歷代志上 第 22 章

1

(THR) Tāi-pı̍t kóng, Che sī Iâ-hô-hoa Siōng-tè ê chhù; chit-ê sī Í-sek-lia̍t sio-chè ê tôaⁿ.

(BCL) 大衛講：「這是耶和華上帝的厝，此個是以色列燒祭的壇。」

2

(THR) Tāi-pı̍t bēng-lēng chū-chı̍p khiā-khí Í-sek-lia̍t tōe ê chhut-gōa lâng; koh phài phah-chio̍h ê sai-hū phah-chio̍h; ài beh khí Siōng-tè ê tiān.

(BCL) 大衛命令聚集徛起以色列地的出外人，閣派拍石的師傅拍石，愛欲起上帝的殿。

3

(THR) Tāi-pı̍t pī-pān thih chin-chōe, chòe mn̂g-sìⁿ ê teng kap saⁿ-liân ê lō͘-ēng; koh pī-pān tâng chin-chōe, kàu bōe chhìn--tit.

(BCL) 大衛備辦鐵真多做門扇的釘及相連的路用，閣備辦銅真多，到秤得；

4

(THR) Ia̍h pī-pān bōe-sǹg--tit ê pek-hiuⁿ-chhâ; in-ūi Se-tùn lâng kap Chhui-lô lâng chài chōe-chōe pek-hiuⁿ-chhâ kàu Tāi-pı̍t hia.

(BCL) 亦備辦算得的柏香柴，因為西頓人及推羅人載多多柏香柴到大衛遐。

5

(THR) Tāi-pı̍t kóng, Góa ê kiáⁿ Só͘-lô-bûn iáu-kú sòe-hàn koh nńg-chiáⁿ; beh kā Iâ-hô-hoa khí ê tiān tio̍h chin súi kàu-ke̍k, hō͘ i miâ-siaⁿ êng-kng kàu tī bān-kok; só͘-í góa taⁿ tio̍h kā i pī-pān. Tāi-pı̍t chiū tī bē sí ê tāi-seng pī-pān chōe-chōe chhâi-liāu.

(BCL) 大衛講：「我的子所羅門猶久細漢閣軟茈，欲給耶和華起的殿著真娞到極，互伊名聲榮光到佇萬國，所以我今著給伊備辦。」大衛就佇未死的代先備辦多多材料。

6

(THR) Tāi-pı̍t chiū kiò i ê kiáⁿ Só͘-lô-bûn lâi, hoan-hù i tio̍h kā Í-sek-lia̍t ê Siōng-tè khí tiān.

(BCL) 大衛就叫伊的子所羅門來，吩咐伊著給以色列的上帝起殿，

7

(THR) Kā Só͘-lô-bûn kóng, Góa ê kiáⁿ ah, góa sim-lāi pún siūⁿ, beh ūi Iâ-hô-hoa góa ê Siōng-tè ê miâ khí tiān.

(BCL) 給所羅門講：「我的子啊，我心內本想欲為耶和華──我的上帝的名起殿，

8

(THR) Chóng-sī Iâ-hô-hoa ê ōe lîm-kàu góa kóng, Lí lâu chōe-chōe lâng ê huih, tōa-tōa kau-chiàn, lí bōe-tit-thang ūi Góa ê miâ khí tiān, in-ūi lí tī Góa ê ba̍k-chiu chêng hō͘ chōe-chōe lâng ê huih lâu tī tōe--nih.

(BCL) 總是耶和華的話臨到我講：『你流多多人的血，大大交戰，你得通為我的名起殿，因為你佇我的目睭前互多多人的血流佇地裡。

9

(THR) Khòaⁿ ah, lí beh siⁿ chı̍t ê kiáⁿ, i beh chòe thài-pêng ê lâng, Góa beh hō͘ i thài-pêng, hō͘ sì-ûi chiah ê tùi-te̍k bô kiáu-jiáu i; i ê miâ beh kiò Só͘-lô-bûn; tī i chē-ūi ê jı̍t, Góa beh siúⁿ-sù an-chēng hô-pêng hō͘ Í-sek-lia̍t.

(BCL) 看啊，你欲生一個子，伊欲做太平的人；我欲互伊太平，互四圍諸個對敵無攪擾伊。伊的名欲叫所羅門。佇伊坐位的日，我欲賞賜安靜和平互以色列。

10

(THR) I beh ūi Góa ê miâ khí tiān; i beh chòe Góa ê kiáⁿ, Góa beh chòe i ê pē; Góa beh kian-kò͘ i ê kok-ūi tī Í-sek-lia̍t kàu éng-óan.

