歷代志下 第 33 章

1

(THR) Má-ná-se chē-ūi ê sî, cha̍p-jī hè, tī Iâ-lō͘-sat-léng chòe ông kiōng gō͘-cha̍p-gō͘ nî.

(BCL) 瑪拿西坐位的時十二歲，佇耶路撒冷做王共五十五年。

2

(THR) I kiâⁿ Iâ-hô-hoa só͘ khòaⁿ-chòe pháiⁿ ê sū, o̍h gōa-pang lâng só͘ kiâⁿ khó-ò͘ⁿ ê sū, chiū-sī Iâ-hô-hoa tī Í-sek-lia̍t ê bīn-chêng só͘ kóaⁿ-chhut--ê.

(BCL) 伊行耶和華所看做歹的事，學外邦人所行可惡的事就是耶和華佇以色列的面前所趕出的，

3

(THR) In-ūi i ê lāu-pē Hi-se-ka só͘ húi-hōai ê soaⁿ-thâu-tôaⁿ i koh khí i, koh ūi hiah ê Pa-le̍k khí tôaⁿ, chòe A-su-tha-lio̍k; koh kèng-pài thiⁿ-téng ê bān-siōng lâi ho̍k-sāi i.

(BCL) 因為伊的老父希西家所毀壞的山頭壇伊閣起伊，閣為許個巴力起壇，做亞斯他錄，閣敬拜天頂的萬象來服事伊，

4

(THR) Tī Iâ-hô-hoa ê tiān-lāi khí kúi-nā ê tôaⁿ; Iâ-hô-hoa bat kí chit ê tiān kóng, Góa ê miâ beh éng-óan tī Iâ-lō͘-sat-léng.

(BCL) 佇耶和華的殿內起幾若個壇──耶和華曾指此個殿講：「我的名欲永遠佇耶路撒冷。」

5

(THR) I tī Iâ-hô-hoa ê tiān nn̄g ê īⁿ-lāi, ūi-tio̍h thiⁿ-téng ê bān-siōng khí tôaⁿ.

(BCL) 伊佇耶和華的殿二個院內為著天頂的萬象起壇，

6

(THR) Koh tī Piān-him-lùn ê soaⁿ-kok, hō͘ i ê kiáⁿ-jî keng-kè hé, koh khòaⁿ tiāu-thâu, ēng hoat-su̍t, chòe-khiò, ēng thiàu-tâng--ê, chhiáⁿ sai-kong, kiâⁿ chōe-chōe Iâ-hô-hoa só͘ khòaⁿ-chòe pháiⁿ ê sū, kek I siū-khì.

(BCL) 閣佇便欣嫩的山谷互伊的子兒經過火，閣看兆頭，用法術，做　，用跳童者，請師公行多多耶和華所看做歹的事，激伊受氣，

7

(THR) Koh tī Siōng-tè ê tiān-lāi, chhāi i só͘ chō tiau-khek ê siōng, chit keng tiān sī Siōng-tè bat tùi Tāi-pı̍t kap i ê kiáⁿ Só͘-lô-bûn kí i lâi kóng, Chit keng tiān kap Iâ-lō͘-sat-léng chiū-sī Góa tī Í-sek-lia̍t chèng chi-phài-tiong só͘-kéng--ê, Góa beh an-tì Góa ê miâ tī-hia kàu éng-óan.

(BCL) 閣佇上帝的殿內祀伊所造雕刻的像。此間殿是上帝曾對大衛及伊的子所羅門指伊來講：「此間殿及耶路撒冷就是我佇以色列眾支派中所揀的，我欲安置我的名佇遐到永遠。

8

(THR) Í-sek-lia̍t lâng nā chip-siú lâi kiâⁿ Góa it-chhè só͘ bēng-lēng in ê, chiū-sī Góa thok Mô͘-se só͘ thôan it-chhè ê hoat-tō͘, lu̍t-lē, lé-gî, Góa chiū bô koh î-sóa in ê kha lī-khui Góa só͘ tiāⁿ-tio̍h hō͘ lín lia̍t-chó͘ ê tōe.

