歷代志下 第 6 章

1

(THR) Hit-sî Só͘-lô-bûn kóng, Iâ-hô-hoa bat kóng, I beh tiàm tī o͘-o͘ àm-àm ê tiong-kan.

(BCL) 彼時，所羅門講：耶和華曾講伊欲踮佇黑黑暗暗的中間。

2

(THR) Chóng-sī góa í-keng khí chı̍t keng tiān hō͘ Lí khiā-khí, chòe Lí éng-óan tòa ê só͘-chāi.

(BCL) 總是我已經起一間殿互你徛起，做你永遠住的所在。

3

(THR) Ông o̍at-tńg i ê bīn, chiok-hok Í-sek-lia̍t ê hōe-chiòng, Í-sek-lia̍t hōe-chiòng lóng khiā--khí-lâi.

(BCL) 王越轉伊的面祝福以色列的會眾，以色列會眾攏徛起來。

4

(THR) I kóng, Iâ-hô-hoa Í-sek-lia̍t ê Siōng-tè sī eng-kai o-ló--ê; in-ūi I chhin-chhùi tùi góa ê pē Tāi-pı̍t só͘ èng-ún ê, chhin-chhiú èng-giām--i, kóng,

(BCL) 伊講：「耶和華──以色列的上帝是應該謳咾者！因為伊親嘴對我的父大衛所應允的，親手應驗伊。

5

(THR) Tùi Góa chhōa Góa ê peh-sìⁿ chhut Ai-kı̍p tōe í-lâi, Góa bē-bat tī Í-sek-lia̍t chèng chi-phài tiong kéng chı̍t ê siâⁿ lâi khí tiān hō͘ Góa ê miâ tiàm tī-hia; iā bē-bat kéng lâng chòe Góa ê peh-sìⁿ Í-sek-lia̍t ê jîn-kun;

(BCL) 講：『對我導我的百姓出埃及地以來，我未曾佇以色列眾支派中揀一個城來起殿互我的名踮佇遐，也未曾揀人做我的百姓以色列的仁君；

6

(THR) to̍k-to̍k kéng Iâ-lō͘-sat-léng hō͘ Góa ê miâ tiàm tī-hia, koh kéng Tāi-pı̍t tī-lí Góa ê peh-sìⁿ Í-sek-lia̍t.

(BCL) 獨獨揀耶路撒冷互我的名踮佇遐，閣揀大衛治理我的百姓以色列。』

7

(THR) Góa ê pē Tāi-pı̍t sim-lāi ū ì-sù, beh ūi Iâ-hô-hoa Í-sek-lia̍t ê Siōng-tè ê miâ khí tiān.

(BCL) 「我的父大衛心內有意思，欲為耶和華──以色列的上帝的名起殿，

8

(THR) Chóng-sī Iâ-hô-hoa tùi góa ê pē Tāi-pı̍t kóng, Lí ê sim ū ì-sù beh ūi Góa ê miâ khí tiān, lí chit ê ì-sù chin-hó;

(BCL) 總是耶和華對我的父大衛講：『你的心有意思欲為我的名起殿，你此個意思真好；

9

(THR) to̍k-to̍k lí m̄-thang khí tiān, lí só͘ chhin-siⁿ ê kiáⁿ beh ūi Góa ê miâ khí tiān.

(BCL) 獨獨你呣通起殿，你所親生的子欲為我的名起殿。』

10

(THR) Taⁿ Iâ-hô-hoa èng-giām I só͘ kóng ê ōe; Góa chiàu Iâ-hô-hoa ê ōe khí-lâi sòa-chiap góa ê pē Tāi-pı̍t, chē Í-sek-lia̍t ê kok-ūi; koh ūi Iâ-hô-hoa Í-sek-lia̍t Siōng-tè ê miâ khí tiān.

(BCL) 「今耶和華應驗伊所講的話，我照耶和華的話起來續接我的父大衛，坐以色列的國位，閣為耶和華──以色列上帝的名起殿。

11

(THR) Góa an-tì iok-kūi tī-hia; kūi-lāi ū Iâ-hô-hoa ê iok, chiū-sī I kap Í-sek-lia̍t lâng só͘ lı̍p ê iok.