(BCL) 伊欲為我的名起殿。伊欲做我的子；我欲做伊的父。我欲堅固伊的國位，佇以色列到永遠。』

11

(THR) Góa ê kiáⁿ ah, taⁿ gōan Iâ-hô-hoa kap lí tī-teh, hō͘ lí heng-thong, khí lí ê Siōng-tè Iâ-hô-hoa ê tiān, chiàu I só͘ lūn-kàu lí--ê.

(BCL) 我的子啊，今願耶和華及你佇，互你亨通，起你的上帝──耶和華的殿，照伊所論到你者。

12

(THR) To̍k-to̍k gōan Iâ-hô-hoa siúⁿ-sù lí chhang-miâ tì-hūi, hō͘ lí tī-lí Í-sek-lia̍t, lâi chun-thàn Iâ-hô-hoa lí ê Siōng-tè ê lu̍t-hoat.

(BCL) 獨獨願耶和華賞賜你聰明智慧，互你治理以色列，來遵趁耶和華──你的上帝的律法。

13

(THR) Lí nā kín-sīn chun-thàn Iâ-hô-hoa só͘ bēng-lēng Mô͘-se kà-sī Í-sek-lia̍t chiah ê lu̍t-lē hoat-tō͘, chiū lí beh heng-thong; lí tio̍h hùn-chì hó-táⁿ, bo̍h-tit kiaⁿ bo̍h-tit lún.

(BCL) 你若謹慎遵趁耶和華所命令摩西教示以色列諸個律例法度，就你欲亨通。你著奮志好膽，莫得驚，莫得。

14

(THR) Góa tī khùn-khó͘ tiong, ūi Iâ-hô-hoa ê tiān, pī-pān kim cha̍p-bān tha-liân-tek, gûn chı̍t-pah-bān tha-liân-tek, tâng kap thih tāng kàu bōe chhìn--tit, in-ūi chin-chōe; góa iā ū pī-pān chhâ kap chio̍h, lí thang koh ke-thiⁿ i.

(BCL) 我佇困苦中為耶和華的殿備辦金十萬他連得，銀一百萬他連得，銅及鐵重到秤得，因為真多；我也有備辦柴及石，你通閣加添伊。

15

(THR) Koh lí iā ū chōe-chōe sai-hū, phah-chio̍h--ê, chòe-ba̍k--ê, kap ta̍k-hō kang-tiâⁿ-su, thang chòe ta̍k-hō ê kang.

(BCL) 閣你也有多多師傅、拍石者、做木者，及逐號工程師，通做逐號的工。

16

(THR) Kim, gûn, tâng, thih, chōe kàu bōe sǹg--tit; lí tio̍h khí-lâi chòe; gōan Iâ-hô-hoa kap lí tī-teh.

(BCL) 金銀銅鐵多到算得。你著起來做，願耶和華及你佇。」

17

(THR) Tāi-pı̍t koh hoan-hù Í-sek-lia̍t ê chèng siú-léng pang-chān i ê kiáⁿ Só͘-lô-bûn, kóng,

(BCL) 大衛閣吩咐以色列的眾首領幫助伊的子所羅門，講：

18

(THR) Iâ-hô-hoa lín ê Siōng-tè kiám bô kap lín tī-teh mah? kiám bô tī sì-ûi siúⁿ-sù lín pêng-an mah? in-ūi I í-keng chiong chit ê tōe khiā-khí ê peh-sìⁿ kau tī góa ê chhiú, chit ê tōe chiū hâng-ho̍k tī Iâ-hô-hoa kap I ê peh-sìⁿ ê bīn-chêng.

(BCL) 「耶和華──恁的上帝豈無及恁佇嗎？豈無佇四圍賞賜恁平安嗎？因為伊已經將此個地徛起的百姓交佇我的手，此個地就降服佇耶和華及伊的百姓的面前。

19

(THR) Taⁿ lín tio̍h tiāⁿ-tio̍h lín ê sim, lín ê ì-sù, chhē Iâ-hô-hoa lín ê Siōng-tè; ia̍h tio̍h khí--lâi, khí-chō Iâ-hô-hoa Siōng-tè ê sèng-só͘, thang chiong Iâ-hô-hoa ê iok-kūi, kap Siōng-tè sèng ê khì-kū, poaⁿ-jı̍p ūi Iâ-hô-hoa ê miâ só͘ beh khí ê tiān.

(BCL) 今恁著定著恁的心恁的意思，尋耶和華──恁的上帝；亦著起來起造耶和華上帝的聖所，通將耶和華的約櫃及上帝聖的器具搬入為耶和華的名所欲起的殿。」

Bible Color Mark

• 台語漢字羅馬本
• 巴克禮全羅