列王紀上 第 7 章

1

(THR) Só͘-lô-bûn khí ka-kī ê chhù, cha̍p-saⁿ nî kú, chhù chiah khí hó.

(BCL) 所羅門起家己的厝，十三年久厝才起好；

2

(THR) Koh khí Lī-pa-lùn chhiū-nâ ê chhù, tn̂g chı̍t-pah tiú, khoah gō͘-cha̍p tiú, kôaiⁿ saⁿ-cha̍p tiú; ū pek-hiuⁿ-chhâ ê thiāu sì-chōa, thiāu-téng ū pek-hiuⁿ-chhâ ê îⁿ.

(BCL) 閣起黎巴嫩樹林的厝，長一百肘，闊五十肘，高三十肘，有柏香柴的柱四鑆，柱頂有柏香柴的楹。

3

(THR) Téng-bīn ēng pek-hiuⁿ-chhâ khàm i, khàm tī sì-cha̍p-gō͘ ki thiāu-téng ê îⁿ; múi-chōa cha̍p-gō͘ ki thiāu.

(BCL) 頂面用柏香柴蓋伊，蓋佇四十五支柱頂的楹，每鑆十五支柱。

4

(THR) Koh ū thang-mn̂g saⁿ-chōa, thang kap thang saⁿ-tùi; saⁿ-chōa lóng sī án-ni.

(BCL) 閣有窗門三鑆，窗及窗相對，三鑆攏是按呢。

5

(THR) Chiah ê mn̂g kap mn̂g-khiā, sī ēng chhâ chòe ê, lóng sī sù-hong; ū thang-mn̂g saⁿ-chōa, thang kap thang saⁿ-tùi; saⁿ-chōa lóng sī án-ni.

(BCL) 諸個門及門豎是用柴做的攏是四方，有窗門三鑆，窗及窗相對，三鑆攏是按呢。

6

(THR) Koh khí ū thiāu ê léng-lông, tn̂g gō͘-cha̍p tiú, khoah saⁿ-cha̍p tiú; tī in ê thâu-chêng koh ū léng-lông, tī in ê thâu-chêng ū thiāu kap hō͘-tēng.

(BCL) 閣起有柱的兩廊，長五十肘，闊三十肘；佇的頭前閣有兩廊，佇的頭前有柱及戶椗。

7

(THR) Koh khí chō-ūi ê lông, chiū-sī sím-phòaⁿ ê lông, thang tī-hia sím-phòaⁿ; chit ê lông tùi tōe-pán kàu thian-lô-pán, ēng pek-hiuⁿ-chhâ khàm.

(BCL) 閣起座位的廊就是審判的廊，通佇遐審判，此個廊對地板到天羅板用柏香柴蓋。

8

(THR) Só͘-lô-bûn ka-kī só͘ beh khiā ê chhù, lēng-gōa ū chı̍t keng īⁿ tī lông ê lāi-bīn, khí-chō ê hoat saⁿ-tâng; Só͘-lô-bûn chhōa Hoat-ló ê cha-bó͘-kiáⁿ, iā kā i khí chı̍t keng chhù, kap chit ê lông saⁿ-tâng.

(BCL) 所羅門家己所欲徛的厝；另外有一間院佇廊的內面起造的法相同。所羅門娶法老的查某子，也給伊起一間厝，及此個廊相同。

9

(THR) Khí chiah-ê lóng sī ēng pó-pòe ê chio̍h, chiàu chhùn-chhioh lâi phah-hó ê chio̍h, lāi-gōa ēng kù-á kù--ê; tùi tōe-ki kàu nî-chîⁿ, tùi gōa-bīn kàu tōa-īⁿ, lóng sī án-ni.

(BCL) 起諸個攏是用寶貝的石，照寸尺來拍好的石，內外用鋸仔鋸的；對地基到簾簷，對外面到大院，攏是按呢。

10

(THR) Tōe-ki sī kùi-khì ê chio̍h, sī tōa tè chio̍h; ū cha̍p tiú ê chio̍h, ū poeh tiú ê chio̍h.

