帖撒羅尼迦前書 第 2 章 - 台語漢字羅馬本

1

因為兄弟，恁家己知阮前到恁中間呣是空空。

2

獨獨佇腓立比已經代先受苦抵著凌辱，照恁所知的；阮佇多多爭戰的中間，倚靠咱的上帝，得著好膽對恁講上帝的福音。

3

因為阮的勸勉呣是出佇差謬，呣是出佇無清氣，也呣是用奸詐。

4

就是阮互上帝驗過，才用福音託仗阮，阮就照按呢來講，呣是親像互人歡喜的，就是互驗阮的心的上帝歡喜。

5

因為阮攏未曾用諂媚的話，照恁所知的；也無用妝飾來遮蓋貪心，上帝做干證。

6

阮做基督的使徒，雖然通教人敬重阮，總是呣曾對人求榮光，也無對恁也無對別人；

7

阮就是溫柔佇恁中間，親像奶母育家己的子兒。

8

親像按呢阮因為戀慕恁，就呣若上帝的福音，連家己的生命也歡喜互恁，因為恁是阮所疼痛的。

9

兄弟啊，恁記得阮的著磨及艱苦，愛免得拖累恁一人，就暝日做工，來傳上帝的福音互恁。

10

恁做干證，上帝也做干證，阮對恁信的人，做人是怎樣聖潔、公義、無通嫌。

11

親像恁知阮怎樣款待恁逐人，親像老父款待家己的子兒，有勸勉恁，也安慰，也干證，

12

是欲互恁行代誌合佇上帝，就是召恁入伊的國及榮光的。

13

所以，阮也感謝上帝無息，因為恁對阮承受所聽上帝的道理的時，恁接納伊；無掠做人的道理，就是掠做上帝的道理。實在真正是，這就是出力行佇恁信的人的中間。

14

因為兄弟啊，恁有學猶太地佇基督耶穌上帝諸個教會；因為恁受著恁同族的陷害，親像受著猶太人陷害一樣。

15

猶太人害死主耶穌及諸個先知，也革逐阮。無互上帝歡喜，閣及眾人做對敵；

16

阮教示外邦人欲互得著救，阻擋阮，致到的罪惡時時貫滿。若是受氣到佇已經極頭。

17

兄弟啊，阮暫時及恁離別，身軀離別，心無離別；就殷勤愈切，真愛見著恁的面。

18

因為阮愛就近恁；我保羅一擺閣一擺愛去，若是撒但阻擋阮。

19

因為阮的向望及歡喜，以及所誇口的冕旒是甚麼？豈呣是恁當咱的主耶穌閣來的時、佇伊的面前嗎？

20

因為恁是阮的榮光及歡喜。