歷代志上 第 15 章

1

(THR) Tāi-pı̍t chiū ūi ka-kī khí kúi-nā keng chhù tī Tāi-pı̍t ê siâⁿ; koh ūi Siōng-tè ê iok-kūi pī-pān chı̍t só͘-chāi kā i tah pò͘-pîⁿ.

(BCL) 大衛就為家己起幾若間厝佇大衛的城，閣為上帝的約櫃備辦一所在，給伊搭布棚。

2

(THR) Hit-sî Tāi-pı̍t kóng, Tû--khì Lī-bī lâng í-gōa, bô lâng thang kng Siōng-tè ê iok-kūi, in-ūi Iâ-hô-hoa kéng in kng Siōng-tè ê iok-kūi, koh ho̍k-sāi I tı̍t-kàu éng-óan.

(BCL) 彼時大衛講：「除去利未人以外，無人通扛上帝的約櫃；因為耶和華揀扛上帝的約櫃，閣服事伊直到永遠。」

3

(THR) Tāi-pı̍t chū-chı̍p Í-sek-lia̍t chèng-lâng kàu Iâ-lō͘-sat-léng, ài chiong Iâ-hô-hoa ê iok-kūi kng kàu i só͘ kā i pī-pān ê só͘-chāi.

(BCL) 大衛聚集以色列眾人到耶路撒冷，愛將耶和華的約櫃扛到伊所給伊備辦的所在。

4

(THR) Tāi-pı̍t koh chū-chı̍p A-lûn ê kiáⁿ-sun kap Lī-bī lâng.

(BCL) 大衛閣聚集亞倫的子孫及利未人。

5

(THR) Ko-hat ê kiáⁿ-sun tiong ū thâu-lâng, Ou-lia̍t, kap i ê hiaⁿ-tī chı̍t-pah jī-cha̍p lâng.

(BCL) 哥轄的子孫中有頭人烏列及伊的兄弟一百二十人。

6

(THR) Bí-la̍h-lī ê kiáⁿ-sun tiong ū thâu-lâng A-sòe-ngá, kap i ê hiaⁿ-tī nńg-pah jī-cha̍p lâng.

(BCL) 米拉利的子孫中有頭人亞帥雅及伊的兄弟二百二十人。

7

(THR) Kek-sūn ê kiáⁿ-sun tiong ū thâu-lâng Iok-jíⁿ, kap i ê hiaⁿ-tī chı̍t-pah saⁿ-cha̍p lâng.

(BCL) 革順的子孫中有頭人約珥及伊的兄弟一百三十人。

8

(THR) Í-lī-sat-hóan ê kiáⁿ-sun tiong ū thâu-lâng Sī-má-ngá, kap i ê hiaⁿ-tī nn̄g-pah lâng.

(BCL) 以利撒反的子孫中有頭人示瑪雅及伊的兄弟二百人。

9

(THR) Hi-pek-lûn kiáⁿ-sun tiong ū thâu-lâng Í-lia̍t, kap i ê hiaⁿ-tī poeh-cha̍p lâng.

(BCL) 希伯崙子孫中有頭人以列及伊的兄弟八十人。

10

(THR) Ou-siat ê kiáⁿ-sun tiong, ū thâu-lâng A-bí-ná-ta̍t, kap i ê hiaⁿ-tī chı̍t-pah cha̍p-jī lâng.

(BCL) 烏設的子孫中有頭人亞米拿達及伊的兄弟一百十二人。

11

(THR) Tāi-pı̍t tiàu chè-si Sat-tok kap A-pí-a-tha, í-kı̍p Lī-bī lâng Ou-lia̍t, A-sòe-ngá, Iok-jíⁿ, Sī-má-ngá, Í-lia̍t, A-bí-ná-ta̍t chiah ê lâng lâi.

(BCL) 大衛召祭司撒督及亞比亞他，以及利未人烏列、亞帥雅、約珥、示瑪雅、以列、亞米拿達諸個人來，

12

(THR) Tùi in kóng, Lín sī Lī-bī lâng ê cho̍k-tiúⁿ, lín kap lín ê hiaⁿ-tī tio̍h ka-kī chheng-khì, chiah thang chiong Iâ-hô-hoa Í-sek-lia̍t Siōng-tè ê iok-kūi, kng kàu góa só͘ kā i pī-pān ê só͘-chāi.

