士師記 第 16 章 - 台語漢字羅馬本

1
參孫到迦薩,佇遐看見一個妓女,就親近伊。
2
有人給迦薩人講:「參孫到遮!」就透暝圍伊,佇城門當等伊,通暝靜靜,講:「到天光早咱就通伊。」
3
參孫睏到半暝,佇半暝起來,將城門的門扇、及二支門豎、及門楗,攏拆起來,下佇肩頭裡,夯到希伯崙對面的山頂。
4
後來,參孫佇梭烈山谷戀愛一個查某人,名叫大利拉。
5
非利士人許個首領上去見彼個查某人,對伊講:「你著漏參孫,看伊的大氣力在佇叨落,阮怎樣才會贏伊,通縛來困苦伊。阮就逐人互你一千一百銀。」
6
大利拉給參孫講:「求你給我講,你的大氣力在佇叨落,著怎樣才會縛你困苦你。」
7
參孫應講:「人若用七條猶未乾青的藤仔縛我,我就軟弱親像別人。」
8
對按呢非利士人許個首領提七條猶未乾青的藤仔來,交互婦仁人,伊就用彼個來縛伊。
9
婦仁人已經有埋伏人佇伊的內房。婦仁人講:「參孫啊,非利士人來欲掠你!」參孫就掇斷藤仔,親像掇斷經過火的麻絲一樣。按呢,伊的大氣力人猶原呣知。
10
大利拉給參孫講:「你騙我,對我講白賊。今求你給我講著怎樣才會縛你。」
11
參孫應講:「人若用未曾用的新索縛我,我就軟弱親像別人。」
12
大利拉就用新索縛伊,對伊講:「參孫啊,非利士人來欲掠你!」彼時埋伏的人匿佇內房。參孫就掇斷伊手骨裡的索,親像掇斷一條線。
13
大利拉給參孫講:「你到今猶騙我,對我講白賊。求你給我講,著怎樣才會縛你。」參孫應講:「你若用七股的頭毛,及緯線相及織就會。」
14
婦仁人就用釘釘伊的頭毛,給伊講:「參孫啊,非利士人來欲掠你!」參孫就醒,將布機的釘及緯線做一下拔出來。
15
大利拉給伊講:「你的心無連佇我,怎樣講你疼我?你已經騙我三擺,無給我講,你的氣力在佇叨落。」
16
大利拉日日用話催伊迫伊,致到伊的心鬱悶到欲死。
17
就將伊的心底所囥的攏報伊,給伊講:「永呣曾有剃頭刀到我的頭殼,因為我對母胎就歸上帝做拿細耳人;若給我剃起來,我的氣力就離開我,我就軟弱親像別人。」
18
大利拉看見伊將心底所囥的攏給伊講,就差人叫非利士人的首領,給講:「請恁此擺閣上來,因為伊已經將心底所囥的攏給我講。」非利士人的首領上去婦仁人遐,彼個銀帶佇手裡。
19
伊就互參孫睏佇伊的腳頭窩,叫一人來剃伊七股的頭毛。對按呢困苦伊,伊的氣力就離開伊。
20
伊講:「參孫啊,非利士人來欲掠你!」參孫睏就醒,心內講:「我欲親像前幾若擺家己滾開」;總是伊呣知耶和華已經離開伊。
21
非利士人掠伊,挖伊的目睭,帶伊到迦薩,用銅鍊縛伊;伊就佇監裡挨磨。
22
若是伊的頭毛受剃了後,閣漸漸長起來。
23
非利士人許個首領聚集,欲獻大祭互的上帝大袞,也欲宴樂,因為講:「咱的上帝將咱的對敵參孫交佇咱的手啦。」
24
百姓看見參孫,就謳咾的上帝講:「咱的對敵毀咱的地、閣死咱多多人的,今咱的上帝已經將伊交佇咱的手。」
25
宴樂的時,就講:「叫參孫來,互咱弄。」就叫參孫出監,伊就互弄。互伊徛佇二支柱的中間。
26
參孫給牽伊的手的囝仔講:「請你互我摸著托厝的柱,互我倚。」
27
彼時厝內男女滿滿,非利士人的眾首領也攏佇遐。厝頂男女約略有三千人看人弄參孫。
28
參孫祈禱耶和華講:「主耶和華啊,求你數念我。上帝啊,求你賜我盡此擺的氣力,互我為我二蕊目睭對非利士人做一下報仇。」
29
參孫就攬托彼間厝的二支中柱來倚伊:正手攬一支,倒手攬一支,
30
參孫講:「願我及非利士人相及死!」就盡力屈身,厝就倒,來壓佇許個首領及佇彼內面的眾人。按呢,參孫死的時所害死的比活的時所害死的閣卡多。
31
參孫的兄弟及伊的老父全家攏落來收拾伊,扛上去埋葬佇瑣拉及以實陶的中間,佇伊的老父瑪羅亞的墓地。參孫做以色列的士師二十年。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!