(BCL) 我安置約櫃佇遐，櫃內有耶和華的約，就是伊及以色列人所立的約。」

12

(THR) Ông tng Í-sek-lia̍t hōe-chiòng ê bīn-chêng, khiā tī Iâ-hô-hoa ê tôaⁿ-chêng, kia̍h-khí chhiú;

(BCL) 王當以色列會眾的面前，徛佇耶和華的壇前，抬起手，（

13

(THR) (in-ūi Só͘-lô-bûn bat chō chı̍t ê tâng-tâi, tn̂g gō͘-tiú, khoah gō͘-tiú, kôaiⁿ saⁿ-tiú, hē tī īⁿ-tiong; chiū khiā tī tâi-téng, tng Í-sek-lia̍t hōe-chiòng ê bīn-chêng kūi--lo̍h-khì, kia̍h-khí chhiú ǹg thiⁿ,) kóng,

(BCL) 因為所羅門曾造一個銅台，長五肘，闊五肘，高三肘，下佇院中），就徛佇台頂，當以色列會眾的面前跪落去，抬起手向天，

14

(THR) Iâ-hô-hoa Í-sek-lia̍t ê Siōng-tè ah, tī thiⁿ--nih, tī tōe--nih, bô ū siōng-tè chhin-chhiūⁿ Lí, siú iok kiâⁿ chû-ài tī Lí hiah ê lô͘-po̍k, chiū-sī chīn-sim kiâⁿ tī Lí ê bīn-chêng--ê.

(BCL) 講：「耶和華──以色列的上帝啊，佇天裡，佇地裡無有上帝親像你！守約行慈愛佇你許個奴僕，就是盡心行佇你的面前者；

15

(THR) Lí tùi Lí ê lô͘-po̍k, góa ê pē Tāi-pı̍t, só͘ èng-ún ê, Lí ū siú--i; Lí chhin-chhùi kóng--ê, chhin-chhiú èng-giām--i, chiàu kin-á-jı̍t ê khóan.

(BCL) 你對你的奴僕──我的父大衛所應允的你有守伊。你親嘴講的，親手應驗伊，照今仔日的款。

16

(THR) Iâ-hô-hoa Í-sek-lia̍t ê Siōng-tè ah, Lí só͘ èng-ún Lí ê lô͘-po̍k góa ê pē Tāi-pı̍t, kóng, Lí ê kiáⁿ-sun nā kín-sīn in ê só͘-chòe, kiâⁿ Góa ê lu̍t-hoat, chhin-chhiūⁿ lí kiâⁿ tī góa ê bīn-chêng, chiū sio̍k tī lí-ê beh tī Góa ê bīn-chêng chē Í-sek-lia̍t ê kok-ūi éng bô tn̄g, taⁿ kiû Lí èng-giām i.

(BCL) 耶和華──以色列的上帝啊，你所應允你的奴僕──我的父大衛講：『你的子孫若謹慎的所做，行我的律法，親像你行佇我的面前，就屬佇你的欲佇我的面前坐以色列的國位永無斷。』今求你應驗伊。

17

(THR) Iâ-hô-hoa, Í-sek-lia̍t ê Siōng-tè ah, Lí tùi Lí ê lô͘-po̍k Tāi-pı̍t só͘ kóng-ê, kiû Lí hō͘ i chiâⁿ-chòe sı̍t-sū.

(BCL) 耶和華──以色列的上帝啊，你對你的奴僕大衛所講的，求你互伊成做實事。

18

(THR) Siōng-tè kiám chin-chiàⁿ beh kap sè-kan lâng khiā-khí tōe-chiūⁿ mah? Khòaⁿ ah, thiⁿ kap chiah ê thiⁿ ê thiⁿ, siōng-chhiáⁿ bô kàu-gia̍h hō͘ Lí khiā-khí, hô-hòng góa só͘ khí chit keng tiān ah?