(BCL) 對講：「恁是利未人的族長，恁及恁的兄弟著家己清氣，才通將耶和華──以色列上帝的約櫃扛到我所給伊備辦的所在。

13

(THR) In-ūi lín chiông-chêng bô án-ni chòe, lán ê Siōng-tè Iâ-hô-hoa í-keng chek-ho̍at lán, in-ūi lán bô chiàu tiāⁿ-tio̍h ê lē chhē I.

(BCL) 因為恁從前無按呢做，咱的上帝──耶和華已經責罰咱，因為咱無照定著的例尋伊。」

14

(THR) Tùi án-ni chè-si kap Lī-bī lâng chheng-khì ka-kī, beh chiong Í-sek-lia̍t ê Siōng-tè Iâ-hô-hoa ê iok-kūi kng chiūⁿ--lâi.

(BCL) 對按呢祭司及利未人清氣家己，欲將以色列的上帝──耶和華的約櫃扛上來。

15

(THR) Lī-bī ê kiáⁿ-sun chiū ēng kǹg kng Siōng-tè ê iok-kūi tī keng-thâu-téng, chiàu Mô͘-se thàn Iâ-hô-hoa ê ōe só͘ bēng-lēng--ê.

(BCL) 利未的子孫就用槓，扛上帝的約櫃佇肩頭頂，照摩西趁耶和華的話所命令的。

16

(THR) Tāi-pı̍t kah Lī-bī ê cho̍k-tiúⁿ, hun-phài in chhiùⁿ-koa ê hiaⁿ-tī chok-ga̍k, ēng sek kap khîm kap nâ-po̍ah, hoaⁿ-hí chhut-siaⁿ lâi chhiùⁿ.

(BCL) 大衛教利未的族長，分派唱歌的兄弟作樂用瑟及琴及鐃鈸，歡喜出聲來唱。

17

(THR) Tùi án-ni, Lī-bī lâng hun-phài Iok-jíⁿ ê kiáⁿ Hi-bān, kap i hiaⁿ-tī tiong Pí-lī-ka ê kiáⁿ A-sat, kap in tâng-cho̍k ê hiaⁿ-tī Bí-la̍h-lī ê kiáⁿ-sun tiong Kó͘-sa-ngá ê kiáⁿ Í-thàm.

(BCL) 對按呢利未人分派約珥的子希幔及伊兄弟中比利家的子亞薩，及同族的兄弟米拉利的子孫中古沙雅的子以探。

18

(THR) Koh ū tē-jī pan ê hiaⁿ-tī Sat-ka-lī-ngá, Piān, Ngá-siat, Sī-bí-la̍h-bo̍at, Iâ-iat, Ou-nî, Í-lī-ap, Pí-ná-ngá, Má-se-ngá, Má-tha-thê-ngá, Í-lī-hui-lī-hō͘, Bî-khek-nî-ngá, kap kò͘-mn̂g ê Gô-pia̍t-í-tong kap Iâ-lī.

(BCL) 閣有第二班的兄弟撒迦利雅、便雅設、示米拉末、耶悅、烏尼、以利押、比拿雅、瑪西雅、瑪他提雅、以利斐利戶、彌克尼雅，及顧門者俄別以東及耶利。

19

(THR) Án-ni phài chhiùⁿ-koa ê Hi-bān, A-sat, Í-thàm, phah nâ-po̍ah chhut tōa-siaⁿ.

(BCL) 按呢，派唱歌者希幔、亞薩、以探拍鐃鈸出大聲；

20

(THR) Phài Sat-ka-lī-ngá, Ngá-siat, Sī-bí-la̍h-bo̍at, Iâ-iat, Ou-nî, Í-lī-ap, Má-se-ngá, Pí-ná-ngá, tôaⁿ-sek, i ê siaⁿ-im chheng-liāng.

(BCL) 派撒迦利雅、雅設、示米拉末、耶悅、烏尼，以利押、瑪西雅、比拿雅彈瑟，伊的聲音清亮；

21

(THR) Koh phài Má-tha-thê-ngá, Í-lī-hui-lī-hō͘, Bî-khek-nî-ngá, Gô-pia̍t-í-tong, Iâ-lī, A-sat-se-ngá, chòe-thâu tôaⁿ-khîm, tiāu ēng tē-poeh.

