歷代志下 第 10 章

1

(THR) Lô-phò-àm khì Sī-kiàm, in-ūi Í-sek-lia̍t chèng-lâng kàu Sī-kiàm, beh siat-lı̍p i chòe ông.

(BCL) 羅波安去示劍，因為以色列眾人到示劍，欲設立伊做王。

2

(THR) Chêng Nî-pat ê kiáⁿ Iâ-lô-phò-àm siám-pī Só͘-lô-bûn ông ê bīn, cháu-khì Ai-kı̍p, tiàm tī-hia; Iâ-lô-phò-àm thiaⁿ-kìⁿ chit ê sū, chiū tùi Ai-kı̍p tò-lâi.

(BCL) 前尼八的子耶羅波安閃避所羅門王的面，走去埃及，踮佇遐；耶羅波安聽見此個事，就對埃及倒來。

3

(THR) In chhe lâng khì kiò i lâi; Iâ-lô-phò-àm chiū kap Í-sek-lia̍t chèng-lâng lâi kìⁿ Lô-phò-àm;

(BCL) 差人去叫伊來，耶羅波安就及以色列眾人來見羅波安；

4

(THR) kā i kóng, Lí ê lāu-pē hō͘ góan pē kan-khó͘ ê taⁿ; lí ê lāu-pē só͘ hē tī góan ê khó͘-kang kap tāng ê taⁿ, kiû lí kiám-khin, góan chiū ho̍k-sāi lí.

(BCL) 給伊講：「你的老父互阮背艱苦的軛；你的老父所下佇阮的苦工及重的軛，求你減輕，阮就服事你。」

5

(THR) Lô-phò-àm kā in kóng, Saⁿ-jı̍t-āu koh lâi kìⁿ góa; peh-sìⁿ chiū khì.

(BCL) 羅波安給講：「三日後閣來見我！」百姓就去。

6

(THR) Lô-phò-àm ê lāu-pē Só͘-lô-bûn o̍ah-teh ê sî, ū kun-sûi tī i bīn-chêng ê lāu-lâng, Lô-phò-àm ông kap in gī-lūn kóng, Lín ū sím-mı̍h kè-chhek góa thang hê-hok chit ê peh-sìⁿ?

(BCL) 羅波安的老父所羅門活的時，有跟隨佇伊面前的老人，羅波安王及議論，講：「恁有甚麼計策，我通回覆此個百姓。」

7

(THR) In kā i kóng, Lí nā hó khóan-thāi chit ê peh-sìⁿ, hō͘ in hoaⁿ-hí, ēng hó-ōe lâi ìn--in, in chiū éng-óan chòe lí ê lô͘-po̍k.

(BCL) 給伊講：「你若好款待此個百姓，互歡喜，用好話來應，就永遠做你的奴僕。」

8

(THR) Chóng-sī i kū-cho̍at lāu-lâng só͘ hō͘ i ê kè-chhek, kap hiah-ê khiā tī i bīn-chêng kap i pîⁿ-ûn ê siàu-liân lâng chham-siông;

(BCL) 總是伊拒絕老人所互伊的計策，及許個徛佇伊面前及伊平勻的少年人參詳，

9

(THR) kā i kóng, Chit ê peh-sìⁿ ū tùi góa kóng, Lí ê lāu-pē hē tī góan ê taⁿ, kiû lí hō͘ góan khah-khin; taⁿ lín ū sím-mı̍h kè-chhek, hō͘ lán thang hê-hok in?

(BCL) 給伊講：「此個百姓有對我講：『你的老父下佇阮的軛，求你互阮卡輕』；今恁有甚麼計策，互咱通回覆。」

10

(THR) Hiah-ê kap i pîⁿ-ûn ê siàu-liân lâng kóng, Chit ê peh-sìⁿ tùi lí kóng, Lí ê lāu-pē hō͘ góan pē tāng ê taⁿ, kiû lí kā góan kiám-khin, lí tio̍h án-ni ìn in kóng, Góa ê bé-cháiⁿ khah-tōa góa ê lāu-pē ê io.

