申命記 第 20 章 - 台語漢字羅馬本

1

「你出去及對敵交戰的時，看見馬、車，以及百姓比你卡多個，呣免驚，因為導你出埃及地的耶和華──你的上帝及你佇。

2

恁欲臨陣交戰的時，祭司著到百姓的面前宣佈，

3

對講：『以色列人啊，恁著聽，恁今仔日欲及百姓對敵交戰，呣通失膽，呣通驚，來愕愕惙，也呣通因為來懾；

4

因為耶和華──恁的上帝就是及恁相及去的，欲替恁及對敵交戰來拯救恁。』

5

許個官長也著對百姓宣佈講：『是誰起新厝，猶未行落成的禮啊？伊著倒去兜，驚了伊陣亡，別人行落成的禮。

6

是誰種葡萄園，猶未有用著伊的果子啊？伊也通倒去兜，驚了伊陣亡，別人去用伊。

7

是誰聘定某，猶未娶伊啊？伊也通倒去兜，驚了伊陣亡，別人娶伊。』

8

許個官長閣著對百姓宣佈講：『是誰驚惶失膽啊？伊通倒去兜，驚了伊的兄弟的心消溶，親像伊的心一樣。』

9

許個官長對百姓宣佈明白，著設立許個軍長做頭來導百姓。

10

「你倚近一個城、欲拍的時，著代先對伊宣佈和平的話。

11

伊若用和平的話答覆你，給你開城門，彼中間所有的百姓攏欲做你的差用，來服事你；

12

伊若呣肯及你和好，反轉欲及恁交戰，恁就著圍困伊；

13

耶和華──你的上帝用伊交付你，你就著用刀一盡死伊許個查甫丁。

14

獨獨婦女、囝仔、精牲、及城內一切所搶的物，你通搶伊來做家己的路用。你所搶你的對敵的物，就是耶和華──你上帝所賞賜你的，你通食用。

15

離開你遠遠許個城，呣是諸個列國的城，你著按呢款待伊。

16

獨獨屬諸個百姓的城，耶和華──你上帝已經賞賜你做業，其中見有喘氣的，你呣通互伊活；

17

著照耶和華──你上帝所命令你的將赫人、亞摩利人、迦南人、比利洗人、希未人、耶布斯人一盡滅伊，

18

免得教示恁學一切可惡的事，就是對佇的上帝所行的，致到恁得罪耶和華──恁的上帝。

19

「你若久久圍困一個城、攻擊欲取伊，就呣通用斧頭拍歹樹木；因為你通食伊的果子，所以呣通剉伊，田野的樹木豈是人，互你圍困嗎？

20

獨獨你所識呣是通做食物的樹通剉來毀壞伊，用伊來做攻城的器具，攻擊彼個及你交戰的城，到攻破伊。」