利未記 第 9 章 - 台語漢字羅馬本

1

到第八日，摩西召亞倫及伊的子，以及以色列許個長老來，

2

對亞倫講：「你著取一隻細隻牛仔做贖罪祭，一隻綿羊做燒祭，著無瑕疵的，獻佇耶和華的面前。

3

你也著吩咐以色列人講：『恁著取一隻山羊做贖罪祭，閣取一隻牛仔子及一隻綿羊仔，攏著未滿年、閣著無瑕疵的，做燒祭，

4

閣取一隻牛，一隻綿羊做謝恩祭，獻佇耶和華的面前，及取調和油的素祭，因為今仔日耶和華欲顯現互恁看。』

5

就照摩西所命令的，帶到會幕前；會眾攏近倚來，徛佇耶和華的面前。

6

摩西講：「這是耶和華命令恁所著行的；耶和華的榮光就欲顯現互恁看。」

7

摩西對亞倫講：「你著到壇前，獻你的贖罪祭及你的燒祭，為本身及百姓贖罪，閣獻百姓的禮物，替贖罪；攏照耶和華所命令的。」

8

亞倫就到壇前，彼隻牛仔子為本身做贖罪祭的。

9

亞倫諸個子捧彼個血互伊，伊就用指頭仔搵血，抹佇壇頂許個角，閣用血倒佇壇腳裡。

10

獨獨贖罪祭的油及腰子，及肝裡的網紗，伊攏燒佇壇頂，照耶和華所命令摩西的；

11

伊閣用火將肉及皮燒佇營外。

12

就燒祭的精牲，亞倫諸個子捧血互伊，伊就灑佇壇頂的周圍，

13

閣用燒祭的肉一塊一塊連頭提互伊，伊攏燒佇壇頂；

14

伊閣洗臟腑及腿，燒佇壇頂燒祭的頂面。

15

伊帶百姓的禮物，將彼隻做百姓贖罪祭的山羊伊，為著罪來獻，及起頭的同一樣；

16

也帶燒祭，照例來獻。

17

伊閣帶素祭，對彼中間搣一把，這是佇早起時的燒祭以外。

18

閣牛及綿羊做百姓的謝恩祭。亞倫諸個子捧血互伊，伊就灑佇壇頂的周圍；

19

閣提牛的油及綿羊肥的尾，以及蓋臟腑的油及腰子，及肝裡的網紗；

20

將諸個油下佇許個胸的頂面，伊就將油燒佇壇頂。

21

諸個胸及正腿，亞倫用伊做搖祭，佇耶和華的面前搖伊；攏是照摩西所命令的。

22

亞倫向百姓抬起手，給祝福。伊已經獻贖罪祭、燒祭、謝恩祭就落來。

23

摩西、亞倫進入會幕，閣出來給百姓祝福，耶和華的榮光就顯現互眾百姓看見。

24

有火對耶和華的面前出來，燒壇頂的燒祭及油；眾百姓看見，就出大歡喜的聲，仆佇地裡。