士師記 第 4 章 - 台語漢字羅馬本

1

以笏死了，以色列人閣行耶和華所看做歹的事，

2

耶和華賣佇迦南王耶賓的手就是佇夏瑣做王的；伊的軍長是西西拉，伊徛起佇外邦人的夏羅設。

3

耶賓王有鐵車九百張。伊大大欺壓以色列人二十年，以色列人就求叫耶和華。

4

彼時有一個女先知名叫底波拉，是拉比多的某，伊做以色列的士師。

5

伊徛起佇以法蓮山地拉瑪及伯特利的中間，佇底波拉的棗樹腳。以色列人攏上去伊遐受伊判斷。

6

伊差人叫亞比羅菴的子巴拉對拿弗他利的基低斯來，對伊講：「耶和華──以色列的上帝豈呣是命令講：『你著去他泊山導拿弗他利及西布倫人一萬及你去。

7

我欲互耶賓的軍長西西拉及伊的車，伊的全軍到基順河你遐；我欲將伊交佇你的手。』」

8

巴拉給伊講：「你若及我去，我就欲去；你若呣及我去，我就呣去。」

9

伊講：「我的確欲及你去，總是你佇所行的路得著榮顯，因為耶和華欲賣西西拉佇婦仁人的手。」底波拉就起來，及巴拉相及去基低斯。

10

巴拉就招集西布倫人及拿弗他利人到基低斯，隨伊上去的有一萬人。底波拉也及伊上去。

11

基尼人希百曾離開基尼人，就是摩西的外戚何巴的後裔，就搭布棚佇撒拿音的橡樹邊就是倚近基低斯的。

12

有人給西西拉講：「亞比挪菴的子巴拉已經上去他泊山。」

13

西西拉就聚集伊攏總的車就是鐵車九百張及隨伊的全軍，對外邦的夏羅設，到基順河。

14

底波拉對巴拉講：「起來，今仔日就是耶和華將西西拉交佇你的手的日。耶和華豈無佇你的頭前行嗎？」對按呢巴拉對他泊山落來，隨伊的有一萬人。

15

耶和華用刀拍亂西西拉及伊所有的車伊的全軍，佇巴拉的面前；西西拉落車步行逃走。

16

總是巴拉追許個車及軍隊，到外邦的夏羅設。西西拉的全軍攏倒佇刀下，無留一個人。

17

只有西西拉步行逃走，到基尼人希百的某雅億的布棚，因為夏瑣王耶賓及基尼人希百的家和好。

18

雅億出來迎接西西拉，給伊講：「我的主啊，越入來，請你越入我遮，呣免驚」；西西拉就越入伊的布棚。雅億就用毯仔給伊蓋。

19

西西拉給伊講：「我嘴乾，請你用淡薄水互我飲。」伊就開貯奶的皮袋，互伊飲，猶原給伊蓋。

20

西西拉閣給伊講：「你徛佇布棚門，若有人來問你講：『有人佇你遮無？』你就給伊講：『無。』」

21

西西拉厭倦睏落眠。希百的某雅億提布棚的釘，手抬鎚仔，跕跕仔行到伊遐，用釘對伊的鬢邊釘入，透過土腳。伊就死。

22

彼時巴拉追西西拉，雅億出來迎接伊給伊講：「來啊，我用你所尋的人互你看。」伊就入去，看啊，西西拉已經死，倒，釘猶久佇伊的鬢邊。

23

按呢彼一日，上帝互迦南王耶賓屈服佇以色列人的面前。

24

對按呢以色列人益發有勢力，卡贏迦南王耶賓，到一盡滅迦南王耶賓。