詩篇 第 53 章 - 台語漢字羅馬本

1

〔大衛教示的詩，互樂官，調是用麻哈拉。〕戇人心內講：無有上帝。趁邪惡，行可惡的罪；無一人行好。

2

上帝對天俯落看世間人，欲看有明理的人，有尋求上帝的人抑無？

3

逐人攏退後，一概變做污穢；無人行好，連一個亦無。

4

做歹的人豈曉得嗎？吞食我的百姓親像食餅，亦無求叫上帝。

5

佇無通驚惶的所在就大大驚惶，因為上帝將彼個安營攻擊你的人的骨頭拍散。你互見誚，因為上帝棄拺。

6

願以色列的拯救對錫安出。上帝救伊受掠的百姓倒轉來，彼時雅各欲快樂，以色列欲歡喜。