撒母耳記下 第 10 章

1

(THR) Chit-tia̍p í-āu, A-bûn lâng ê ông sí, i ê kiáⁿ Hap-lùn sòa-chiap i chòe ông.

(BCL) 此霎以後，亞捫人的王死，伊的子哈嫩續接伊做王。

2

(THR) Tāi-pı̍t kóng, Góa beh si-un hō͘ Ná-hat ê kiáⁿ Hap-lùn, chhin-chhiūⁿ i ê lāu-pē si-un hō͘ góa chı̍t-iūⁿ. Tāi-pı̍t chiū chhe jîn-sîn, thok-tiōng in an-ùi i sí lāu-pē. Tāi-pı̍t ê jîn-sîn kàu A-bûn lâng ê kéng-lāi.

(BCL) 大衛講：「我欲施恩互拿轄的子哈嫩親像伊的老父施恩互我一樣。」大衛就差人臣，託仗安慰伊死老父。大衛的人臣到亞捫人的境內。

3

(THR) Chóng-sī A-bûn lâng ê siú-léng chhe lâng kā in ê chú Hap-lùn kóng, Tāi-pı̍t chhe lâng lâi lí chia ùi-būn lí, lí phah-sǹg i sī chun-kèng lí ê pē mah? Tāi-pı̍t chhe i ê jîn-sîn, kiám-m̄-sī beh cheng-thàm chit ê siâⁿ, siông-sè khòaⁿ lâi chhia-tó i mah?

(BCL) 總是亞捫人的首領差人給的主哈嫩講：「大衛差人來你遮慰問你，你拍算伊是尊敬你的父嗎？大衛差伊的人臣豈呣是欲偵探此個城、詳細看來捙倒伊嗎？」

4

(THR) Hap-lùn chiū chiong Tāi-pı̍t ê jîn-sîn ê chhùi-chhiu thì chı̍t-pòaⁿ, koh tùi-tiong koah-tn̄g i ê saⁿ, kàu tōa-thúi-téng, chhe in tò--khì.

(BCL) 哈嫩就將大衛的人臣的嘴鬚剃一半，閣對中割斷伊的衫，到大腿頂，差倒去。

5

(THR) Ū lâng kā Tāi-pı̍t kóng. I chiū chhe lâng khì ngiâ-chih in, in-ūi hiah ê lâng kiàn-siàu kàu-ke̍k. Ông kóng, Thang tiàm tī Iâ-lī-ko thèng-hāu chhùi-chhiu hoat-tn̂g, chiah tò--lâi.

(BCL) 有人給大衛講，伊就差人去迎接，（因為許個人見誚到極），王講：「通踮佇耶利哥聽候嘴鬚發長才倒來。」

6

(THR) A-bûn lâng chai in hō͘ Tāi-pı̍t iàm-ò͘ⁿ; A-bûn lâng chiū chhe lâng khì chhiàⁿ Pek-lī-ha̍p ê A-lân lâng, kap Só-pa ê A-lân lâng, pō͘-peng nn̄g-bān, kap Má-ka ông ê lâng chı̍t-chheng. Tô-pek lâng chı̍t-bān nn̄g-chheng.

(BCL) 亞捫人知互大衛厭惡，亞捫人就差人去，倩伯利合的亞蘭人及瑣巴的亞蘭人，步兵二萬，及瑪迦王的人一千、陀伯人一萬二千。

7

(THR) Tāi-pı̍t thiaⁿ-kìⁿ, chiū chhe Iok-ap chhōa ióng-sū chôan-kun.

(BCL) 大衛聽見，就差約押導勇士全軍。

8

(THR) A-bûn lâng chhut-lâi pâi-tīn tī siâⁿ-mn̂g-kháu; Só-pa kap Lī-ha̍p ê A-lân lâng, Tô-pek lâng, kap Má-ka lâng, lēng-gōa pâi-tīn tī kau-iá.

(BCL) 亞捫人出來排陣佇城門口；瑣巴及利合的亞蘭人、陀伯人，及瑪迦人，另外排陣佇郊野。

9

(THR) Iok-ap khòaⁿ-kìⁿ chêng-āu ū tùi-te̍k pâi-tīn, chiū tùi Í-sek-lia̍t cheng-peng ê tiong-kan koh-chài kéng i lâi pâi-tīn, tí-te̍k A-lân lâng;

(BCL) 約押看見前後有對敵排陣，就對以色列精兵的中間閣再揀伊來排陣，抵敵亞蘭人。

10

(THR) kî-û ê peh-sìⁿ kau i ê sió-tī A-pí-su, hō͘ i pâi-tīn tí-te̍k A-bûn lâng.