(BCL) 「上帝豈真正欲及世間人徛起地上嗎？看啊，天及諸個天的天尚且無夠額互你徛起，何況我所起此間殿啊？

19

(THR) Iâ-hô-hoa góa ê Siōng-tè ah, gōan Lí àⁿ-lo̍h siàu-liām Lí ê lô͘-po̍k ê kî-tó khún-kiû, lâi thiaⁿ Lí ê lô͘-po̍k só͘ kî-tó tī Lí ê bīn-chêng ê kiû-kiò kî-tó;

(BCL) 耶和華──我的上帝啊，願你俯落數念你的奴僕的祈禱懇求，來聽你的奴僕所祈禱佇你的面前的求叫祈禱。

20

(THR) gōan Lí jı̍t-mî khòaⁿ-kò͘ chit ê tiān, chiū-sī Lí só͘ kóng-khí beh an-tì Lí ê miâ tī-hia ê só͘-chāi, lâi thiaⁿ Lí ê lô͘-po̍k só͘ beh ǹg chit só͘-chāi kî-tó ê kî-tó.

(BCL) 願你日暝看顧此個殿，就是你所講起欲安置你的名佇遐的所在；來聽你的奴僕所欲向此所在祈禱的祈禱。

21

(THR) Lí ê lô͘-po̍k kap Lí ê peh-sìⁿ Í-sek-lia̍t ǹg chit só͘-chāi kî-tó ê sî, gōan Lí thiaⁿ in ê kî-kiû, gōan Lí tùi thiⁿ, Lí khiā-khí ê só͘-chāi, lâi thiaⁿ in; Lí thiaⁿ-kìⁿ ê sî chiū sià-bián.

(BCL) 你的奴僕及你的百姓以色列向此所在祈禱的時，願你聽的祈求，願你對天你徛起的所在來聽，你聽見的時就赦免。

22

(THR) Lâng nā tek-chōe i ê chhù-piⁿ, iā ū lâng ēng chı̍t ê chiù-chōa kah i chiù-chōa, i nā lâi chit keng tiān, tī Lí ê tôaⁿ-chêng chiù-chōa;

(BCL) 「人若得罪伊的厝邊，也有人用一個咒誓教伊咒誓，伊若來此間殿，佇你的壇前咒誓，

23

(THR) kiû Lí tùi thiⁿ thiaⁿ lâi pān-lí i, sím-phòaⁿ Lí chiah ê lô͘-po̍k, tēng pháiⁿ-lâng ê chōe, chiàu i só͘ kiâⁿ--ê, pò-èng tī i ê thâu-khak; tēng gī-lâng chòe gī, chiàu i ê gī lâi hō͘ i.

(BCL) 求你對天聽來辦理伊，審判你諸個奴僕，定歹人的罪，照伊所行的報應佇伊的頭殼；定義人做義，照伊的義來互伊。

24

(THR) Siat-sú Lí ê peh-sìⁿ Í-sek-lia̍t, in-ūi tek-chōe Lí, chiah thâi-su tī tùi-te̍k ê bīn-chêng, in nā kui-ǹg Lí, jīn Lí ê miâ, koh tī chit keng tiān kî-tó khún-kiû Lí;

(BCL) 「設使你的百姓以色列因為得罪你，才輸佇對敵的面前，若歸向你認你的名，閣佇此間殿祈禱懇求你，

25

(THR) kiû Lí tùi thiⁿ thiaⁿ in, lâi sià-bián Lí ê peh-sìⁿ Í-sek-lia̍t ê chōe, hō͘ in tò-lâi Lí só͘ siúⁿ-sù in, kap in lia̍t-chó͘ ê tōe.

(BCL) 求你對天聽，來赦免你的百姓以色列的罪，互倒來你所賞賜，及列祖的地。

26

(THR) Siat-sú in tek-chōe Lí, tì-kàu thiⁿ koaiⁿ-ba̍t bô lo̍h-hō͘; Lí hêng-ho̍at in ê sî, in nā ǹg chit só͘-chāi kî-tó, jīn Lí ê miâ, lī-khui in ê chōe;

(BCL) 「設使得罪你，致到天關密無落雨，你刑罰的時，若向此所在祈禱，認你的名，離開的罪，

27

(THR) kiû Lí tī thiⁿ--nih thiaⁿ in, sià-bián Lí ê lô͘-po̍k kap Lí ê peh-sìⁿ Í-sek-lia̍t ê chōe, tī Lí kà-sī in só͘ tio̍h kiâⁿ ê hó-lō͘ ê sî, koh lo̍h-hō͘ tī Lí ê tōe, chiū-sī Lí siúⁿ-sù Lí ê peh-sìⁿ chòe gia̍p ê.

