哥林多後書 第 13 章

1

(THR) Chit-ê sī tē saⁿ pái góa beh kàu lín hia. Ēng nn̄g saⁿ ê kan-chèng ê lâng ê chhùi, ta̍k kù lóng ū pîn-chún.

(BCL) 此個是第三擺我欲到恁遐。「用二三個干證的人的嘴，逐句攏有憑準。」

2

(THR) Góa bat tāi-seng kóng ê, taⁿ koh tāi-seng kóng i, chhin-chhiūⁿ tē jī pái saⁿ-kap tī-teh iā hiān-kim saⁿ lī-khui, kā chiah ê chiông-chiân hōan-chōe ê, í-kı̍p kî-û ê chèng lâng kóng, góa nā koh lâi, bô beh khoan-sù;

(BCL) 我曾代先講的，今閣代先講伊，親像第二擺相及佇也現今相離開，給諸個從前犯罪的以及其餘的眾人講：「我若閣來，無欲寬恕。」

3

(THR) in-ūi lín ài tit-tio̍h Ki-tok tiàm-tī góa lâi kóng ōe ê pîn-kù; I ǹg lín m̄ sī lóan-jio̍k, chiū-sī ū kôan-lêng tī lín tiong-kan.

(BCL) 因為恁愛得著基督佇我來講話的憑據，伊向恁呣是軟弱，就是有權能佇恁中間。

4

(THR) I tùi lóan-jio̍k lâi siū tèng sı̍p-jī-kè; chóng-sī tùi Siōng-tè ê kôan-lêng lâi o̍ah. Chhin-chhiūⁿ án-ni góan tiàm-tī I iā lóan-jio̍k, chóng-sī tùi Siōng-tè ǹg lín só͘ hián-bêng ê kôan-lêng beh kap I saⁿ-kap o̍ah.

(BCL) 伊對軟弱來受釘十字架，總是對上帝的權能來活。親像按呢阮佇伊也軟弱，總是對上帝向恁所顯明的權能，欲及伊相及活。

5

(THR) Lín tio̍h chhì-khòaⁿ pún-sin ū tiàm-tī sìn á bô; tio̍h ka-kī giām-khòaⁿ. Á-sī m̄ chai, lín nā m̄ sī thang khì-sak ê, chiū ū Iâ-so͘ Ki-tok tiàm-tī lín?

(BCL) 恁著試看本身有佇信抑無，著家己驗看。抑是呣知恁若呣是通棄拺的，就有耶穌基督佇恁？

6

(THR) Góan iā ǹg-bāng lín ōe chai góan m̄ sī thang khì-sak ê.

(BCL) 阮也向望恁會知，阮呣是通棄拺的。

7

(THR) Taⁿ góan kiû Siōng-tè hō͘ lín só͘ kiâⁿ bô chı̍t hāng pháiⁿ, m̄ sī beh hián-bêng góan chòe thang chiap-la̍p ê, sī beh hō͘ lín ê kiâⁿ-chòe lóng hó, góan sui-jiân chòe chhin-chhiūⁿ thang khì-sak ê, iā thang.

(BCL) 今阮求上帝，互恁所行無一項歹，呣是欲顯明阮做通接納的，是欲互恁的行做攏好，阮雖然做親像通棄拺的也通！

8

(THR) In-ūi góan bōe-ōe chòe sím-mı̍h lâi ke̍h chin-lí, chiū-sī pang-chān chin-lí.

(BCL) 因為阮會做甚麼來逆真理，就是幫助真理。

9

(THR) Góan lóan-jio̍k, lín ióng-chòng, góan chiū hoaⁿ-hí; góan só͘ kî-kiû ê chiū-sī hō͘ lín ōe ôan-chôan.

(BCL) 阮軟弱，恁勇壯，阮就歡喜；阮所祈求的，就是互恁會完全。

10

(THR) In-ūi án-ni, góa saⁿ lī-khui ê sî siá chiah-ê hō͘ lín, thang tī saⁿ kìⁿ-bīn ê sî, bián chiàu Chú só͘ hō͘ góa ê kôan, lâi ēng giâm hoat; chit ê kôan sī beh khí-chō, m̄ sī beh chhia-tó.

(BCL) 因為按呢，我相離開的時，寫諸個互恁，通佇相見面的時，免照主所互我的權來用嚴法。此個權是欲起造，呣是欲捙倒。

11

(THR) Hiaⁿ-tī ah, kiat-bé lâi kóng, tio̍h hoaⁿ-hí. Tio̍h ôan-chôan, tio̍h siū an-ùi, tio̍h tâng sim, tio̍h hô-bo̍k; chiū siúⁿ-sù jîn-ài kap pêng-an ê Siōng-tè beh kap lín tī-teh.

(BCL) 兄弟啊，結尾來講：著歡喜。著完全；著受安慰；著同心；著和睦。就賞賜仁愛及平安的上帝欲及恁佇。

12

(THR) Tio̍h ēng sèng ê saⁿ-chim lâi saⁿ chhéng-an.

(BCL) 著用聖的相唚，來相請安。

13

(THR) Chiah ê sèng-tô͘ lóng chhéng-an lín.

(BCL) 諸個聖徒攏請安恁。

14

(THR) Gōan Chú Iâ-so͘ Ki-tok ê un-tián, Siōng-tè ê thiàⁿ-thàng, Sèng Sîn ê siong-thong, kap lín chèng lâng tī-teh.

(BCL) 願主耶穌基督的恩典、上帝的疼痛、聖神的相通及恁眾人佇！

Bible Color Mark

• 台語漢字羅馬本
• 巴克禮全羅