(BCL) 其餘的百姓交伊的小弟亞比篩，互伊排陣抵敵亞捫人。

11

(THR) Koh kóng, Nā A-lân lâng khah-kiông góa, lí chiū lâi pang-chān góa; nā A-bûn lâng khah-kiông lí, góa chiū khì pang-chān lí.

(BCL) 閣講：「若亞蘭人卡強我，你就來幫助我；若亞捫人卡強你，我就去幫助你。

12

(THR) Tio̍h ióng-kám, lán tio̍h ūi lán ê peh-sìⁿ kap lán Siōng-tè ê siâⁿ chòe tāi-tiōng-hu; gōan Iâ-hô-hoa chiàu I só͘ khòaⁿ-chòe hó-ê lâi kiâⁿ.

(BCL) 著勇敢，咱著為咱的百姓及咱上帝的城做大丈夫。願耶和華照伊所看做好的來行！」

13

(THR) Tùi án-ni Iok-ap kap tè i ê peh-sìⁿ chìn-chêng kap A-lân lâng kau-chiàn; in chiū tī i ê bīn-chêng tô-cháu.

(BCL) 對按呢，約押及隨伊的百姓進前及亞蘭人交戰；就佇伊的面前逃走。

14

(THR) A-bûn lâng khòaⁿ-kìⁿ A-lân lâng tô-cháu, in iā tī A-pí-su ê bīn-chêng cháu jı̍p siâⁿ. Iok-ap chiū tùi A-bûn lâng hia tò-khì, kàu Iâ-lō͘-sat-léng.

(BCL) 亞捫人看見亞蘭人逃走，也佇亞比篩的面前走入城。約押就對亞捫人遐倒去，到耶路撒冷。

15

(THR) A-lân lâng khòaⁿ-kìⁿ in thâi-su tī Í-sek-lia̍t lâng ê bīn-chêng, chiū koh chū-chı̍p.

(BCL) 亞蘭人看見輸佇以色列人的面前，就閣聚集。

16

(THR) Hap-tāi-tí-siā chhe lâng tiàu Hô-gōa ê A-lân lâng chhut-lâi; in kàu Hi-lân; Hap-tāi-tí-siā ê kun-tiúⁿ Sok-hoat chhōa in.

(BCL) 哈大底謝差人，召河外的亞蘭人出來；到希蘭，哈大底謝的軍長朔法導。

17

(THR) Ū lâng pò Tāi-pı̍t chai; i chiū chū-chı̍p Í-sek-lia̍t chèng-lâng, kè Iok-tàn hô lâi kàu Hi-lân; A-lân lâng pâi-tīn kong-kek Tāi-pı̍t, kap i kau-chiàn.

(BCL) 有人報大衛知，伊就聚集以色列眾人，過約但河，來到希蘭。亞蘭人排陣攻擊大衛，及伊交戰。

18

(THR) A-lân lâng tô-cháu tī Í-sek-lia̍t ê bīn-chêng; Tāi-pı̍t thâi-sí A-lân chhit-pah tiuⁿ chiàn-chhia ê peng, bé-peng sì-bān; koh phah in ê kun-tiúⁿ Sok-hoat, hō͘ i sí tī-hia.

(BCL) 亞蘭人逃走佇以色列的面前；大衛死亞蘭七百張戰車的兵，馬兵四萬，閣拍的軍長朔法互伊死佇遐。

19

(THR) Hâng-ho̍k Hap-tāi-tí-siā hiah ê ông khòaⁿ-kìⁿ in thâi-su tī Í-sek-lia̍t ê bīn-chêng, chiū kap Í-sek-lia̍t hô-hó, lâi hâng-ho̍k in. Tùi án-ni A-lân lâng m̄-káⁿ koh pang-chān A-bûn lâng.

(BCL) 降服哈大底謝許個王看見輸佇以色列的面前，就及以色列和好，來降服。對按呢亞蘭人呣敢閣幫助亞捫人。

Bible Color Mark

• 台語漢字羅馬本
• 巴克禮全羅