(BCL) 地基是貴氣的石是大塊石，有十肘的石，有八肘的石；

11

(THR) Téng-bīn ū kùi-khì ê chio̍h, chiàu chhùn-chhioh phah-hó ê chio̍h, iā ū peh-hiuⁿ-chhâ.

(BCL) 頂面有貴氣的石照寸尺拍好的石，也有柏香柴。

12

(THR) Tōa-īⁿ chiu-ûi ū phah-hó ê chio̍h saⁿ-ûn, pek-hiuⁿ-chhâ chı̍t-ûn; lóng chhin-chhiūⁿ Iâ-hô-hoa tiān ê lāi-īⁿ, kap tiān ê lông.

(BCL) 大院周圍有拍好的石三勻、柏香柴一勻，攏親像耶和華殿的內院及殿的廊。

13

(THR) Só͘-lô-bûn ông chhe lâng tùi Chhui-lô tòa Hō͘-lân lâi.

(BCL) 所羅門王差人對推羅帶戶蘭來。

14

(THR) I sī Ná-hut-tha-lī chi-phài tiong chı̍t ê chiú-kóaⁿ lâng ê kiáⁿ, i ê lāu-pē sī Chhui-lô lâng, sī phah-tâng sai-hū. Hō͘-lân ū tì-hūi, chhang-miâ, pún-sū móa-móa, gâu phah ta̍k-hāng ê tâng-khì; i lâi Só͘-lô-bûn hia, chòe i it-chhè ê kang.

(BCL) 伊是拿弗他利支派中一個守寡人的子，伊的老父是推羅人，是拍銅師傅。戶蘭有智慧、聰明、本事滿滿，拍逐項的銅器。伊來所羅門王遐，做伊一切的工。

15

(THR) I chè-chō nn̄g ki tâng-thiāu, múi-ki kôaiⁿ cha̍p-poeh tiú, thiāu ê chiu-ûi cha̍p-jī tiú.

(BCL) 伊製造二支銅柱，每支高十八肘，柱的周圍十二肘；

16

(THR) Koh ēng tâng lâi chù nn̄g ê thiāu-táu, hē tī thiāu-téng; chit ê thiāu-táu kôaiⁿ gō͘ tiú, hit ê thiāu-táu kôaiⁿ iā gō͘-tiú.

(BCL) 閣用銅來鑄二個柱枓下佇柱頂，此個柱枓高五肘，彼個柱枓高也五肘。

17

(THR) Thiāu-téng ê thiāu-táu ū chhiah chı̍t-ba̍k chı̍t-ba̍k ê bāng-á kap chı̍t-khôan chı̍t-khôan ê liān-á; chit ê thiāu-táu ū chhit-ê, hit ê thiāu-táu iā ū chhit-ê.

(BCL) 柱頂的柱枓有刺一目一目的網仔及一環一環的鍊仔，此個柱枓有七個，彼個柱枓也有七個。

18

(THR) I chō thiāu; tī chı̍t ê bāng-á ê téng-bīn ê sì-ûi, ū sia̍h-liû nn̄g-chōa, ēng i lâi jia-khàm thiāu-téng ê thiāu-táu; hit ê thiāu-táu iā sī án-ni.

(BCL) 伊造柱佇一個網仔的頂面的四圍有石榴二鑆，用伊來遮蓋柱頂的柱枓，彼個柱枓也是按呢。

19

(THR) Lông ê lāi-bīn thiāu-téng ê thiāu-táu, ū khek pek-ha̍p-hoe sì tiú.

(BCL) 廊的內面柱頂的柱枓，有刻百合花四肘。

20

(THR) Nn̄g ki thiāu-téng, kūn bāng-á piⁿ phòng-îⁿ ê só͘-chāi, ū thiāu-táu; koh ū sia̍h-liû nn̄g-pah lia̍p tī tē-jī ê thiāu-táu; ta̍k-chōa ûi i.

(BCL) 二支柱頂近網仔邊圓的所在有柱枓，閣有石榴二百粒佇第二個柱枓，逐鑆圍伊。

21

(THR) I khiā nn̄g ki thiāu tī tiān ê léng-lông; khiā tī chiàⁿ-pêng ê miâ kiò Ngá-kun, khiā tī tò-pêng ê, miâ kiò Pho-a-su.

