歷代志下 第 23 章

1

(THR) Tē-chhit nî Iâ-hô-iâ-tāi ka-kī kiông-sēng; tiàu pé-chóng Iâ-lô-hán ê kiáⁿ A-sat-lī-ngá, Iok-hap-lân ê kiáⁿ Í-sı̍t-má-lī, Gô-pī-tek ê kiáⁿ A-sat-lī-ngá, A-tāi-ngá ê kiáⁿ Má-se-ngá, Sè-ki-lī ê kiáⁿ Í-lī-sa-hoat, hiah-ê lâi kap i lı̍p-iok.

(BCL) 第七年，耶何耶大家己強盛，召百總耶羅罕的子亞撒利雅，約哈難的子以實瑪利，俄備得的子亞撒利雅，亞大雅的子瑪西雅，細基利的子以利沙法，許個來及伊立約。

2

(THR) In piàn-kiâⁿ Iû-tāi, tùi Iû-tāi hiah ê siâⁿ chū-chı̍p Lī-bī lâng, kap Í-sek-lia̍t ê cho̍k-tiúⁿ, lóng kàu Iâ-lō͘-sat-léng.

(BCL) 遍行猶大，對猶大許個城聚集利未人及以色列的族長攏到耶路撒冷。

3

(THR) Chôan-hōe tī Siōng-tè ê tiān kap ông lı̍p-iok. I tùi in kóng, Khòaⁿ ah, ông ê kiáⁿ beh chòe ông, chiàu Iâ-hô-hoa lūn-kàu Tāi-pı̍t ê kiáⁿ-sun só͘ kóng--ê.

(BCL) 全會佇上帝的殿及王立約。伊對講：「看啊，王的子欲做王，照耶和華論到大衛的子孫所講的；

4

(THR) Taⁿ lín tio̍h án-ni kiâⁿ; lín chiah ê chè-si kap Lī-bī lâng, saⁿ-hūn-chı̍t tī an-hioh-jı̍t jı̍p--lâi--ê, tio̍h chòe kò͘-mn̂g--ê;

(BCL) 今恁著按呢行：恁諸個祭司及利未人三份一佇安息日入來者，著做顧門者，

5

(THR) saⁿ-hūn-chı̍t tio̍h tī ông-kiong, saⁿ-hūn-chı̍t tio̍h tī tōe-ki ê mn̂g; peh-sìⁿ lóng tio̍h tī Iâ-hô-hoa tiān-lāi ê īⁿ.

(BCL) 三份一著佇王宮，三份一著佇地基的門；百姓攏著佇耶和華殿內的院。

6

(THR) To̍k-to̍k chè-si, kap teh ho̍k-sāi ê Lī-bī lâng í-gōa, pa̍t-lâng m̄-thang jı̍p Iâ-hô-hoa ê tiān; chiah ê lâng thang jı̍p-khì, in-ūi in sī sèng. Chóng-sī chèng peh-sìⁿ tio̍h ūi-tio̍h Iâ-hô-hoa lâi kò͘-siú.

(BCL) 獨獨祭司及服事的利未人以外，別人呣通入耶和華的殿；諸個人通入去，因為是聖。總是眾百姓著為著耶和華來顧守。

7

(THR) Lī-bī lâng ta̍k-ê chhiú tio̍h kia̍h kun-khì, sì-ûi pó-hō͘ ông; kìⁿ-nā chū-choan jı̍p-tiān--ê tio̍h hō͘ i sí; ông chhut-jı̍p ê sî, lín tio̍h kun-sûi i.

(BCL) 利未人逐個手著抬軍器，四圍保護王；見若自專入殿者，著互伊死。王出入的時，恁著跟隨伊。」

8

(THR) Lī-bī lâng, kap Iû-tāi chèng-lâng, chiàu chè-si Iâ-hô-iâ-tāi it-chhè só͘ bēng-lēng-ê khì kiâⁿ; ta̍k-lâng tòa in lûn-tio̍h an-hioh-jı̍t jı̍p-lâi ê lâng, kap lûn-tio̍h an-hioh-jı̍t chhut-khì ê lâng; in-ūi chè-si Iâ-hô-iâ-tāi m̄-chún in sòaⁿ-pan.

(BCL) 利未人及猶大眾人照祭司耶何耶大一切所命令的去行，逐人帶輪著安息日入來的人及輪著安息日出去的人，因為祭司耶何耶大呣准散班。

9

(THR) Chè-si Iâ-hô-iâ-tāi chiū chiong Siōng-tè tiān-lāi só͘ khǹg Tāi-pı̍t ông ê chhiuⁿ, pîn-pâi, tōa-pâi, kau hō͘ hiah ê pé-chóng.

(BCL) 祭司耶何耶大就將上帝殿內所囥大衛王的槍、屏牌、大牌交互許個百總，

10

(THR) Koh phài chèng peh-sìⁿ, chhiú ta̍k-ê kia̍h ke-si, tī tôaⁿ kap tiān hia, tùi tiān ê chiàⁿ-pêng kàu tiān ê tò-pêng, khiā tī ông ê sì-ûi.

(BCL) 閣派眾百姓手逐個抬家私，佇壇及殿遐，對殿的正旁到殿的倒旁，徛佇王的四圍；

11

(THR) In chiū chhōa ông ê kiáⁿ chhut-lâi, kā i tì bián-liû, chiong lu̍t-hoat ê chheh hō͘ i; Iâ-hô-iâ-tāi kap i hiah ê kiáⁿ ēng iû boah i, siat-lı̍p i chòe ông; chèng-lâng kóng, Gōan ông bān-sòe.

