約翰一書 第 2 章

1

(THR) Góa ê sòe-kiáⁿ ah, góa siá chiah-ê hō͘ lín, sī beh hō͘ lín bô hōan chōe. Nā ū lâng hōan chōe, chiū tī Pē ê bīn-chêng lán ū Pó-hūi-su, chiū-sī gī-lâng Iâ-so͘ Ki-tok;

(BCL) 我的細子啊，我寫諸個互恁，是欲互恁無犯罪。若有人犯罪，就佇父的面前咱有保惠師，就是義人耶穌基督。

2

(THR) I ūi-tio̍h lán ê chōe, chòe bán-hôe ê chè; koh m̄ nā ūi-tio̍h lán ê chōe, iā sī ūi-tio̍h thong sè-kan.

(BCL) 伊為著咱的罪做挽回的祭，閣呣若為著咱的罪，也是為著通世間。

3

(THR) Lán nā siú I ê bēng-lēng, tùi án-ni chiū chai lán bat I.

(BCL) 咱若守伊的命令，對按呢就知咱識伊。

4

(THR) Lâng nā kóng, góa bat I, iā bô siú I ê bēng-lēng, sī pe̍h-chha̍t ê lâng, chin-lí iā bô tiàm tī i;

(BCL) 人若講「我識伊」，也無守伊的命令，是白賊的人，真理也無佇伊。

5

(THR) kìⁿ-nā siú I ê tō-lí ê, chiū Siōng-tè ê thiàⁿ tī i chin-chiàⁿ ū chiâu-chn̂g. Tùi án-ni lán chai lán tiàm tī I;

(BCL) 見若守伊的道理的，就上帝的疼佇伊真正有齊全。對按呢，咱知咱佇伊。

6

(THR) lâng nā ka-kī kóng tiàm tī I, chiū tio̍h chiàu I só͘ kiâⁿ ê khì kiâⁿ.

(BCL) 人若家己講佇伊，就著照伊所行的去行。

7

(THR) Só͘ thiàⁿ ê hiaⁿ-tī ah, góa bô siá sin ê bēng-lēng hō͘ lín, chiū-sī lín tùi khí-thâu só͘ ū kū ê bēng-lēng; hit ê kū ê bēng-lēng chiū-sī lín só͘ bat thiaⁿ-kìⁿ ê tō-lí.

(BCL) 所疼的兄弟啊，我無寫新的命令互恁，就是恁對起頭所有舊的命令；彼個舊的命令就是恁所曾聽見的道理。

8

(THR) Iū-koh góa siá sin ê bēng-lēng hō͘ lín, chit ê tāi-chì tī I sī chin, tī lín iā sī chin; in-ūi o͘-àm teh kè, chin kng í-keng teh chiò.

(BCL) 又閣，我寫新的命令互恁，此個代誌佇伊是真，佇恁也是真；因為黑暗過，真光已經照。

9

(THR) Lâng nā kóng ka-kī tiàm tī kng-bêng, iā òan-hūn i ê hiaⁿ-tī, chiū i kàu taⁿ sī tiàm tī o͘-àm.

(BCL) 人若講家己佇光明，也怨恨伊的兄弟，就伊到今是佇黑暗。

10

(THR) Lâng nā thiàⁿ i ê hiaⁿ-tī, i sī khiā-khí tī kng, iā tī i bô po̍ah-tó ê in-iû.

(BCL) 人若疼伊的兄弟，伊是徛起佇光，也佇伊無跋倒的因由。

11

(THR) To̍k-to̍k lâng nā òan-hūn i ê hiaⁿ-tī, i sī tiàm tī àm, koh kiâⁿ tī àm, iā m̄ chai só͘ khì ê, in-ūi chit ê àm hō͘ i ê ba̍k-chiu chhiⁿ-mî.

(BCL) 獨獨人若怨恨伊的兄弟，伊是佇暗，閣行佇暗，也呣知所去的，因為此個暗互伊的目睭睛暝。

12

(THR) Sòe-kiáⁿ ah, góa siá phoe hō͘ lín, in-ūi lín ê chōe ūi-tio̍h I ê miâ í-keng sià-bián.

(BCL) 細子啊，我寫批互恁，因為恁的罪為著伊的名已經赦免。

13

(THR) Lāu-tōa ah, góa siá hō͘ lín, in-ūi lín bat hit ê tùi khí-thâu chiū ū ê. Siàu-liân lâng ah, góa siá hō͘ lín, in-ūi lín í-keng khah-iâⁿ hit ê pháiⁿ ê. Sòe-kiáⁿ ah, góa bat siá hō͘ lín, in-ūi lín bat Pē.

(BCL) 老大啊，我寫互恁，因為恁識彼個對起頭就有的。少年人啊，我寫互恁，因為恁已經卡贏彼個歹者。細子啊，我曾寫互恁，因為恁識父。

14

(THR) Lāu-tōa ah, góa bat siá hō͘ lín, in-ūi lín bat hit ê tùi khí-thâu chiū ū ê. Siàu-liân lâng ah, góa bat siá hō͘ lín, in-ūi lín ióng-kiāⁿ, iā Siōng-tè ê tō-lí tiàm tī lín, iā lín í-keng khah-iâⁿ hit ê pháiⁿ ê.

(BCL) 老大啊，我曾寫互恁，因為恁識彼個對起頭就有的。少年人啊，我曾寫互恁；因為恁勇健，也上帝的道理佇恁；也恁已經卡贏彼個歹者。

15

(THR) Bo̍h-tit thiàⁿ chit ê sè-kan, í-kı̍p sè-kan ê mı̍h. Lâng nā thiàⁿ chit sè-kan, chiū Pē ê thiàⁿ bô tiàm tī i.

