歷代志上 第 28 章

1

(THR) Tāi-pı̍t chio-chı̍p Í-sek-lia̍t ê siú-léng, kok chi-phài ê siú-léng, kap lûn-pan ho̍k-sāi ông ê kun-tiúⁿ, chhian-chóng, pé-chóng, chiáng-kóan ông kap ông ê kiáⁿ ê sán-gia̍p cheng-siⁿ--ê, kap thài-kàm, í-kı̍p tōa kôan-lêng ê, kap tōa kôan-lêng ê ióng-sū, lóng kàu Iâ-lō͘-sat-léng.

(BCL) 大衛招集以色列的首領各支派的首領及輪班服事王的軍長，千總、百總、掌管王及王的子的產業精牲者，及太監，以及大權能的，及大權能的勇士，攏到耶路撒冷。

2

(THR) Tāi-pı̍t ông chiū khiā--khí-lâi kóng, Góa ê hiaⁿ-tī, góa ê peh-sìⁿ ah, lín tio̍h thiaⁿ góa ê ōe; góa ê sim pún siūⁿ beh ūi-tio̍h Iâ-hô-hoa ê iok-kūi, koh ūi-tio̍h lán ê Siōng-tè ê kha-ta̍h-í, khí tiān lâi an-tì i; góa í-keng pī-pān beh khí.

(BCL) 大衛王就徛起來，講：「我的兄弟，我的百姓啊，恁著聽我的話，我的心本想欲為著耶和華的約櫃，閣為著咱的上帝的腳踏椅；起殿來安置伊；我已經備辦欲起。

3

(THR) Chóng-sī Siōng-tè tùi góa kóng, Lí bōe-tit-thang ūi Góa ê miâ khí tiān, in-ūi lí sī chiàn-sū, ū hō͘ lâng lâu-huih.

(BCL) 總是上帝對我講：『你得通為我的名起殿；因為你是戰士，有互人流血。』

4

(THR) M̄-kú Iâ-hô-hoa Í-sek-lia̍t ê Siōng-tè, tī góa ê pē chôan-ke kéng góa chòe Í-sek-lia̍t ông tı̍t-kàu éng-óan; in-ūi I kéng Iû-tāi chòe siú-léng; tī Iû-tāi ê chi-phài tiong kéng góa ê pē ê ke; tī góa ê pē ê chèng-kiáⁿ tiong hoaⁿ-hí góa, siat-lı̍p góa chòe Í-sek-lia̍t chèng-lâng ê ông.

(BCL) 呣拘，耶和華──以色列的上帝佇我的父全家揀我做以色列王，直到永遠。因為伊揀猶大做首領；佇猶大的支派中揀我的父的家，佇我的父的眾子中歡喜我，設立我做以色列眾人的王。

5

(THR) Iâ-hô-hoa siúⁿ-sù góa chōe-chōe kiáⁿ, tī góa ê kiáⁿ ê tiong-kan, kéng góa ê kiáⁿ Só͘-lô-bûn, tī Iâ-hô-hoa ê kok chē-ūi, tī-lí Í-sek-lia̍t.

(BCL) 耶和華賞賜我多多子，佇我的子的中間揀我的子所羅門佇耶和華的國坐位，治理以色列。

6

(THR) I koh tùi góa kóng, Lí ê kiáⁿ Só͘-lô-bûn beh khí Góa ê tiān Góa ê īⁿ; in-ūi Góa kéng i chòe Góa ê kiáⁿ, Góa iā beh chòe i ê pē.

(BCL) 伊閣對我講：『你的子所羅門欲起我的殿我的院；因為我揀伊做我的子，我也欲做伊的父。

7

(THR) I nā kú-tn̂g chun-thàn Góa ê kài-bēng hoat-tō͘, chhin-chhiūⁿ kin-á-jı̍t, Góa chiū beh kian-kò͘ i ê kok-ūi, tı̍t-kàu éng-óan.

(BCL) 伊若久長遵趁我的誡命法度親像今仔日，我就欲堅固伊的國位，直到永遠。』

8

(THR) Taⁿ tī Iâ-hô-hoa ê hōe, Í-sek-lia̍t chèng-lâng ê bīn-chêng, lán ê Siōng-tè iā thiaⁿ-kìⁿ, lín tio̍h chhâ-khó lín ê Siōng-tè Iâ-hô-hoa ê kài-bēng lâi chip-siú i; án-ni lín thang hióng-siū chit ê hó ê tōe, lâu hō͘ lín āu-tāi ê kiáⁿ-sun, éng-óan chòe-gia̍p.

(BCL) 今佇耶和華的會，以色列眾人的面前，咱的上帝也聽見。恁著查考恁的上帝──耶和華的誡命，來執守伊，按呢恁通享受此個好的地，留互恁後代的子孫，永遠做業。

9

(THR) Góa ê kiáⁿ Só͘-lô-bûn ah, lí tio̍h jīn-bat lí ê pē ê Siōng-tè, sêng-sı̍t sim hoaⁿ-hí ho̍k-sāi I; in-ūi Iâ-hô-hoa kàm-chhat chèng-lâng ê sim, chai lóng-chóng ê sim-su liām-thâu; lí nā chhē I, I beh hō͘ lí tú-tio̍h; lí nā pàng-sak I, I beh éng-óan kū-cho̍at lí;

(BCL) 「我的子所羅門阿，你著認識你的父的上帝，誠實心歡喜服事伊；因為耶和華鑑察眾人的心，知攏總的心思念頭。你若尋伊，伊欲互你抵著；你若放拺伊，伊欲永遠拒絕你。

10

(THR) lí tio̍h kín-sīn, in-ūi Iâ-hô-hoa kéng lí khí chhù chòe sèng-só͘; lí tio̍h ióng-kám khì chòe.