(BCL) 伊　二支柱佇殿的兩廊：　佇正旁的，名叫雅斤；　佇倒旁的，名叫波阿斯。

22

(THR) Tī thiāu-téng khek pek-ha̍p-hoe; án-ni, chō thiāu ê kang chiū bêng-pe̍k.

(BCL) 佇柱頂刻百合花。按呢，造柱的工就明白。

23

(THR) I koh chù chı̍t ê tâng-hái, khóan-sit sī îⁿ--ê, kôaiⁿ gō͘ tiú, tùi chit-pêng kàu hit-pêng cha̍p tiú, chiu-ûi saⁿ-cha̍p tiú.

(BCL) 伊閣鑄一個銅海，款式是圓的，高五肘，對此旁到彼旁十肘，周圍三十肘。

24

(THR) Tī i ê kîⁿ ê ē-bīn, ū pû-á ê khóan ûi i, múi-tiú cha̍p-lia̍p, lâi ûi hit ê tâng-hái; pû-á ū nn̄g-chōa, chù tâng-hái ê sî, sòa chù--ê.

(BCL) 佇伊的墘的下面，有匏仔的款圍伊；每肘十粒，來圍彼個銅海，匏仔有二鑆，鑄銅海的時續鑄的。

25

(THR) Tâng-hái khòa tī cha̍p-jī chiah tâng-gû ê téng-bīn; saⁿ-chiah ǹg-pak, saⁿ-chiah ǹg-sai, saⁿ-chiah ǹg-lâm, saⁿ-chiah ǹg-tang; tâng-hái hē tī gû ê téng-bīn, gû-bé ǹg lāi-bīn.

(BCL) 銅海靠佇十二隻銅牛的頂面：三隻向北，三隻向西，三隻向南，三隻向東；銅海下佇牛的頂面，牛尾向內面。

26

(THR) Tâng-hái kāu chı̍t pa-chiúⁿ ê khoah; i ê kîⁿ chhin-chhiūⁿ poe ê kîⁿ, chhin-chhiūⁿ pek-ha̍p-hoe; thang tóe nn̄g-chheng pà-te̍k.

(BCL) 銅海厚一巴掌的闊，伊的墘親像杯的墘，親像百合花，通貯二千罷特。

27

(THR) I ēng tâng chhòng cha̍p ê chō; múi-chō tn̂g sì-tiú, khoah sì-tiú, kôaiⁿ saⁿ-tiú.

(BCL) 伊用銅創十個座，每座長四肘，闊四肘，高三肘。

28

(THR) Ta̍k ê chō ê khóan-sit sī án-ni; lóng ū kek(**keh)-tó͘; i ê tó͘ tī kak ê só͘-chāi saⁿ-chiap.

(BCL) 逐個座的款式是按呢：攏有隔堵，伊的堵佇角的所在相接，

29

(THR) Tī i ê kak saⁿ-chiap ê só͘-chāi, tó͘ ê téng-bīn, ū sai, kap gû, kap ki-lō͘-peng; tī kak saⁿ-chiap ê só͘-chāi ê téng-bīn, ū sió-chō; sai kap gû ê ē-bīn, ū sûi kó͘-chîⁿ-thang ê chhiu.

(BCL) 佇伊的角相接的所在，堵的頂面有獅及牛，及兵；佇角相接的所在的頂面有小座，獅及牛的下面有垂古簷窗的鬚。

30

(THR) Ta̍k ê chō ū sì ê tâng-lûn, kap tâng ê te̍k-sim; i ê sì-kha kok ū kè; kè chù tī phûn ê ē-bīn; ta̍k-ê piⁿ-á ū kó͘-chîⁿ-thang ê chhiu.