(BCL) 莫得疼此世間以及世間的物。人若疼此世間，就父的疼無佇伊。

16

(THR) In-ūi kìⁿ-nā tī sè-kan ê, jio̍k-thé ê su-io̍k, kap ba̍k-chiu ê su-io̍k, kap jîn-seng ê kiau-ngō͘, m̄ sī tùi Pē, sī tùi sè-kan.

(BCL) 因為，見若佇世間的，肉體的私慾，及目睭的私慾，及人生的驕傲，呣是對父，是對世間。

17

(THR) Koh sè-kan kap i ê su-io̍k teh kè-khì; to̍k-to̍k kiâⁿ Siōng-tè ê chí-ì ê éng-óan tī-teh.

(BCL) 閣世間及伊的私慾過去，獨獨行上帝的旨意的，永遠佇。

18

(THR) Sòe-kiáⁿ ah, che sī lō͘-bé ê sî; chhin-chhiūⁿ lín bat thiaⁿ-kìⁿ ū hit ê tùi-te̍k Ki-tok ê lâi, hiān-kim ū chhut chōe-chōe tùi-te̍k Ki-tok ê; tùi án-ni lán chai sī lō͘-bé ê sî.

(BCL) 細子啊，這是路尾的時。親像恁曾聽見，有彼個對敵基督的來；現今有出多多對敵基督的，對按呢咱知是路尾的時。

19

(THR) In tùi lán chhut-khì, to̍k-to̍k m̄ sī sio̍k lán ê; in-ūi nā sī sio̍k lán ê, chiū ōe tn̂g-tn̂g kap lán tiàm; in chhut-khì sī beh hián-bêng in lóng m̄ sī sio̍k lán ê.

(BCL) 對咱出去，獨獨呣是屬咱的；因為若是屬咱的，就會長長及咱；出去，是欲顯明攏呣是屬咱的。

20

(THR) Koh lín tùi Sèng-ê siū boah-iû, sòa chai it-chhè ê tāi-chì.

(BCL) 閣恁對聖者受抹油，續知一切的代誌。

21

(THR) Góa phoe siá hō͘ lín, sī m̄ sī in-ūi lín m̄ bat chin-lí, in-ūi lín bat i, iā in-ūi it-chhè ê pe̍h-chha̍t lóng m̄ sī tùi chin-lí.

(BCL) 我批寫互恁，是呣是因為恁呣識真理。因為恁識伊，也因為一切的白賊攏呣是對真理。

22

(THR) Pe̍h-chha̍t ê sī chī-chūi, kiám m̄ sī bô jīn Iâ-so͘ chòe Ki-tok ê mah? Bô jīn Pē kap Kiáⁿ ê, chit-ê chiū-sī hit ê tùi-te̍k Ki-tok ê.

(BCL) 白賊的是是誰？豈呣是無認耶穌做基督的嗎？無認父及子的，此個就是彼個對敵基督的。

23

(THR) Kìⁿ-nā bô jīn Kiáⁿ ê, iā bô ū Pē; jīn Kiáⁿ ê, iā ū Pē.

(BCL) 見若無認子的，也無有父；認子的，也有父。

24

(THR) Lín tùi khí-thâu só͘ thiaⁿ-kìⁿ ê, tio̍h hō͘ i tn̂g-tn̂g tiàm tī lín. Nā sī tùi khí-thâu só͘ thiaⁿ ê tiàm tī lín, chiū lín iā beh tiàm tī Kiáⁿ kap Pē.

(BCL) 恁對起頭所聽見的，著互伊長長佇恁。若是對起頭所聽的佇恁，就恁也欲佇子及父。

25

(THR) Chit ê iā sī I só͘ èng-ún lán ê èng-ún, chiū-sī éng-o̍ah.

(BCL) 此個也是伊所應允咱的應允，就是永活。

26

(THR) Góa siá chiah-ê hō͘ lín, sī lūn hiah ê bê-he̍k lín ê.

(BCL) 我寫諸個互恁，是論許個迷惑恁的。

27

(THR) Lín tùi I só͘ siū ê boah-iû tn̂g-tn̂g tiàm tī lín, iā m̄ bián lâng kà lín; to̍k-to̍k in-ūi I ê boah-iû kà-sī lín bān hāng sū, iā sī chin-sı̍t m̄ sī pe̍h-chha̍t, iā chiàu i bat kà-sī lín ê, lín tn̂g-tn̂g tiàm tī I.

(BCL) 恁對伊所受的抹油長長佇恁，也呣免人教恁，獨獨因為伊的抹油教示恁萬項事。也是真實，呣是白賊；也照伊曾教示恁的，恁長長佇伊。

28

(THR) Taⁿ, sòe-kiáⁿ ah, lín tio̍h tn̂g-tn̂g tiàm tī I; án-ni, I nā hián-hiān, chiah hō͘ lán tī I koh lîm-kàu ê sî ōe hó-táⁿ, iā tī I ê bīn-chêng bô kiàn-siàu.

(BCL) 今，細子啊，恁著長長佇伊。按呢，伊若顯現，才互咱佇伊閣臨到的時會好膽；也佇伊的面前無見誚。

29

(THR) Lín nā chai I sī kong-gī, chiū chai kìⁿ-nā kiâⁿ gī ê lâng iā sī I siⁿ ê.

(BCL) 恁若知伊是公義，就知見若行義的人也是伊生的。

Bible Color Mark

• 台語漢字羅馬本
• 巴克禮全羅