(BCL) 求你佇天裡聽，赦免你的奴僕及你的百姓以色列的罪，佇你教示所著行的好路的時，閣落雨佇你的地，就是你賞賜你的百姓做業的。

28

(THR) Chit ê tōe nā ū ki-hng, un-e̍k, ko͘-tâ, hiú-nōa, chháu-meh, chián-thâng, á-sī in hiah ê tùi-te̍k, tī in hiah ê siâⁿ ê tōe, ûi-khùn in, bô-lūn ū sím-mı̍h chai-ē, sím-mı̍h phòa-pīⁿ;

(BCL) 「此個地若有飢荒、瘟疫、枯焦、朽爛、草蜢、剪蟲，抑是許個對敵，佇許個城的地圍困，無論有甚麼災禍甚麼破病，

29

(THR) he̍k-sī chı̍t-lâng, he̍k-sī Lí ê peh-sìⁿ Í-sek-lia̍t ê chèng-lâng, ta̍k-ê chai ka-kī sim-lāi ê chai-ē iu-būn, ǹg chit keng tiān kia̍h-khí chhiú, bô-lūn cháiⁿ-iūⁿ khún-kiû, cháiⁿ-iūⁿ kî-tó;

(BCL) 或是一人，或是你的百姓以色列的眾人，逐個知家己心內的災禍憂悶，向此間殿抬起手，無論怎樣懇求，怎樣祈禱，

30

(THR) gōan Lí tùi thiⁿ--nih, Lí só͘ khiā-khí ê só͘-chāi, lâi thiaⁿ i, lâi sià-bián--i, Lí chai in ê sim, chiàu in ta̍k-lâng ê kiâⁿ-chòe lâi khóan-thāi in, (in-ūi sè-kan lâng ê sim chí-ū Lí chai nā-tiāⁿ);

(BCL) 願你對天裡你所徛起的所在來聽伊，來赦免伊。你知的心，照逐人的行做來款待（因為世間人的心只有你知若定），

31

(THR) hō͘ in tī Lí siúⁿ-sù góan lia̍t-chó͘ ê tōe, chı̍t-sì-lâng kèng-ùi Lí, kiâⁿ Lí ê tō-lō͘.

(BCL) 互佇你賞賜阮列祖的地一世人敬畏你，行你的道路。

32

(THR) Lūn-kàu gōa-pang lâng, m̄-sī sio̍k Lí ê peh-sìⁿ Í-sek-lia̍t ê, ūi-tio̍h Lí ê tōa-miâ, tōa kôan-lêng ê chhiú chhun-chhut ê chhiú-kut, tùi hn̄g-hn̄g ê só͘-chāi lâi, in nā lâi ǹg chit keng tiān kî-tó;

(BCL) 「論到外邦人，呣是屬你的百姓以色列的，為著你的大名大權能的手，伸出的手骨，對遠遠的所在來，若來向此間殿祈禱，

33

(THR) gōan Lí tùi thiⁿ, Lí khiā-khí ê só͘-chāi, lâi thiaⁿ in, chiàu gōa-pang lâng it-chhè só͘ tùi Lí kiû-ê lâi kiâⁿ; hō͘ thiⁿ-ē bān peh-sìⁿ lóng bat Lí ê miâ, kèng-ùi Lí, chhin-chhiūⁿ Lí ê peh-sìⁿ Í-sek-lia̍t chı̍t-iūⁿ; koh hō͘ in chai góa só͘ khí chit keng tiān, sī ēng Lí ê miâ lâi chheng-ê.

