歷代志上 第 17 章

1

(THR) Tāi-pı̍t tiàm tī i ê kiong-lāi; Tāi-pı̍t tùi sian-ti Ná-tan kóng, Khòaⁿ ah, góa tiàm tī pek-hiuⁿ-chhâ ê kiong-lāi, chóng-sī Iâ-hô-hoa ê iok-kūi tī tiùⁿ-pâng lāi.

(BCL) 大衛踮佇伊的宮內，大衛對先知拿單講：「看啊，我踮佇柏香柴的宮內，總是耶和華的約櫃佇帳房內。」

2

(THR) Ná-tan kā Tāi-pı̍t kóng, Kìⁿ-nā tī lí sim-lāi só͘ siūⁿ--ê, thang kiâⁿ i, in-ūi Siōng-tè kap lí tī-teh.

(BCL) 拿單給大衛講：「見若佇你心內所想的通行伊，因為上帝及你佇。」

3

(THR) Hit-mî Siōng-tè ê ōe lîm-kàu Ná-tan kóng,

(BCL) 彼暝，上帝的話臨到拿單，講：

4

(THR) Lí khì kā Góa ê lô͘-po̍k Tāi-pı̍t kóng, Iâ-hô-hoa án-ni kóng, Lí bōe-tit-thang khí chhù hō͘ Góa tiàm.

(BCL) 「你去給我的奴僕大衛講，耶和華按呢講：『你得通起厝互我踮。

5

(THR) In-ūi tùi Góa chhōa Í-sek-lia̍t chiūⁿ-lâi ê jı̍t kàu kin-á-jı̍t, Góa bē-bat khiā-khí chhù-lāi, sī tùi chit ê pò͘-pîⁿ kàu hit ê pò͘-pîⁿ, tùi chit ê tiùⁿ-pâng kàu hit ê tiùⁿ-pâng.

(BCL) 因為對我導以色列上來的日到今仔日，我未曾徛起厝內，是對此個布棚到彼個布棚，對此個帳房到彼個帳房。

6

(THR) Kìⁿ-nā Góa kap Í-sek-lia̍t lâng só͘ kàu ê só͘-chāi, tī Góa só͘ hoan-hù chiàu-kò͘ Góa ê peh-sìⁿ Í-sek-lia̍t ê sū-su tiong, Góa kiám bat tùi in chı̍t-lâng kóng, Lí siáⁿ-sū bô kā Góa khí pek-hiuⁿ-chhâ ê chhù ah?

(BCL) 見若我及以色列人所到的所在，佇我所吩咐照顧我的百姓以色列的士師中，我豈曾對一人講：你啥事無給我起柏香柴的厝啊？』

7

(THR) Taⁿ lí tio̍h khì kā Góa ê lô͘-po̍k Tāi-pı̍t kóng, Bān-kun ê Iâ-hô-hoa án-ni kóng, Góa bat tī iûⁿ-tiâu, tùi lí teh kò͘-iûⁿ lâi tiàu lí, chòe Góa ê peh-sìⁿ Í-sek-lia̍t ê jîn-kun.

(BCL) 今你著去給我的奴僕大衛講，萬軍的耶和華按呢講：『我曾佇羊　對你顧羊來召你，做我的百姓以色列的人君。

8

(THR) Kìⁿ-nā lí só͘ bat khì ê só͘-chāi, Góa siông-siông kap lí tī-teh, tī lí ê bīn-chêng châu-bia̍t lí lóng-chóng ê tùi-te̍k; Góa beh hō͘ lí tōa chhut-miâ, chhin-chhiūⁿ tōe-chiūⁿ chiah ê úi-jîn ê miâ-siaⁿ.

