歷代志下 第 1 章

1

(THR) Tāi-pı̍t ê kiáⁿ Só͘-lô-bûn kok-ūi kian-kò͘, Iâ-hô-hoa i ê Siōng-tè kap i tī--teh, hō͘ i put-chí tōa heng-ōng.

(BCL) 大衛的子所羅門國位堅固；耶和華──伊的上帝及伊佇，互伊不止大興旺。

2

(THR) Só͘-lô-bûn tùi Í-sek-lia̍t chèng-lâng kóng, chiū-sī chhian-chóng, pé-chóng, sím-phòaⁿ-si, í-kı̍p thong Í-sek-lia̍t ê siú-léng kap cho̍k-tiúⁿ.

(BCL) 所羅門對以色列眾人講，就是千總、百總、審判司，以及通以色列的首領及族長。

3

(THR) Só͘-lô-bûn kap hōe-chiòng lóng khì kàu Ki-piàn ê soaⁿ-thâu-tôaⁿ, tī-hia ū Siōng-tè ê hōe-bō͘, chiū-sī Iâ-hô-hoa ê lô͘-po̍k Mô͘-se tī khòng-iá só͘ chō--ê.

(BCL) 所羅門及會眾攏去到基遍的山頭壇，佇遐有上帝的會幕，就是耶和華的奴僕摩西佇曠野所造的。

4

(THR) To̍k-to̍k Siōng-tè ê kūi, Tāi-pı̍t í-keng tùi Ki-lia̍t-iâ-lîm tòa i chiūⁿ-khì kàu Tāi-pı̍t thòe i pī-pān ê só͘-chāi; in-ūi i bat thòe i tah pò͘-pîⁿ tī Iâ-lō͘-sat-léng.

(BCL) 獨獨上帝的櫃，大衛已經對基列耶琳帶伊上去到大衛替伊備辦的所在，因為伊曾替伊搭布棚佇耶路撒冷，

5

(THR) Koh Hō͘-ní ê sun, Ou-lī ê kiáⁿ, Pí-sat-lia̍t só͘ chō ê tâng-tôaⁿ iā tī-hia, tī Iâ-hô-hoa hōe-bō͘-chêng; Só͘-lô-bûn kap hōe-chiòng chiū-kūn i.

(BCL) 閣戶珥的孫、烏利的子比撒列所造的銅壇也佇遐，佇耶和華會幕前。所羅門及會眾就近伊。

6

(THR) Só͘-lô-bûn chiūⁿ kàu Iâ-hô-hoa bīn-chêng ê tâng-tôaⁿ, chiū-sī tī hōe-bō͘ hia, hiàn sio-chè chı̍t-chheng tī hit téng-bīn.

(BCL) 所羅門上到耶和華面前的銅壇就是佇會幕遐，獻燒祭一千佇彼頂面。

7

(THR) Hit-mî Siōng-tè tùi Só͘-lô-bûn chhut-hiān, kā i kóng, Lí ài Góa siúⁿ-sù lí sím-mı̍h, lí thang kiû lah.

(BCL) 彼暝，上帝對所羅門出現，給伊講：「你愛我賞賜你甚麼，你通求啦。」

8

(THR) Só͘-lô-bûn tùi Siōng-tè kóng, Lí bat tùi góa ê lāu-pē Tāi-pı̍t tōa si chû-ài, koh hō͘ góa sòa-chiap i chòe ông.

(BCL) 所羅門對上帝講：「你曾對我的老父大衛大施慈愛，閣互我續接伊做王。

9

(THR) Iâ-hô-hoa Siōng-tè ah, taⁿ kiû Lí kiâⁿ Lí só͘ èng-ún góa ê lāu-pē Tāi-pı̍t ê ōe; in-ūi Lí siat-lı̍p góa chòe chit ê peh-sìⁿ ê ông, in chhin-chhiūⁿ tōe-chiūⁿ ê thô͘-soa chı̍t-iūⁿ.