(BCL) 就導王的子出來，給伊戴冕旒，將律法的冊互伊。耶何耶大及伊許個子用油抹伊，設立伊做王，眾人講：「願王萬歲。」

12

(THR) A-tha-lī-ngá thiaⁿ-kìⁿ peh-sìⁿ cháu-lâi, o-ló ông ê siaⁿ, chiū kàu peh-sìⁿ hia, jı̍p Iâ-hô-hoa ê tiān;

(BCL) 亞她利雅聽見百姓走來謳咾王的聲，就到百姓遐，入耶和華的殿，

13

(THR) khòaⁿ-kìⁿ ông khiā tī tiān-mn̂g ê thiāu-piⁿ, hiah ê kun-tiúⁿ kap pûn hō-thâu--ê khiā tī ông ê chó-iū; peh-sìⁿ hoaⁿ-hí pûn hō-thâu; koh ū chhiùⁿ-koa--ê, ēng ta̍k-iūⁿ ê ga̍k-khì, chhōa chèng-lâng o-ló, A-tha-lī-ngá chiū thiah-lı̍h i ê saⁿ, hoah kóng, Hóan-pōan lah, hóan-pōan lah.

(BCL) 看見王徛佇殿門的柱邊，許個軍長及歕號頭者徛佇王的左右，百姓歡喜歕號頭，閣有唱歌的，用逐樣的樂器導眾人謳咾；亞她利雅就拆裂伊的衫，喝講：「反叛啦！反叛啦！」

14

(THR) Chè-si Iâ-hô-iâ-tāi chhōa kóan-hat kun-tūi ê pé-chóng, tùi in kóng, Tùi pan-lia̍t ê tiong-kan kóaⁿ i chhut-khì, kìⁿ-nā tè i ê tio̍h ēng to thâi-sí i; in-ūi chè-si kóng, M̄-thang tī Iâ-hô-hoa ê tiān thâi i.

(BCL) 祭司耶何耶大導管轄軍隊的百總，對講：「對班列的中間趕伊出去，見若隨伊的著用刀死伊！」因為祭司講：「呣通佇耶和華的殿伊。」

15

(THR) In siám-khui siang-pêng, hō͘ i khì; i kiâⁿ kàu ông-kiong Bé ê mn̂g, chiū tī-hia thâi-sí i.

(BCL) 閃開雙旁，互伊去；伊行到王宮馬的門，就佇遐死伊。

16

(THR) Iâ-hô-iâ-tāi tī pún-sin, kap peh-sìⁿ, kap ông ê tiong-kan lı̍p-iok, lóng beh chòe Iâ-hô-hoa ê peh-sìⁿ.

(BCL) 耶何耶大佇本身及百姓及王的中間立約，攏欲做耶和華的百姓。

17

(THR) Tùi án-ni chèng peh-sìⁿ kàu Pa-le̍k ê biō, thiah-húi i, phah-chhùi i hiah ê tôaⁿ kap ngó͘-siōng, koh tī tôaⁿ-chêng phah-sí Pa-le̍k ê chè-si Má-thán.

(BCL) 對按呢眾百姓到巴力的廟，拆毀伊，拍碎伊許個壇及偶像，閣佇壇前拍死巴力的祭司瑪坦。

18

(THR) Iâ-hô-iâ-tāi koh chiàu Tāi-pı̍t chá-jı̍t só͘ tiāⁿ-tio̍h--ê, siat-lı̍p chè-si Lī-bī lâng tam-tng Iâ-hô-hoa tiān ê chit, chêng Tāi-pı̍t ēng chit ê pan-lia̍t phài tī Iâ-hô-hoa ê tiān, hō͘ in hoaⁿ-hí chhiùⁿ-koa, hiàn Iâ-hô-hoa ê sio-chè, chiàu só͘ kì-chài tī Mô͘-se ê lu̍t-hoat--ê.

(BCL) 耶何耶大閣照大衛早日所定著的，設立祭司利未人擔當耶和華殿的職。前大衛用此個班列派佇耶和華的殿，互歡喜唱歌，獻耶和華的燒祭，照所記載佇摩西的律法的；

19

(THR) I iā siat kò͘-mn̂g--ê tī Iâ-hô-hoa ê tiān hiah ê mn̂g; bô-lūn siáⁿ-tāi, bô chheng-khì--ê bōe--tit jı̍p-khì.

(BCL) 伊也設顧門者佇耶和華的殿許個門，無論啥代，無清氣者得入去。

20

(THR) Koh tòa pé-chóng kap kùi-cho̍k, kap peh-sìⁿ ê siú-léng, kap kok-lāi ê chèng peh-sìⁿ, tùi Iâ-hô-hoa ê tiān chhōa ông lo̍h-lâi; tùi téng ê mn̂g chìn-jı̍p ông-kiong, hō͘ ông chē kok-ūi.

(BCL) 閣帶百總及貴族；及百姓的首領，及國內的眾百姓，對耶和華的殿導王落來，對頂的門進入王宮，互王坐國位。

21

(THR) Kok-lāi chèng peh-sìⁿ lóng hoaⁿ-hí, thong siâⁿ an-chēng, in ēng to thâi-sí A-tha-lī-ngá.

(BCL) 國內眾百姓攏歡喜，通城安靜。用刀死亞她利雅。

Bible Color Mark

• 台語漢字羅馬本
• 巴克禮全羅