(BCL) 以色列人若執守來行我一切所命令的就是我託摩西所傳一切的法度、律例、禮儀，我就無閣移徙的腳離開我所定著互恁列祖的地。」

9

(THR) Má-ná-se bê-he̍k Iû-tāi kap Iâ-lō͘-sat-léng khiā-khí ê peh-sìⁿ, tì-kàu in kiâⁿ pháiⁿ pí Iâ-hô-hoa tī Í-sek-lia̍t lâng ê bīn-chêng só͘ bia̍t ê lia̍t-kok koh-khah siong-tiōng.

(BCL) 瑪拿西迷惑猶大及耶路撒冷徛起的百姓致到行歹比耶和華佇以色列人的面前所滅的列國閣卡傷重。

10

(THR) Iâ-hô-hoa hoan-hù Má-ná-se kap i ê peh-sìⁿ, chóng-sī in bô beh thiaⁿ.

(BCL) 耶和華吩咐瑪拿西及伊的百姓，總是無欲聽。

11

(THR) Só͘-í Iâ-hô-hoa hō͘ A-su̍t ông ê kun-tiúⁿ lâi kong-kek in, ēng kau kau-tio̍h Má-ná-se, ēng tâng-liān pa̍k i, tòa kàu Pa-pí-lûn.

(BCL) 所以耶和華互亞述王的軍長來攻擊，用著瑪拿西，用銅鍊縛伊，帶到巴比倫。

12

(THR) I tī hōan-lān ê sî, chiū khún-kiû Iâ-hô-hoa i ê Siōng-tè, koh tī i ê lia̍t-chó͘ ê Siōng-tè ê bīn-chêng ke̍k-kî khiam-pi.

(BCL) 伊佇患難的時，就懇求耶和華──伊的上帝，閣佇伊的列祖的上帝的面前極其謙卑。

13

(THR) I kiû-kiò I, Siōng-tè chún i só͘ kiû, thiaⁿ i kî-tó, hō͘ i tò-lâi Iâ-lō͘-sat-léng, iû-gôan chē i ê kok-ūi; Má-ná-se chiah chai Iâ-hô-hoa sī Siōng-tè.

(BCL) 伊求叫伊，上帝准伊所求，聽伊祈禱，互伊倒來耶路撒冷，猶原坐伊的國位。瑪拿西才知耶和華是上帝。

14

(THR) Chit-tia̍p liáu-āu Má-ná-se khí chhiûⁿ tī Tāi-pı̍t ê siâⁿ-gōa, tī Ki-hùn ê sai-pêng, tī soaⁿ-kok-lāi, kàu Hî-mn̂g ê mn̂g-kháu, ûi-se̍h Gô-húi-le̍k, chhiûⁿ khí chin kôaiⁿ, koh siat-lı̍p kun-tiúⁿ tī Iû-tāi hiah ê kian-kò͘ ê siâⁿ-lāi.

(BCL) 此霎了後，瑪拿西起牆佇大衛的城外，佇基訓的西旁佇山谷內到魚門的門口，圍踅俄裴勒，牆起真高；閣設立軍長佇猶大許個堅固的城內；

15

(THR) Koh tùi Iâ-hô-hoa ê tiān tû-khì hiah ê gōa-pang ê siōng-tè kap ngó͘-siōng; koh tī Iâ-hô-hoa tiān ê soaⁿ, kap Iâ-lō͘-sat-léng só͘ khí hiah ê tôaⁿ, lóng hiat tī siâⁿ-gōa.

(BCL) 閣對耶和華的殿除去許個外邦的上帝及偶像，閣佇耶和華殿的山及耶路撒冷所起許個壇攏佇城外；

16

(THR) Koh khí Iâ-hô-hoa ê chè-tôaⁿ, tī tôaⁿ-téng hiàn siā-un-chè, kám-siā-chè, bēng-lēng Iû-tāi lâng ho̍k-sāi Iâ-hô-hoa Í-sek-lia̍t ê Siōng-tè.

