彼得前書 第 3 章

1

(THR) Lín chòe hū-jîn-lâng ê, iā tio̍h án-ni sūn-ho̍k ka-kī ê tiōng-hu; siat-sú ū-ê bô thàn tō-lí, sui-jiân bô ēng kóng ōe, iā thang ēng hū-jîn-lâng ê só͘ kiâⁿ tit-tio̍h in lâi thàn;

(BCL) 恁做婦仁人的，也著按呢順服家己的丈夫；設使有的無趁道理，雖然無用講話，也通用婦仁人的所行得著來趁；

2

(THR) in-ūi khòaⁿ-kìⁿ lín chheng-kiat kiaⁿ-ùi ê só͘ kiâⁿ.

(BCL) 因為看見恁清潔驚畏的所行。

3

(THR) Lín ê chng-thāⁿ m̄ thang ēng gōa-bīn ê pīⁿ thâu-mn̂g, kap kòa kim-khì, á-sī chhēng i-ho̍k chòe chng-thāⁿ;

(BCL) 恁的妝飾呣通用外面的辮頭毛，及掛金器，抑是穿衣服做妝飾，

4

(THR) chiū-sī ēng sim-lāi ún-ba̍t ê lâng, chhēng un-jiû thiâm-chēng ê sim-sîn, chòe bōe pāi-hōai ê i-ho̍k; che tī Siōng-tè ê bīn-chêng sī chin pó-pòe.

(BCL) 就是用心內隱密的人，穿溫柔、恬靜的心神做敗壞的衣服；這佇上帝的面前是真寶貝。

5

(THR) In-ūi chāi-chá sèng ê hū-jîn-lâng chiū-sī ǹg-bāng Siōng-tè ê, iā sī án-ni ka-kī chng-thāⁿ, sūn-ho̍k ka-kī ê tiōng-hu;

(BCL) 因為在早聖的婦仁人就是向望上帝的也是按呢家己妝飾，順服家己的丈夫，

6

(THR) chhin-chhiūⁿ Sat-la̍h sūn-thàn A-pek-la̍h-hán, chheng i chòe chú; lín nā kiâⁿ hó, bô tah-hiahN lâi kiaⁿ-hiâⁿ, chiū chòe i ê cha-bó͘-kiáⁿ.

(BCL) 親像撒拉順趁亞伯拉罕，稱伊做主。恁若行好，無搭嚇來驚惶，就做伊的查某子。

7

(THR) Lín chòe tiōng-hu ê, iā tio̍h án-ni, chiàu tì-sek kap hū-jîn-lâng saⁿ-kap tiàm, chun-kèng i sī khah nńg-chiáⁿ ê khì-kū, iā sī saⁿ-kap sêng-chiap o̍ah-miā ê un; hō͘ lín ê kî-tó bô tú-tio̍h chó͘-tòng.

(BCL) 恁做丈夫的，也著按呢照智識及婦仁人相及，尊敬伊是卡軟茈的器具，也是相及承接活命的恩。互恁的祈禱無抵著阻擋。

8

(THR) Tàu-tí tāi-ke tio̍h tâng-sim, saⁿ thé-thiap, saⁿ-thiàⁿ chhin-chhiūⁿ hiaⁿ-tī, lîn-bín, khiam-pi;

(BCL) 到底大家著同心，相體貼，相疼親像兄弟，憐憫謙卑。

9

(THR) bô ēng pháiⁿ pò pháiⁿ, á-sī lóe-mē pò lóe-mē; hóan-tńg tio̍h chiok-hok; in-ūi lín siū tiàu sī beh hō͘ lín sêng-chiap chiok-hok.

(BCL) 無用歹報歹，抑是詈罵報詈罵，反轉著祝福；因為恁受召，是欲互恁承接祝福。

10

(THR) In-ūi, Lâng nā ài beh sioh o̍ah-miā, Koh kìⁿ-tio̍h hok-khì ê jı̍t, Chiū tio̍h kìm-chí chhùi-chı̍h bô pháiⁿ, Chhùi-tûn bô kóng khúi-khiat:

(BCL) 因為：人若愛欲惜活命，閣見著福氣的日，就著禁止嘴舌無歹，嘴唇無講詭譎；

11

(THR) Tio̍h lī-khui pháiⁿ lâi kiâⁿ hó; Chhē hô-pêng lâi tui-jip i.