(BCL) 閣派瑪他提雅、以利斐利戶、彌克尼雅、俄別以東、耶利、亞撒西雅做頭彈琴，調用第八。

22

(THR) Lī-bī lâng ê thâu-lâng Ki-ná-nî-ngá sī kóan-lí chhiùⁿ-koa; koh kà lâng chhiùⁿ-koa, in-ūi i cheng-thong chit-ê.

(BCL) 利未人的頭人基拿尼雅是管理唱歌，閣教人唱歌，因為伊精通此個。

23

(THR) Pí-lī-ka, Í-lī-ka-ná, sī iok-kūi chêng kò͘-mn̂g--ê.

(BCL) 比利家、以利加拿是約櫃前顧門者。

24

(THR) Chè-si Si-pa-nî, Iok-sa-hoat, Ná-tàn-gia̍p, A-má-sài, Sat-ka-lī-ngá, Pí-ná-a, I-lī-í-siā, tī Siōng-tè ê iok-kūi chêng pûn hō-thâu; Gô-pia̍t-í-tong kap Iâ-hi-a iā sī iok-kūi chêng kò͘-mn̂g--ê.

(BCL) 祭司示巴尼、約沙法、拿單業、亞瑪賽、撒迦利雅、比拿亞、以利以謝佇上帝的約櫃前歕號頭。俄別以東及耶希亞也是約櫃前顧門者。

25

(THR) Tùi án-ni Tāi-pı̍t kap Í-sek-lia̍t ê tiúⁿ-ló kap chhian-chóng, lóng khì Gô-pia̍t-í-tong ê ke, hoaⁿ-hí kng Iâ-hô-hoa ê iok-kūi tùi hia chiūⁿ-lâi.

(BCL) 對按呢，大衛及以色列的長老，及千總攏去俄別以東的家歡喜扛耶和華的約櫃對遐上來。

26

(THR) Siōng-tè pang-chān kng Iâ-hô-hoa iok-kūi ê Lī-bī lâng, in chiū hiàn kang ê gû chhit-chiah, kang ê iûⁿ chhit-chiah.

(BCL) 上帝幫助扛耶和華約櫃的利未人，就獻公的牛七隻，公的羊七隻。

27

(THR) Tāi-pı̍t chhēng iù-tōe-pò͘ ê tn̂g-saⁿ; kng iok-kūi ê Lī-bī lâng, kap chhiùⁿ-koa ê, í-kı̍p kóan-lí chhiùⁿ-koa ê Ki-ná-nî-ngá, liân chhiùⁿ-koa ê lâng lóng sī án-ni; Tāi-pı̍t koh chhēng iù-tōe-pò͘ ê í-hut-tek.

(BCL) 大衛穿幼苧布的長衫，扛約櫃的利未人及唱歌者，以及管理唱歌的基拿尼雅，連唱歌的人攏是按呢；大衛閣穿幼苧布的以弗得。

28

(THR) Án-ni Í-sek-lia̍t chèng-lâng chhut tōa-siaⁿ, pûn sàu-kak, pûn hō-thâu, phah nâ-po̍ah, tôaⁿ-khîm kap sek, kng Iâ-hô-hoa ê iok-kūi chiūⁿ--lâi.

(BCL) 按呢，以色列眾人出大聲，歕哨角、歕號頭、拍鐃鈸、彈琴及瑟，扛耶和華的約櫃上來。

29

(THR) Iâ-hô-hoa ê iok-kūi kàu Tāi-pı̍t siâⁿ ê sî, Sò-lô ê cha-bó͘-kiáⁿ Bí-kah tùi thang-á-lāi teh-khòaⁿ, khòaⁿ-kìⁿ Tāi-pı̍t ông tiô-thiàu thiàu-bú; sim-lāi chiū khòaⁿ-khin i.

(BCL) 耶和華的約櫃到大衛城的時，掃羅的查某子米甲對窗仔內看，看見大衛王趒跳跳舞，心內就看輕伊。

Bible Color Mark

• 台語漢字羅馬本
• 巴克禮全羅