(BCL) 逐個座有四個銅輪及銅的軸心。伊的四腳各有架，架鑄佇盆的下面，逐個邊仔有古簷窗的鬚。

31

(THR) I ê chhùi tī táu ê lāi-bīn ǹg-téng chı̍t-tiú; i ê chhùi sī îⁿ-ê, chhin-chhiūⁿ sió-chō ê khóan-sit, chı̍t-tiú-pòaⁿ; tī i ê chhùi ū tiau-khek; i ê tó͘ sī sù-hong ê, m̄-sī îⁿ-ê.

(BCL) 伊的嘴佇枓的內面向頂一肘，伊的嘴是圓的，親像小座的款式，一肘半，佇伊的嘴有雕刻，伊的堵是四方的，呣是圓的。

32

(THR) Sì ê lûn tī tó͘ ê ē-bīn; lûn ê te̍k-sim kap chō saⁿ-liân; ta̍k ê lûn kôaiⁿ chı̍t-tiú-pòaⁿ.

(BCL) 四個輪佇堵的下面，輪的軸心及座相連，逐個輪高一肘半。

33

(THR) Lûn ê khóan, chhin-chhiūⁿ chhia-lûn ê khóan; i ê te̍k-sim, i ê gōa-khôan, i ê chí, i ê lāi-khôan, lóng sī chù--ê.

(BCL) 輪的款親像車輪的款；伊的軸心、伊的外環、伊的軹、伊的內環攏是鑄的。

34

(THR) Chō ê sì-kak ū sì ê kè, kè kap chō liân-chòe chı̍t-ê.

(BCL) 座的四角有四個架，架及座連做一個。

35

(THR) Chō ê téng-bīn ū îⁿ ê iān, kôaiⁿ pòaⁿ-tiú; chō ê téng-bīn ū i ê thuh, kap i ê tó͘, lóng kap chō liân-chòe chı̍t-ê;

(BCL) 座的頂面有圓的緣，高半肘；座的頂面有伊的托及伊的堵，攏及座連做一個。

36

(THR) i ê thuh ê pán, kap i ê tó͘ ê téng-bīn, i khek ki-lō͘-peng, kap sai, kap chó-chhiū, chiàu i ê khàng-ūi; sì-ûi ū kat kó͘-chîⁿ-thang ê chhiu.

(BCL) 伊的托的板及伊的堵的頂面，伊刻兵、及獅，及棗樹，照伊的空位，四圍有結古簷窗的鬚。

37

(THR) I chiàu án-ni chhòng cha̍p ê chō; in ê chù-hoat, chhùn-chhioh, khóan-sit, lóng saⁿ-tâng.

(BCL) 伊照按呢創十個座，的鑄法、寸尺、款式，攏相同。

38

(THR) Koh chō tâng-phûn cha̍p-ê, múi-phûn thang tóe sì-cha̍p pà-te̍k; ta̍k ê phûn tı̍t-kèng sì-tiú; cha̍p ê chō ê téng-bīn, ta̍k ê chō hē chı̍t ê phûn.

(BCL) 閣造銅盆十個，每盆通貯四十罷特。逐個盆直徑四肘，十個座的頂面，逐個座下一個盆。

39

(THR) Hiah ê chō, gō͘-ê hē tī tiān ê chiàⁿ-pêng, gō͘-ê hē tī tiān ê tò-pêng; koh ēng tâng-hái hē tī tiān ê chiàⁿ-pêng, tī tang--sì ê lâm-pêng.

(BCL) 許個座五個下佇殿的正旁，五個下佇殿的倒旁；閣用銅海下佇殿的正旁，佇東勢的南旁。

40

(THR) Hō͘-lân koh chhòng phûn, thuh-á, kap pôaⁿ. Tùi án-ni, Hō͘-lân ūi-tio̍h Só͘-lô-bûn ông chòe-ôan Iâ-hô-hoa tiān it-chhè ê kang;

(BCL) 戶蘭閣創盆、托仔，及盤。對按呢，戶蘭為著所羅門王做完耶和華殿一切的工。

41

(THR) chiū-sī nn̄g ki thiāu, kap thiāu-téng ê thiāu-táu ê nn̄g lia̍p kiû, í-kı̍p khàm tī thiāu-téng thiāu-táu ê kiû nn̄g ê bāng;