(BCL) 見若你所曾去的所在，我常常及你佇，佇你的面前剿滅你攏總的對敵；我欲互你大出名，親像地上諸個偉人的名聲。

9

(THR) Koh Góa beh kā Góa ê peh-sìⁿ Í-sek-lia̍t tiāⁿ-tio̍h chı̍t ê só͘-chāi, lâi chai-pôe in, hō͘ in khiā-khí ka-kī ê só͘-chāi, bô koh chhian-sóa; hiong-ok ê lâng iā bô chhin-chhiūⁿ khí-thâu hām-hāi in;

(BCL) 閣我欲給我的百姓以色列定著一個所在，來栽培，互徛起家己的所在，無閣遷徙；兇惡的人也無親像起頭陷害，

10

(THR) ia̍h bô chhin-chhiūⁿ Góa bēng-lēng sū-su tī-lí Góa ê peh-sìⁿ Í-sek-lia̍t ê sî chı̍t-iūⁿ; Góa beh hō͘ lí ê tùi-te̍k lóng hâng-ho̍k. Koh góa kā lí kóng, Iâ-hô-hoa beh kā lí kiàn-lı̍p chı̍t ê ke.

(BCL) 亦無親像我命令士師治理我的百姓以色列的時一樣。我欲互你的對敵攏降服，閣我給你講，耶和華欲給你建立一個家。

11

(THR) Kàu lí ê jı̍t-chí móa-chiok, tò-khì lí ê lia̍t-chó͘ hia, Góa beh hō͘ lí ê hō͘-è sòa-chiap lí ê ūi; Góa iā beh kian-kò͘ i ê kok-ūi.

(BCL) 到你的日子滿足倒去你的列祖遐，我欲互你的後裔續接你的位，我也欲堅固伊的國位。

12

(THR) I beh kā Góa khí chhù; Góa beh kian-kò͘ i ê chō-ūi kàu éng-óan.

(BCL) 伊欲給我起厝；我欲堅固伊的座位到永遠。

13

(THR) Góa beh chòe i ê Pē, i beh chòe Góa ê kiáⁿ; Góa bô beh hō͘ Góa ê chû-ài lī-khui i, chhin-chhiūⁿ Góa chêng hō͘ i lī-khui hit ê lí í-chiūⁿ ê ông.

(BCL) 我欲做伊的父，伊欲做我的子；我無欲互我的慈愛離開伊，親像我前互伊離開彼個你以上的王。

14

(THR) Góa iā beh éng-óan kian-kò͘ i tī Góa ê ke, tī Góa ê kok; i ê chō-ūi iā beh kian-kò͘ kàu éng-óan.

(BCL) 我也欲永遠堅固伊佇我的家佇我的國；伊的座位也欲堅固到永遠。』」

15

(THR) Ná-tan chiū chiàu chiah ê ōe, chiah ê be̍k-sī, khì kā Tāi-pı̍t kóng.

(BCL) 拿單就照諸個話，諸個默示，去給大衛講。

16

(THR) Tāi-pı̍t ông chiū jı̍p-khì, chē tī Iâ-hô-hoa ê bīn-chêng, kóng, Iâ-hô-hoa Siōng-tè ah, góa sī sím-mı̍h lâng, góa sī sím-mı̍h hō ê ke, Lí chiah chhōa góa kàu chit ê tē-pō͘ ah?

(BCL) 大衛王就入去，坐佇耶和華的面前，講：「耶和華上帝啊，我是甚麼人，我是甚麼號的家，你才導我到此個地步啊？

17

(THR) Siōng-tè ah, Lí khòaⁿ chit-ê, iáu lia̍h-chòe sió-khóa, in-ūi Lí koh lūn-kàu Lí ê lô͘-po̍k ê ke kàu tī kú-tn̂g; Iâ-hô-hoa Siōng-tè ah, Lí khóan-thāi góa chhin-chhiūⁿ chun-kùi ê lâng ê tē-ūi.

(BCL) 上帝啊，你看此個，猶掠做小可，因為你閣論到你的奴僕的家到佇久長。耶和華上帝啊，你款待我親像尊貴的人的地位。

18

(THR) Tāi-pı̍t iáu ū sím-mı̍h ōe thang tùi Lí kóng kàu Lí ê lô͘-po̍k só͘ tit-tio̍h ê chun-kùi? in-ūi Lí chai Lí ê lô͘-po̍k.

(BCL) 大衛猶有甚麼話通對你講？到你的奴僕所得著的尊貴？因為你知你的奴僕。

19

(THR) Iâ-hô-hoa ah, in-ūi Lí ê lô͘-po̍k ê iân-kò͘, koh chiàu Lí ê sim-ì, Lí ū kiâⁿ chit ê tōa-sū, koh hián-chhut chiah ê tōa-sū.