(BCL) 著離開歹來行好，尋和平，來追伊。

12

(THR) In-ūi Chú ê ba̍k-chiu khòaⁿ gī lâng, I ê hī-khang thiaⁿ in ê kî-tó: Nā-sī Chú ê bīn kàm-chhat kiâⁿ pháiⁿ ê lâng.

(BCL) 因為，主的目睭看義人，伊的耳孔聽的祈禱。若是主的面鑑察行歹的人。

13

(THR) Lín nā ūi-tio̍h hó lâi jia̍t-sim, chī-chūi ōe hāi lín?

(BCL) 恁若為著好來熱心，是誰會害恁？

14

(THR) Chóng-sī lín nā in-ūi gī lâi siū khó͘, chiū ū hok-khì: bo̍h-tit kiaⁿ in ê ui-hong, iā bo̍h-tit peh-pak;

(BCL) 總是恁若因為義來受苦，就有福氣。莫得驚的威風，也莫得迫腹；

15

(THR) to̍k-to̍k lín sim-lāi tio̍h lia̍h Ki-tok chòe Chú, chun I chòe sèng; kìⁿ-nā ū lâng mn̄g lín só͘ ǹg-bāng ê in-iû, chiū tio̍h put-sî piān-piān ēng un-jiû kap kiaⁿ-ùi lâi hun-sò͘;

(BCL) 獨獨恁心內著掠基督做主尊伊做聖。見若有人問恁所向望的因由，就著不時便便，用溫柔及驚畏來分訴；

16

(THR) tio̍h chûn bô thang chek-pī ê liông-sim; chiah lín tī tá-lo̍h chı̍t hāng sū siū húi-pòng, chiū tī hit hāng sū ōe hō͘ hiah ê bû-lōa lín tiàm-tī Ki-tok ê hó phín-hēng ê, ka-kī siū kiàn-siàu.

(BCL) 著存無通責備的良心，才恁佇叨落一項事受誹謗，就佇彼項事會互許個誣賴恁佇基督的好品行的，家己受見誚。

17

(THR) In-ūi Siōng-tè ê chí-ì nā ài án-ni, chiū lín kiâⁿ hó lâi siū khó͘, pí kiâⁿ pháiⁿ lâi siū khó͘, khah hó.

(BCL) 因為上帝的旨意若愛按呢，就恁行好來受苦，比行歹來受苦卡好。

18

(THR) In-ūi Ki-tok iā chı̍t pái ūi-tio̍h chōe siū khó͘, gī-ê thòe put-gī ê, sī beh chhōa lán kàu tī Siōng-tè; lūn jio̍k-thé chiū siū sí, lūn sîn chiū tit o̍ah;

(BCL) 因為基督也一擺為著罪受苦，義的替不義的，是欲導咱到佇上帝。論肉體，就受死；論神，就得活。

19

(THR) tī hit ê sîn iā bat khì thôan tō-lí hō͘ kaⁿ-lāi hiah ê sîn,

(BCL) 佇彼個神也曾去傳道理互監內許個神，

20

(THR) chiū-sī chá m̄ sìn-thàn ê, tng Siōng-tè thun-lún thèng-hāu, tī Ná-a ê jı̍t, teh pī-pān tōa chûn ê sî, jı̍p hit lāi-bīn ê lâng chió-chió, chí ū poeh ê, tùi chúi tit kiù;

(BCL) 就是早呣信趁的，當上帝吞聽候佇挪亞的日、備辦大船的時。入彼內面的人少少，只有八個對水得救。

21

(THR) chit-ê só͘ koan-chiò ê sóe-lé taⁿ iā kiù lín, m̄ sī tû-khì jio̍k-thé ê lâ-sâm, chiū-sī bô thang chek-pī ê liông-sim ǹg Siōng-tè lâi kiû, sī tùi Iâ-so͘ Ki-tok ê koh-o̍ah;

(BCL) 此個所關照的洗禮，今也救恁；呣是除去肉體的垃墋，就是無通責備的良心向上帝來求，是對耶穌基督的復活。

22

(THR) I í-keng khì thiⁿ-nı̍h, taⁿ tī Siōng-tè tōa pêng; chiah ê thiⁿ-sài, kap ū kôan-pèng ê, ū khùi-la̍t ê, hâng-ho̍k I.

(BCL) 伊已經去天裡，今佇上帝大旁；諸個天使及有權柄的，有氣力的，降服伊。

Bible Color Mark

• 台語漢字羅馬本
• 巴克禮全羅