(BCL) 願你對天，你徛起的所在來聽，照外邦人一切所對你求的來行，互天下萬百姓攏識你的名，敬畏你，親像你的百姓以色列一樣，閣互知我所起此間殿，是用你的名來稱的。

34

(THR) Lí ê peh-sìⁿ nā chhut-khì Lí só͘ chhe in khì ê lō͘, kap tùi-te̍k kau-chiàn, ǹg Lí só͘ kéng chit ê siâⁿ, kap góa ūi-tio̍h Lí ê miâ só͘ khí ê tiān, lâi kî-tó Lí;

(BCL) 「你的百姓若出去你所差去的路，及對敵交戰，向你所揀此個城，及我為著你的名所起的殿來祈禱你，

35

(THR) gōan Lí tùi thiⁿ lâi thiaⁿ in ê kî-tó khún-kiû, lâi pó-hō͘ in ê gī.

(BCL) 願你對天來聽的祈禱懇求，來保護的義。

36

(THR) Lí ê peh-sìⁿ nā tek-chōe Lí, (in-ūi bô ū bô hōan-chōe ê lâng,) Lí siū-khì in, chiong in kau hō͘ tùi-te̍k, tì-kàu in lia̍h in kàu he̍k-sī hn̄g he̍k-sī kūn ê tōe;

(BCL) 「你的百姓若得罪你（因為無有無犯罪的人），你受氣，將交互對敵，致到掠到或是遠或是近的地；

37

(THR) in nā tī só͘ lia̍h-khì ê tōe, sim-lāi tò-tńg siūⁿ lâi hóan-hóe, koh tī lia̍h in ê lâng ê tōe, khún-kiû Lí kóng, Góan ū-chōe, góan ū pōe-ge̍k, góan ū chòe-pháiⁿ;

(BCL) 若佇所掠去的地，心內倒轉想來反悔，閣佇掠的人的地，懇求你講：『阮有罪，阮有悖逆，阮有做歹』；

38

(THR) in nā tī siū lia̍h-khì ê tōe, chiū-sī tùi-te̍k lia̍h in khì ê tōe, chīn-sim chīn-sèng kui-ho̍k Lí, koh ǹg pún-tōe, chiū-sī Lí siúⁿ-sù in lia̍t-chó͘ ê tōe, kap Lí só͘ kéng ê siâⁿ, í-kı̍p góa ūi-tio̍h Lí ê miâ só͘ khí ê tiān, lâi kî-tó Lí;

(BCL) 若佇受掠去的地，就是對敵掠去的地，盡心盡性歸服你，閣向本地，就是你賞賜列祖的地及你所揀的城，以及我為著你的名所起的殿來祈禱你，

39

(THR) gōan Lí tùi thiⁿ, Lí só͘ khiā-khí ê só͘-chāi, thiaⁿ in ê kî-tó khún-kiû, lâi pó-hō͘ in ê gī, koh sià-bián Lí ê peh-sìⁿ tek-chōe Lí ê.

(BCL) 願你對天你所徛起的所在聽的祈禱懇求，來保護的義，閣赦免你的百姓得罪你的。

40

(THR) Góa ê Siōng-tè ah, taⁿ góa kiû Lí ba̍k-chiu khòaⁿ, hī-khang thiaⁿ, tī chit só͘-chāi só͘ hiàn ê kî-tó.

(BCL) 「我的上帝啊，今我求你目睭看，耳孔聽佇此所在所獻的祈禱。

41

(THR) Iâ-hô-hoa Siōng-tè ah, kiû Lí khí-lâi, Lí kap Lí lêng-le̍k ê kūi, jı̍p Lí an-hioh ê só͘-chāi; Iâ-hô-hoa Siōng-tè ah, gōan Lí ê chè-si chhēng kiù-un, gōan Lí hiah ê sèng ê peh-sìⁿ tit-tio̍h hok-khì lâi hoaⁿ-hí.

(BCL) 耶和華上帝啊，求你起來，你及你能力的櫃，入你安息的所在。耶和華上帝啊，願你的祭司穿救恩；願你許個聖的百姓，得著福氣來歡喜。

42

(THR) Iâ-hô-hoa Siōng-tè ah, kiû Lí bo̍h-tit kū-cho̍at Lí siū boah-iû--ê; tio̍h kì-liām Lí si-hō͘ Lí ê lô͘-po̍k Tāi-pı̍t ê chû-ài.

(BCL) 耶和華上帝啊，求你莫得拒絕你受抹油者，著記念你施互你的奴僕大衛的慈愛。」

Bible Color Mark

• 台語漢字羅馬本
• 巴克禮全羅