pò-iông Lí ê sìn-sı̍t.

3

Ēng cha̍p-tiâu-hiân ê ga̍k-khì kap sek; Ēng khîm tôaⁿ chong-giâm ê siaⁿ-im.

4

In-ūi Iâ-hô-hoa Lí ēng Lí ê só͘-kiâⁿ hō͘ góa hoaⁿ-hí; Góa beh in-ūi Lí ê chhiú só͘ chòe--ê lâi khòai-lo̍k.

5

Iâ-hô-hoa, Lí ê só͘-chòe cháiⁿ-iūⁿ hiah-tōa; Lí ê sim-su ke̍k-kî chhim.

6

Bû-ti ê lâng bōe hiáu-tit, Gû-chhún ê lâng ia̍h bōe bêng-pe̍k chit-ê.

7

Pháiⁿ-lâng hoat-siⁿ chhin-chhiūⁿ chháu, It-chhè chòe-pháiⁿ ê lâng bō͘-sēng ê sî, Chiàⁿ-sī in beh bia̍t-bô kàu éng-óan;

8

Chóng-sī Iâ-hô-hoa Lí sī chì-kôaiⁿ, tı̍t-kàu éng-óan.

9

Iâ-hô-hoa ah, Lí khòaⁿ, Lí ê tùi-te̍k, Lí khòaⁿ, Lí ê tùi-te̍k tek-khak bia̍t-bô; It-chhè chòe-pháiⁿ ê lâng ia̍h beh sì-sòaⁿ.

10

Chóng-sī Lí hō͘ góa ê kak kia̍h-kôaiⁿ, chhin-chhiūⁿ iá-gû ê kak; Góa sī siū sin ê iû boah--ê.

11

Góa chhin-ba̍k khòaⁿ-kìⁿ góa ê tùi-te̍k tú-tio̍h pò-èng; Góa chhin-hī thiaⁿ-kìⁿ hiah ê khí-lâi kong-kek góa ê pháiⁿ-lâng siū hêng-ho̍at.

12

Gī-lâng beh heng-ōng chhin-chhiūⁿ chó-chhiū; Beh tióng-tōa chhin-chhiūⁿ Lī-pa-lùn ê pek-hiuⁿ-chhiū.

13

Kìⁿ-nā chai tī Iâ-hô-hoa ê chhù--ê, Beh heng-ōng tī lán ê Siōng-tè ê īⁿ-lāi.

14

In nî-lāu ê sî iû-gôan beh kiat ké-chí; In ê chiap móa-móa, sek chhiⁿ-chhùi;

15

Thang hián-bêng Iâ-hô-hoa sī chèng-tı̍t--ê, I sī góa ê chio̍h-pôaⁿ, I lóng bô put-gī.