(BCL) 你著謹慎，因為耶和華揀你起厝做聖所。你著勇敢去做。」

11

(THR) Tāi-pı̍t chiong tiān-tn̂g ê léng-lông, pâng-keng, hú-khò͘, lâu-koh, lāi-tiān, kap Si-un-só͘ hit-keng, it-chhè ê tô͘-iūⁿ, kau i ê kiáⁿ Só͘-lô-bûn;

(BCL) 大衛將殿堂的兩廊、房間、府庫、樓閣、內殿，及施恩所彼間一切的圖樣交伊的子所羅門，

12

(THR) koh ēng tùi Sîn só͘ tit-tio̍h it-chhè ê tô͘-iūⁿ, chiū-sī Iâ-hô-hoa tiān ê īⁿ, sì-ûi ê pâng, Siōng-tè tiān ê hú-khò͘, kap sèng-mı̍h ê hú-khò͘ chiah ê tô͘-iūⁿ, lóng kau i;

(BCL) 閣用對神所得著一切的圖樣，就是耶和華殿的院、四周的房、上帝殿的府庫，及聖物的府庫諸個圖樣攏交伊；

13

(THR) koh chí-sī i chè-si kap Lī-bī lâng ê pan-lia̍t, kap Iâ-hô-hoa tiān-lāi ho̍k-sāi ê kang, í-kı̍p Iâ-hô-hoa tiān-lāi ho̍k-sāi ê khì-kū;

(BCL) 閣指示伊祭司及利未人的班列及耶和華殿內服事的工，以及耶和華殿內服事的器具，

14

(THR) koh chhìn kim hō͘ i chòe ta̍k-iūⁿ èng-iōng ê kim-khì; ia̍h chhìn gûn hō͘ i, chòe ta̍k-iūⁿ èng-iōng ê gûn-khì;

(BCL) 閣秤金互伊做逐樣應用的金器，亦秤銀互伊做逐樣應用的銀器，

15

(THR) chiū-sī chiah ê kim teng-tâi kap i ê chóaⁿ, chiū chhìn kim lâi chòe ta̍k ê teng-tâi kap i ê chóaⁿ, koh ēng chòe gûn teng-tâi ê gûn lâi chhìn hō͘ i; i ê teng-tâi kap i ê chóaⁿ lóng sī án-ni, chiàu ta̍k ê teng-tâi ê lō͘-ēng;

(BCL) 就是諸個金燈台及伊的盞，就秤金來做逐個燈台及伊的盞，閣用做銀燈台的銀來秤互伊，伊的燈台及伊的盞攏是按呢，照逐個燈台的路用；

16

(THR) koh chhìn kim hō͘ i lâi chòe pâi-lia̍t piáⁿ ê toh; ia̍h chhìn gûn lâi chòe gûn ê toh;

(BCL) 閣秤金互伊來做排列餅的桌，亦秤銀來做銀的桌，

17

(THR) koh ēng hó-kim hō͘ i chòe bah-chhe, pôaⁿ, poe; koh chhìn kim, hō͘ i thang chòe ta̍k ê kim-óaⁿ, chhìn gûn hō͘ i chòe ta̍k ê gûn-óaⁿ;

(BCL) 閣用好金互伊做肉叉、盤、杯，閣秤金互伊通做逐個金碗，秤銀互伊做逐個銀碗，

18

(THR) koh chhìn hó-kim hō͘ i thang chòe hiuⁿ-tôaⁿ; ia̍h ēng kim chòe ki-lō͘-peng chhia ê khóan-sit, in thí-khui sı̍t, jia-khàm Iâ-hô-hoa ê iok-kūi.

(BCL) 閣秤好金互伊通做香壇，亦用金做兵車的款式；展開翅，遮蓋耶和華的約櫃。

19

(THR) Tāi-pı̍t kóng, Téng-bīn chiah ê kui-bô͘, lóng sī góa tit-tio̍h Iâ-hô-hoa be̍k-sī siá chhut-lâi--ê.

(BCL) 大衛講：「頂面諸個規模攏是我得著耶和華默示寫出來的。」

20

(THR) Tāi-pı̍t koh kā i ê kiáⁿ Só͘-lô-bûn kóng, Lí tio̍h ióng-kám chòng-táⁿ khì chòe; bo̍h-tit lún, ia̍h bo̍h-tit kiaⁿ; in-ūi Iâ-hô-hoa Siōng-tè, chiū-sī góa ê Siōng-tè, kap lí tī-teh; I tek-khak bô lī-khui lí, ia̍h bô pàng-sak lí, tı̍t-kàu Iâ-hô-hoa tiān ê kang lóng bêng-pe̍k.

(BCL) 大衛閣給伊的子所羅門講：「你著勇敢壯膽去做！莫得，亦莫得驚。因為耶和華上帝就是我的上帝，及你佇；伊的確無離開你，亦無放拺你，直到耶和華殿的工攏明白。

21

(THR) Khòaⁿ ah, ū chè-si kap Lī-bī lâng ê ta̍k-pan, ūi-tio̍h beh pān-lí Siōng-tè tiān ta̍k-hāng ê sū; koh ū kî-khiáu ê lâng, tī ta̍k-hāng ê kang hoaⁿ-hí pang-chān lí; ia̍h ū chiah ê siú-léng kap chèng peh-sìⁿ chı̍t-sim thiaⁿ-thàn lí ê bēng-lēng.

(BCL) 看啊，有祭司及利未人的逐班，為著欲辦理上帝殿逐項的事，閣有奇巧的人佇逐項的工歡喜幫助你；亦有諸個首領及眾百姓一心聽趁你的命令。」

Bible Color Mark

• 台語漢字羅馬本
• 巴克禮全羅