(BCL) 閣起耶和華的祭壇，佇壇頂獻謝恩祭、感謝祭，命令猶大人服事耶和華──以色列的上帝。

17

(THR) Chóng-sī peh-sìⁿ iû-gôan tī soaⁿ-thâu-tôaⁿ hiàn-chè, to̍k-to̍k hiàn hō͘ Iâ-hô-hoa i ê Siōng-tè nā-tiāⁿ.

(BCL) 總是百姓猶原佇山頭壇獻祭，獨獨獻互耶和華──伊的上帝若定。

18

(THR) Má-ná-se kî-û ê sū, kap i kî-tó Siōng-tè ê ōe, kap sian-kiàn hōng Iâ-hô-hoa Í-sek-lia̍t ê Siōng-tè ê miâ tùi i kóng hiah ê ōe, lóng kì tī Í-sek-lia̍t chiah ê ông ê kì-lio̍k.

(BCL) 瑪拿西其餘的事及伊祈禱上帝的話，及先見奉耶和華──以色列的上帝的名對伊講許個話，攏記佇以色列諸個王的記錄。

19

(THR) I ê kî-tó, kap Siōng-tè cháiⁿ-iūⁿ ún-chún i, i bē khiam-pi í-chêng ê chōe-kòa kè-sit, kap khí soaⁿ-thâu-tôaⁿ, siat-lı̍p hiah ê A-sià-la̍h kap tiau-khek ngó͘-siōng hiah ê só͘-chāi, lóng kì tī Hô-sài ê sú-kì.

(BCL) 伊的祈禱，及上帝怎樣允准伊，伊未謙卑以前的罪過過失，及起山頭壇設立許個亞舍拉及雕刻偶像許個所在，攏記佇何賽的史記。

20

(THR) Má-ná-se kap i ê lia̍t-chó͘ tâng khùn, bâi-chòng tī ka-kī ê kiong-lāi; i ê kiáⁿ A-bûn sòa-chiap i chòe ông.

(BCL) 瑪拿西及伊的列祖同睏，埋葬佇家己的宮內。伊的子亞們續接伊做王。

21

(THR) A-bûn chē-ūi ê sî, jī-cha̍p-jī hè, tī Iâ-lō͘-sat-léng chòe ông le̍k-kè nn̄g nî.

(BCL) 亞們坐位的時二十二歲，佇耶路撒冷做王歷過二年。

22

(THR) I kiâⁿ Iâ-hô-hoa só͘ khòaⁿ-chòe pháiⁿ ê sū, o̍h i ê lāu-pē Má-ná-se só͘ chòe ê, A-bûn chè-sū i ê lāu-pē Má-ná-se só͘ chō hiah ê tiau-khek ê ngó͘-siōng lâi ho̍k-sāi i.

(BCL) 伊行耶和華所看做歹的事，學伊的老父瑪拿西所做的，亞們祭祀伊的老父瑪拿西所造許個雕刻的偶像來服事伊，

23

(THR) Bô ka-kī khiam-pi tī Iâ-hô-hoa ê bīn-chêng, chhin-chhiūⁿ i ê lāu-pē Má-ná-se ê ka-kī khiam-pi; chit ê A-bûn ná-kú ná hōan-chōe.

(BCL) 無家己謙卑佇耶和華的面前，親像伊的老父瑪拿西的家己謙卑。此個亞們愈久愈犯罪。

24

(THR) I ê jîn-sîn pōe-pōan i, thâi-sí i tī ông-kiong-lāi.

(BCL) 伊的人臣背叛伊，死伊佇王宮內。

25

(THR) Chóng-sī kok-bîn thâi-sí hiah ê pōe-pōan A-bûn ông ê lâng; kok-bîn chiū siat-lı̍p i ê kiáⁿ Iok-se-a sòa-chiap i chòe ông.

(BCL) 總是國民死許個背叛亞們王的人，國民就設立伊的子約西亞續接伊做王。

Bible Color Mark

• 台語漢字羅馬本
• 巴克禮全羅