歷代志下 第 12 章

1

(THR) Lô-phò-àm ê kok kian-kò͘, i kiông-sēng ê sî, chiū khì-sak Iâ-hô-hoa ê lu̍t-hoat, Í-sek-lia̍t iā lóng tè i.

(BCL) 羅波安的國堅固，伊強盛的時就棄拺耶和華的律法，以色列也攏隨伊。

2

(THR) Lô-phò-àm ông gō͘--nî, Ai-kı̍p ông Sī-sat chiūⁿ-lâi kong-kek Iâ-lō͘-sat-léng; in-ūi in tek-chōe Iâ-hô-hoa.

(BCL) 羅波安王五年，埃及王示撒上來攻擊耶路撒冷，因為得罪耶和華。

3

(THR) Sī-sat ū chiàn-chhia chı̍t-chheng nn̄g-pah tiuⁿ, bé-peng la̍k-bān; koh tè i tùi Ai-kı̍p chhut-lâi ê lâng, chiū-sī Lō͘-pí lâng, So͘-ki lâng, Kó͘-sı̍t lâng, chōe kàu bōe-sǹg-tit.

(BCL) 示撒有戰車一千二百張，馬兵六萬，閣隨伊對埃及出來的人，就是路比人、蘇基人、古實人，多到算得。

4

(THR) I kong-chhú Iû-tāi kian-kò͘ ê siâⁿ, chiū lâi kàu Iâ-lō͘-sat-léng.

(BCL) 伊攻取猶大堅固的城，就來到耶路撒冷。

5

(THR) Hit-sî Iû-tāi ê siú-léng ūi-tio̍h Sī-sat ê iân-kò͘, chū-chı̍p tī Iâ-lō͘-sat-léng, sian-ti Sī-má-ngá lâi kìⁿ Lô-phò-àm kap hiah ê siú-léng, kā in kóng, Iâ-hô-hoa án-ni kóng, Lín khì-sak Góa, só͘-í Góa khì-sak lín tī Sī-sat ê chhiú.

(BCL) 彼時，猶大的首領為著示撒的緣故聚集佇耶路撒冷。先知示瑪雅來見羅波安及許個首領，給講：「耶和華按呢講：『恁棄拺我，所以我棄拺恁佇示撒的手。』」

6

(THR) Tùi án-ni Í-sek-lia̍t hiah ê siú-léng kap ông ka-kī khiam-pi, kóng, Iâ-hô-hoa sī kong-gī.

(BCL) 對按呢以色列許個首領及王家己謙卑講：「耶和華是公義。」

7

(THR) Iâ-hô-hoa khòaⁿ-kìⁿ in ka-kī khiam-pi, Iâ-hô-hoa ê ōe chiū lîm-kàu Sī-má-ngá kóng, In kì-jiân ka-kī khiam-pi, Góa bô beh châu-bia̍t in, beh hō͘ in lio̍h-á tit-tio̍h chín-kiù, Góa bô beh ēng Sī-sat ê chhiú piàⁿ-lo̍h Góa ê siū-khì tī Iâ-lō͘-sat-léng.

(BCL) 耶和華看見家己謙卑，耶和華的話就臨到示瑪雅講：「既然家己謙卑，我無欲剿滅；欲互略仔得著拯救，我無欲用示撒的手傾落我的受氣佇耶路撒冷。

8

(THR) Chóng-sī in beh chòe Sī-sat ê lô͘-po̍k, hō͘ in chai ho̍k-sāi Góa, kap ho̍k-sāi lia̍t-kok, ū sím-mı̍h hun-piat.

(BCL) 總是欲做示撒的奴僕，互知服事我及服事列國有甚麼分別。」

9

(THR) Tùi án-ni Ai-kı̍p ông Sī-sat chiūⁿ-lâi kong-kek Iâ-lō͘-sat-léng chhiúⁿ Iâ-hô-hoa tiān ê pó-mı̍h, kap ông-kiong ê pó-mı̍h, lóng tòa--khì; koh chhiúⁿ Só͘-lô-bûn só͘ chòe kim ê pîn-pâi.

(BCL) 對按呢，埃及王示撒上來攻擊耶路撒冷，搶耶和華殿的寶物及王宮的寶物，攏帶去，閣搶所羅門所做金的屏牌。

10

(THR) Lô-phò-àm ông chòe tâng ê pîn-pâi lâi thòe in, kau hō͘ siú ông-kiong mn̂g ê sī-ōe-tiúⁿ kò͘-siú.

(BCL) 羅波安王做銅的屏牌來替，交互守王宮門的侍衛長顧守。

11

(THR) Ông ta̍k-pái jı̍p Iâ-hô-hoa ê tiān, sī-ōe chiū tòa chiah ê pîn-pâi; āu-lâi chiū tòa tò-tńg lâi hē tī sī-ōe ê chhù.

(BCL) 王逐擺入耶和華的殿，侍衛就帶諸個屏牌，後來就帶倒轉來，下佇侍衛的厝。

12

(THR) Ông ka-kī khiam-pi ê sî, Iâ-hô-hoa ê siū-khì siu tò-tńg, bô it-chīn bia̍t--i; koh tī Iû-tāi ê tiong-kan iā ū hó ê tāi-chì.

(BCL) 王家己謙卑的時，耶和華的受氣收倒轉，無一盡滅伊，閣佇猶大的中間也有好的代誌。

13

(THR) Lô-phò-àm ông ka-kī kiông-sēng, tī Iâ-lō͘-sat-léng chòe ông. Lô-phò-àm chē-ūi ê sî sì-cha̍p-it hè, tī Iâ-lō͘-sat-léng, chiū-sī Iâ-hô-hoa tùi Í-sek-lia̍t chèng chi-phài-tiong só͘ kéng an-tì I ê miâ ê siâⁿ, chòe ông cha̍p chhit nî. I ê lāu-bú miâ kiò Ná-má, sī A-bûn lâng.

(BCL) 羅波安王家己強盛，佇耶路撒冷做王。羅波安坐位的時四十一歲，佇耶路撒冷，就是耶和華對以色列眾支派中所揀安置伊的名的城，做王十七年。伊的老母名叫拿瑪，是亞捫人。

14

(THR) Lô-phò-àm kiâⁿ pháiⁿ; in-ūi i bô tiāⁿ-tio̍h ì-sù chhē Iâ-hô-hoa.

(BCL) 羅波安行歹，因為伊無定著意思尋耶和華。

15

(THR) Lô-phò-àm só͘ kiâⁿ ê sū, tùi thâu kàu bé, kiám bô kì tī sian-ti Sī-má-ngá kap sian-kiàn E̍k-to ê chheh, lūn cho̍k-phó͘--ê mah? Lô-phò-àm kap Iâ-lô-phò-àm siông-siông kau-chiàn.

(BCL) 羅波安所行的事，對頭到尾豈無記佇先知示瑪雅及先見易多的冊，論族譜的嗎？羅波安及耶羅波安常常交戰。

16

(THR) Lô-phò-àm kap i ê lia̍t-chó͘ tâng-khùn, bâi-chòng tī Tāi-pı̍t siâⁿ; I ê kiáⁿ A-pí-ngá sòa-chiap i chòe ông.

(BCL) 羅波安及伊的列祖同睏，埋葬佇大衛城。伊的子亞比雅續接伊做王。

Bible Color Mark

• 台語漢字羅馬本
• 巴克禮全羅