(BCL) 就是：二支柱及柱頂的柱枓的二粒球；以及蓋佇柱頂柱枓的球二個網；

42

(THR) ūi-tio̍h nn̄g ê bāng chòe sì-pah lia̍p sia̍h-liû; chı̍t ê bāng ū nn̄g-chōa ê sia̍h-liû, lâi khàm thiāu-téng thiāu-táu ê nn̄g lia̍p kiû;

(BCL) 為著二個網做四百粒石榴，一個網有二鑆的石榴，來蓋柱頂柱枓的二粒球；

43

(THR) cha̍p ê chō, kap chō-téng cha̍p ê phûn;

(BCL) 十個座及座頂十個盆；

44

(THR) tâng-hái chı̍t-ê, kap tâng-hái ē-bīn cha̍p-jī chiah gû;

(BCL) 銅海一個及銅海下面十二隻牛；

45

(THR) phûn, thuh-á, pôaⁿ; chiah-ê it-chhè lóng sī Hō͘-lân ūi Só͘-lô-bûn ông chòe Iâ-hô-hoa tiān ê khì-kū, lóng ēng kng-bêng ê tâng lâi chòe ê.

(BCL) 盆、托仔、盤。諸個一切攏是戶蘭為所羅門王做耶和華殿的器具，攏用光明的銅來做的，

46

(THR) Ông tī Iok-tàn ê pîⁿ-iûⁿ, tī So͘-kat kap Sat-la̍h-tàn ê tiong-kan, tī liâm-thô͘ ê tōe chù-chiâⁿ-ê.

(BCL) 王佇約但的平洋、佇疏割及撒拉但的中間佇粘土的地鑄成的。

47

(THR) Chiah ê it-chhè ê khì-kū Só͘-lô-bûn lóng bô kè chhìn, in-ūi ke̍k-kî chōe, tâng ê khin-tāng iā bōe-tit-thang chai.

(BCL) 諸個一切的器具所羅門攏無過秤；因為極其多，銅的輕重也得通知。

48

(THR) Só͘-lô-bûn iā chòe Iâ-hô-hoa tiān-lāi it-chhè ê khì-kū, chiū-sī kim-tôaⁿ, kap pâi-lia̍t-piáⁿ ê toh, ēng kim chòe--ê;

(BCL) 所羅門也做耶和華殿內一切的器具，就是金壇及排列餅的桌用金做的；

49

(THR) āu-tiān ê thâu-chêng ê teng-tâi, chiàⁿ-pêng gō͘-ê, tò-pêng gō͘-ê, lóng ēng hó-kim chòe--ê; i ê hoe, i ê teng, i ê khîⁿ, ēng kim chòe--ê;

(BCL) 後殿的頭前的燈台：正旁五個，倒旁五個，攏用好金做的，伊的花、伊的燈、伊的鉗，用金做的，

50

(THR) i ê poe, i ê chián-to, i ê óaⁿ, i ê sî, i ê hé-tiáⁿ, sī ēng hó-kim chòe--ê; koh ū mn̂g-khū, chiū-sī āu-tiān, Chì-sèng-só͘ ê mn̂g-khū, kap hit ê chhù, chêng-tiān ê mn̂g-khū, lóng ēng kim chòe--ê.

(BCL) 伊的杯、伊的剪刀、伊的碗、伊的匙、伊的火鼎，是用好金做的，閣有門臼，就是後殿、至聖所的門臼，及彼個厝，前殿的門臼，攏用金做的。

51

(THR) Án-ni, Só͘-lô-bûn ông chòe-ôan Iâ-hô-hoa tiān it-chhè ê kang. Só͘-lô-bûn chiong i ê lāu-pē Tāi-pı̍t só͘ hiàn ê mı̍h, tòa jı̍p-khì, gûn, kim, kap khì-kū, hē tī Iâ-hô-hoa tiān ê hú-khò͘.

(BCL) 按呢，所羅門王做完耶和華殿一切的工，所羅門將伊的老父大衛所獻的物帶入去，銀金及器具下佇耶和華殿的府庫。

Bible Color Mark

• 台語漢字羅馬本
• 巴克禮全羅