利未記 第 12 章 - 台語漢字羅馬本

1
耶和華吩咐摩西講:
2
「你著吩咐以色列人講:若有婦仁人懷孕生查甫子,伊就無清氣七日,親像佇經期內垃墋的日無清氣一樣。
3
到第八日,彼個嬰仔著受割禮。
4
婦仁人猶流血,著踮佇伊的厝三十三日。清氣的日猶未滿,呣通摸聖的物,也呣通入聖的所在。
5
伊若生查某子,就無清氣二個七日,親像佇經期的時一樣,若猶流血,著踮佇伊的厝六十六日才清氣。
6
「佇伊清氣的日滿,無論是為查甫子抑是查某子,伊著用未滿年的羊仔做燒祭,一隻鴿仔子抑是一隻鳩鵻做贖罪祭,帶到會幕門口交代祭司。
7
祭司著獻佇耶和華的面前,為伊贖罪,伊的血源就清氣。這就是婦仁人生查甫子抑是生查某子的規例。
8
伊的氣力若無夠額通獻一隻羊仔,伊就著用二隻鳩鵻抑是二隻鴿仔子,一隻做燒祭,一隻做贖罪祭。祭司著替伊贖罪,伊就清氣。」

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!