(BCL) 耶和華啊，因為你的奴僕的緣故，閣照你的心意，你有行此個大事，閣顯出諸個大事。

20

(THR) Iâ-hô-hoa ah, chiàu góan ê hī-khang só͘ thiaⁿ-kìⁿ--ê, bô chı̍t-ê chhin-chhiūⁿ Lí, Lí í-gōa bô pa̍t ê Siōng-tè.

(BCL) 耶和華啊，照我的耳孔所聽見的，無一個親像你，你以外無別個上帝。

21

(THR) Tōe-chiūⁿ ū toh-lo̍h chı̍t-kok chhin-chhiūⁿ Lí ê peh-sìⁿ Í-sek-lia̍t, chiū-sī Siōng-tè chá-jı̍t khì kiù-sio̍k i chòe ka-kī ê peh-sìⁿ, hō͘ Lí tùi ke̍k-tōa koh thang kiaⁿ ê sū tit-tio̍h miâ, in-ūi kóaⁿ-tio̍k lia̍t-kok lī-khui Lí ê peh-sìⁿ, chiū-sī Lí só͘ kiù-sio̍k chhut Ai-kı̍p--ê, ê bīn-chêng.

(BCL) 地上有叨落一國親像你的百姓以色列？就是上帝早日去救贖伊做家己的百姓，互你對極大閣通驚的事得著名，因為趕逐列國離開你的百姓，就是你所救贖出埃及者的面前。

22

(THR) In-ūi Lí hō͘ Lí ê peh-sìⁿ Í-sek-lia̍t chòe Lí ê peh-sìⁿ, tı̍t-kàu éng-óan; Iâ-hô-hoa ah, Lí iā chòe in ê Siōng-tè.

(BCL) 因為你互你的百姓以色列做你的百姓，直到永遠；耶和華啊，你也做的上帝。

23

(THR) Iâ-hô-hoa ah, taⁿ Lí só͘ lūn-kàu Lí ê lô͘-po̍k kap i ê ke ê ōe, gōan i kian-kò͘ kàu éng-óan; kiû Lí chiàu Lí só͘ kóng lâi kiâⁿ.

(BCL) 耶和華啊，今你所論到你的奴僕及伊的家的話，願伊堅固，到永遠，求你照你所講來行。

24

(THR) Gōan Lí ê miâ éng-óan kian-kò͘, siū chun chòe-tōa, kóng, Bān-kun ê Iâ-hô-hoa sī Í-sek-lia̍t ê Siōng-tè, sī chòe Í-sek-lia̍t ê Siōng-tè; Lí ê lô͘-po̍k Tāi-pı̍t ê ke beh tī Lí ê bīn-chêng kian-kò͘.

(BCL) 願你的名永遠堅固，受尊做大，講：『萬軍的耶和華是以色列的上帝，是做以色列的上帝。』你的奴僕大衛的家欲佇你的面前堅固。

25

(THR) Góa ê Siōng-tè ah, in-ūi Lí ū khé-sī Lí ê lô͘-po̍k chai, Lí beh kā i kiàn-lı̍p chı̍t ê ke, só͘-í Lí ê lô͘-po̍k hó-táⁿ tī Lí ê bīn-chêng kî-tó.

(BCL) 我的上帝啊，因為你有啟示你的奴僕知，你欲給伊建立一個家，所以你的奴僕好膽佇你的面前祈禱。

26

(THR) Iâ-hô-hoa ah, chí-ū Lí sī Siōng-tè; Lí ēng chit ê hok-khì èng-ún Lí ê lô͘-po̍k.

(BCL) 耶和華啊，只有你是上帝，你用此個福氣應允你的奴僕。

27

(THR) Taⁿ Lí hoaⁿ-hí sù-hok Lí ê lô͘-po̍k ê ke, hō͘ i éng-óan tī Lí ê bīn-chêng. Iâ-hô-hoa ah, in-ūi Lí í-keng sù-hok, tek-khak éng-óan tit-tio̍h hok-khì.

(BCL) 今你歡喜賜福你的奴僕的家，互伊永遠佇你的面前。耶和華啊，因為你已經賜福，的確永遠得著福氣。」

Bible Color Mark

• 台語漢字羅馬本
• 巴克禮全羅