(BCL) 耶和華上帝啊，今求你行你所應允我的老父大衛的話；因為你設立我做此個百姓的王，親像地上的土沙一樣。

10

(THR) Kiû Lí siúⁿ-sù góa tì-hūi chhang-miâ, hō͘ góa thang chhut-jı̍p tī chit ê peh-sìⁿ ê bīn-chêng; in-ūi chī-chūi ōe sím-phòaⁿ Lí hiah-tōa kok ê peh-sìⁿ ah?

(BCL) 求你賞賜我智慧聰明，互我通出入佇此個百姓的面前；因為，是誰會審判你許大國的百姓啊？」

11

(THR) Siōng-tè tùi Só͘-lô-bûn kóng, Lí í-keng ū chit-hō sim, bô kiû hè-châi, hó-gia̍h, chun-kùi, kap lí ê tùi-te̍k ê sìⁿ-miā, iā bô kiû ka-kī tn̂g hè-siū; to̍k-to̍k ūi ka-kī kiû tì-hūi chhang-miâ, hō͘ lí thang sím-phòaⁿ Góa ê peh-sìⁿ, chiū-sī Góa siat-lı̍p lí chòe in ê ông ê;

(BCL) 上帝對所羅門講：「你已經有此號心，無求貨財、好額、尊貴，及你的對敵的生命，也無求家己長歲壽，獨獨為家己求智慧聰明互你通審判我的百姓，就是我設立你做的王的；

12

(THR) só͘-í siúⁿ-sù lí tì-hūi chhang-miâ; Góa iā beh siúⁿ-sù lí hè-châi, hó-gia̍h, chun-kùi; tī lí í-chêng ê lia̍t-ông lóng bô ū án-ni, tī lí í-āu iā bô beh ū án-ni ê.

(BCL) 所以賞賜你智慧聰明，我也欲賞賜你貨財、好額、尊貴。佇你以前的列王攏無有按呢，佇你以後也無欲有按呢的。」

13

(THR) Tùi án-ni Só͘-lô-bûn tùi Ki-piàn soaⁿ-thâu-tôaⁿ hōe-bō͘-chêng tò-lâi Iâ-lō͘-sat-léng, chòe-ông kóan-lí Í-sek-lia̍t.

(BCL) 對按呢，所羅門對基遍山頭壇會幕前倒來耶路撒冷，做王管理以色列。

14

(THR) Só͘-lô-bûn chū-chı̍p chiàn-chhia bé-peng; ū chiàn-chhia chı̍t-chheng sì-pah tiuⁿ, bé-peng chı̍t-bān nn̄g-chheng miâ; an-tì tī tún-chhia ê siâⁿ, iā kap ông tī Iâ-lō͘-sat-léng.

(BCL) 所羅門聚集戰車馬兵，有戰車一千四百張，馬兵一萬二千名，安置佇囤車的城也及王佇耶路撒冷。

15

(THR) Ông tī Iâ-lō͘-sat-léng hō͘ kim-gûn chhin-chhiūⁿ chio̍h-thâu, hō͘ pek-hiuⁿ-chhiū chhin-chhiūⁿ pîⁿ-iûⁿ ê sng-châi-chhiū, in-ūi chin-chōe.

(BCL) 王佇耶路撒冷互金銀親像石頭，互柏香樹親像平洋的桑材樹，因為真多。

16

(THR) Só͘-lô-bûn só͘ ū ê bé sī tùi Ai-kı̍p lâi ê; chiū-sī ông ê seng-lí-lâng chı̍t-tīn chı̍t-tīn chiàu kè-chîⁿ bóe--lâi ê.

(BCL) 所羅門所有的馬是對埃及來的，就是王的生理人一陣一陣照價錢買來的。

17

(THR) In tùi Ai-kı̍p bóe--lâi ê chhia, múi-tiuⁿ ta̍t gûn la̍k-pah sià-khek-le̍k; bé múi-phit chı̍t-pah gō͘-cha̍p; Hek-lêng chiah ê ông kap A-lân chiah ê ông lóng tùi in keng-chhiú chiàu án-ni tòa chhut-lâi.

(BCL) 對埃及買來的車，每張值銀六百舍客勒，馬每匹一百五十。赫人諸個王及亞蘭諸個王攏對經手照按呢帶出來。

Bible Color Mark

• 台語漢字羅馬本
• 巴克禮全羅