(BCL) 許個及伊平勻的少年人講：「此個百姓對你講：『你的老父互阮背重的軛求你給阮減輕』；你著按呢應講：『我的尾指卡大我的老父的腰；

11

(THR) Góa ê lāu-pē hō͘ lín pē tāng ê taⁿ, góa beh ke-thiⁿ lín ê taⁿ; góa ê lāu-pē ēng piⁿ kéng-kài lín, góa beh ēng giat-á-thâng kéng-kài lín.

(BCL) 我的老父互恁背重的軛，我欲加添恁的軛；我的老父用鞭警戒恁，我欲用蠍仔蟲警戒恁。』」

12

(THR) Tē-saⁿ jı̍t Iâ-lô-phò-àm kap chèng peh-sìⁿ kàu Lô-phò-àm hia, chiàu ông só͘ bēng-lēng, kóng, Tē-saⁿ jı̍t koh lâi góa chia.

(BCL) 第三日，耶羅波安及眾百姓到羅波安遐，照王所命令講「第三日閣來我遮」。

13

(THR) Ông ēng pháiⁿ siaⁿ-sàu ìn peh-sìⁿ; Lô-phò-àm ông pàng-sak lāu-lâng ê kè-chhek,

(BCL) 王用歹聲嗽應百姓，羅波安王放拺老人的計策，

14

(THR) chiàu siàu-liân lâng ê kè-chhek tùi in kóng, Góa ê pē hō͘ lín pē tāng ê taⁿ, góa beh ke-thiⁿ lín ê taⁿ; góa ê pē ēng piⁿ kéng-kài lín, góa beh ēng giat-á-thâng kéng-kài lín.

(BCL) 照少年人的計策對講：「我的父互恁背重的軛，我欲加添恁的軛；我的父用鞭警戒恁，我欲用蠍仔蟲警戒恁。」

15

(THR) Ông bô thiaⁿ-thàn peh-sìⁿ, in-ūi chit ê tāi-chì sī chhut tī Siōng-tè, hō͘ Iâ-hô-hoa èng-giām I thok Sī-lô lâng A-hi-ngá tùi Nî-pat ê kiáⁿ Iâ-lô-phò-àm só͘ kóng ê ōe.

(BCL) 王無聽趁百姓；因為此個代誌是出佇上帝，互耶和華應驗伊託示羅人亞希雅對尼八的子耶羅波安所講的話。

16

(THR) Í-sek-lia̍t chèng peh-sìⁿ khòaⁿ-kìⁿ ông bô thiaⁿ-thàn in, peh-sìⁿ chiū tùi ông kóng, Góan tī Tāi-pı̍t ū sím-mı̍h hūn-gia̍h ah? góan kap Iâ-se ê kiáⁿ bô kan-sia̍p. Í-sek-lia̍t ah, ta̍k-lâng tò-khì lín ê pò͘-pîⁿ; Tāi-pı̍t ah, tio̍h kò͘ lí ka-kī ê chhù. Tùi án-ni Í-sek-lia̍t chèng-lâng tò-khì in ê pò͘-pîⁿ.

(BCL) 以色列眾百姓看見王無聽趁，百姓就對王講：阮佇大衛有甚麼份額啊？阮及耶西的子無干涉！以色列啊，逐人倒去恁的布棚！大衛啊，著顧你家己的厝！對按呢，以色列眾人倒去的布棚。

17

(THR) Chóng-sī khiā-khí Iû-tāi chiah ê siâⁿ ê Í-sek-lia̍t lâng, Lô-phò-àm iû-gôan chòe in ê ông.

(BCL) 總是徛起猶大諸個城的以色列人，羅波安猶原做的王。

18

(THR) Lô-phò-àm ông chhe kóan-lí chòe khó͘-kang ê lâng, Hap-to-lân khì; Í-sek-lia̍t lâng chiū ēng chio̍h-thâu tìm-sí--i. Lô-phò-àm ông chiū kóaⁿ-kín chiūⁿ chhia, beh cháu-khì Iâ-lō͘-sat-léng.

(BCL) 羅波安王差管理做苦工的人哈多蘭去，以色列人就用石頭擲死伊。羅波安王就趕緊上車，欲走去耶路撒冷。

19

(THR) Tùi án-ni Í-sek-lia̍t hóan-pōan Tāi-pı̍t ke, kàu kin-á-jı̍t.

(BCL) 對按呢，以色列反叛大衛家，到今仔日。

Bible Color Mark

• 台語漢字羅馬本
• 巴克禮全羅