歷代志下 第 27 章

1

(THR) Iok-thán chē-ūi ê sî, jī-cha̍p-gō͘ hè, tī Iâ-lō͘-sat-léng chòe ông le̍k-kè cha̍p-la̍k nî. I ê lāu-bú miâ kiò Iâ-lō͘-sa, sī Sat-tok ê cha-bó͘-kiáⁿ.

(BCL) 約坦坐位的時二十五歲，佇耶路撒冷做王歷過十六年，伊的老母名叫耶路沙，是撒督的查某子。

2

(THR) Iok-thán kiâⁿ Iâ-hô-hoa só͘ khòaⁿ-chòe hó ê sū, chiàu i ê lāu-pē Ou-se-ngá it-chhè só͘ kiâⁿ ê, to̍k-to̍k bô jı̍p Iâ-hô-hoa ê tiān. Chóng-sī peh-sìⁿ só͘ kiâⁿ iû-gôan hú-pāi.

(BCL) 約坦行耶和華所看做好的事，照伊的老父烏西雅一切所行的，獨獨無入耶和華的殿。總是百姓所行猶原腐敗。

3

(THR) Iok-thán khí Iâ-hô-hoa tiān ê téng-mn̂g; koh tī Gô-húi-le̍k siâⁿ-téng khí chōe-chōe

(BCL) 約坦起耶和華殿的頂門，閣佇俄斐勒城頂起多多，

4

(THR) Koh tī Iû-tāi soaⁿ-tōe khí siâⁿ, tī chhiū-nâ-lāi khí iâⁿ-chē, kap bāng-ko-lâu.

(BCL) 閣佇猶大山地起城，佇樹林內起營寨及望高樓。

5

(THR) I kap A-bûn lâng ê ông kau-chiàn, khah-iâⁿ in. Tng hit-nî A-bûn lâng chìn-kòng gûn chı̍t-pah tha-liân-tek, sió-be̍h chı̍t-bān ko-jíⁿ, tōa-be̍h chı̍t-bān ko-jíⁿ; tē-jī nî, tē-saⁿ nî, A-bûn lâng iā sī án-ni chìn-kòng.

(BCL) 伊及亞捫人的王交戰卡贏，當彼年亞捫人進貢銀一百他連得，小麥一萬歌珥，大麥一萬歌珥；第二年、第三年亞捫人也是按呢進貢。

6

(THR) Iok-thán chiām-chiām kiông-sēng; in-ūi i tī Iâ-hô-hoa i ê Siōng-tè ê bīn-chêng kín-sīn kiâⁿ chèng-tı̍t ê lō͘.

(BCL) 約坦漸漸強盛，因為伊佇耶和華──伊的上帝的面前謹慎行正直的路。

7

(THR) Iok-thán kî-û ê sū, kap it-chhè ê kau-chiàn, lóng kì tī Í-sek-lia̍t kap Iû-tāi lia̍t-ông ê kì-lio̍k.

(BCL) 約坦其餘的事及一切的交戰，攏記佇以色列及猶大列王的記錄。

8

(THR) I chē-ūi ê sî, jī-cha̍p-gō͘ hè, tī Iâ-lō͘-sat-léng chòe ông le̍k-kè cha̍p-la̍k nî.

(BCL) 伊坐位的時二十五歲，佇耶路撒冷做王歷過十六年。

9

(THR) Iok-thán kap i ê lia̍t-chó͘ tâng khùn, bâi-chòng tī Tāi-pı̍t siâⁿ. I ê kiáⁿ A-hap-su sòa-chiap i chòe ông.

(BCL) 約坦及伊的列祖同睏，埋葬佇大衛城。伊的子亞哈斯接伊做王。

Bible Color Mark

• 台語漢字羅馬本
• 巴克禮全羅