撒母耳記下 第 11 章

1

(THR) Nî-thâu, lia̍t-ông chhut-chiàn ê sî, Tāi-pı̍t chhe Iok-ap kap i ê jîn-sîn, kap Í-sek-lia̍t ê chèng-lâng, chhut-khì; in chiū thâi-iâⁿ A-bûn lâng, ûi-kong La̍h-pa. Tāi-pı̍t iû-gôan tiàm tī Iâ-lō͘-sat-léng.

(BCL) 年頭，列王出戰的時，大衛差約押，及伊的人臣及以色列的眾人出去。就贏亞捫人，圍攻拉巴。大衛猶原踮佇耶路撒冷。

2

(THR) Ū chı̍t-jı̍t beh àm ê sî, Tāi-pı̍t tùi chhn̂g--nih khí-lâi, tī ông-kiong ê chhù-téng kiâⁿ-lâi kiâⁿ-khì; tùi chhù-téng khòaⁿ-kìⁿ chı̍t ê hū-jîn-lâng teh sóe-e̍k; hū-jîn-lâng siⁿ-chòe chin-súi.

(BCL) 有一日，欲暗的時，大衛對床裡起來，佇王宮的厝頂行來行去，對厝頂看見一個婦仁人洗浴，婦仁人生做真娞，

3

(THR) Tāi-pı̍t ūi-tio̍h hit ê hū-jîn-lâng chiū chhe lâng khì thàm-thiaⁿ; ū lâng kóng, I kiám-m̄-sī Í-liân ê cha-bó͘-kiáⁿ, Hek-lâng Ou-lī-à ê bó͘, Po̍at-sī-pa mah?

(BCL) 大衛為著彼個婦仁人就差人去探聽。有人講：「伊豈呣是以連的查某子，赫人烏利亞的某拔示巴嗎？」

4

(THR) Tāi-pı̍t chhe sù-chiá khì chhōa i lâi, i chiū lâi kàu i hia, Tāi-pı̍t kap i tâng-pâng; (hū-jîn-lâng chheng-khì i ê bô chheng-khì;) chiū tò-khì in chhù.

(BCL) 大衛差使者去導伊來，伊就來到伊遐，大衛及伊同房；婦仁人清氣伊的無清氣。就倒去厝。

5

(THR) Hū-jîn-lâng hôai-īn, chhe lâng kā Tāi-pı̍t kóng, Góa í-keng hôai-īn.

(BCL) 婦仁人懷孕，差人給大衛講：「我已經懷孕。」

6

(THR) Tāi-pı̍t chhe lâng kàu Iok-ap hia, kóng, Lí chhe Hek-lâng Ou-lī-à lâi góa chia. Iok-ap chiū chhe Ou-lī-à khì kìⁿ Tāi-pı̍t.

(BCL) 大衛差人到約押遐，講：「你差赫人烏利亞來我遮。」約押就差烏利亞去見大衛。

7

(THR) Ou-lī-à í-keng lâi i hia, Tāi-pı̍t mn̄g-khòaⁿ Iok-ap hó mah? peh-sìⁿ hó mah? kau-chiàn hó-sè mah?

(BCL) 烏利亞已經來伊遐，大衛問看約押好嗎？百姓好嗎？交戰好勢嗎？

8

(THR) Tāi-pı̍t kā Ou-lī-à kóng, Lí lo̍h--khì lín tau sóe-kha. Ou-lī-à chhut ông-kiong liáu-āu, ông chiū sàng chı̍t-hūn chia̍h-mı̍h hō͘ i.

(BCL) 大衛給烏利亞講：「你落去恁兜洗腳。」烏利亞出王宮了後，王就送一份食物互伊。

9

(THR) Chóng-sī Ou-lī-à kap i chú-lâng ê lô͘-po̍k saⁿ-kap khùn tī ông-kiong ê mn̂g-kháu, bô lo̍h-khì in tau.

(BCL) 總是烏利亞及伊主人的奴僕相及睏佇王宮的門口，無落去兜。

10

(THR) Ū lâng kā Tāi-pı̍t kóng, Ou-lī-à bô lo̍h-khì i ê chhù. Tāi-pı̍t chiū mn̄g Ou-lī-à kóng, Lí kiám-m̄-sī tùi hn̄g-lō͘ lâi mah? siáⁿ-sū m̄ lo̍h-khì lí ê ke ah?

(BCL) 有人給大衛講：「烏利亞無落去伊的厝。」大衛就問烏利亞講：「你豈呣是對遠路來嗎？啥事呣落去你的家啊？」

11

(THR) Ou-lī-à tùi Tāi-pı̍t kóng, Iok-kūi kap Í-sek-lia̍t kap Iû-tāi lóng tiàm tī chháu-liâu-á; góa ê chú Iok-ap, kap góa ê chú ê lô͘-po̍k, lóng chat-iâⁿ tī chhân-iá; góa kiám thang tò--khì góa ê ke lim-chia̍h, kap góa ê bó͘ saⁿ-kap khùn mah? góa chí lí ê o̍ah, kap lí lêng-hûn ê o̍ah lâi chiù-chōa, góa koat-tòan bô beh kiâⁿ chı̍t ê sū.

(BCL) 烏利亞對大衛講：「約櫃及以色列及猶大攏踮佇草寮仔，我的主約押及我的主的奴僕攏紮營佇田野，我豈通倒去我的家飲食、及我的某相及睏嗎？我指你的活及你靈魂的活來咒誓，我決斷無欲行此個事！」

12

(THR) Tāi-pı̍t kā Ou-lī-à kóng, Lí kin-á-jı̍t iû-gôan tòa chia, bîn-á-chài góa hō͘ lí khì. Ou-lī-à chiū tī hit-jı̍t kap tē-jī jı̍t tòa tī Iâ-lō͘-sat-léng.

(BCL) 大衛給烏利亞講：「你今仔日猶原住遮，明仔再我互你去。」烏利亞就佇彼日及第二日住佇耶路撒冷。

13

(THR) Tāi-pı̍t kiò Ou-lī-à lâi, i chiū tī i ê bīn-chêng lim-chia̍h; i hō͘ i chùi; í-keng àm, Ou-lī-à chhut-khì i ê chhn̂g--nih khùn, kap i ê chú chiah ê lô͘-po̍k saⁿ-kap chòe-phōaⁿ; iā bô lo̍h-khì in tau.

(BCL) 大衛叫烏利亞來，伊就佇伊的面前飲食，伊互伊醉。已經暗，烏利亞出去伊的床裡睏，及伊的主諸個奴僕相及做伴，也無落去兜。

14

(THR) Keh chá-khí Tāi-pı̍t siá chı̍t tiuⁿ phoe hō͘ Iok-ap, thok Ou-lī-à ê chhiú tòa--khì.

(BCL) 隔早起，大衛寫一張批互約押，託烏利亞的手帶去。

15

(THR) Phoe-lāi siá kóng, Tio̍h phài Ou-lī-à tī tīn-chêng ke̍k gûi-kip ê só͘-chāi, lín chiū tùi i ê āu-bīn thè--lâi, hō͘ i siū phah-sí.

(BCL) 批內寫講：「著派烏利亞佇陣情極危急的所在，恁就對伊的後面退來，互伊受拍死。」

16

(THR) Iok-ap ûi-siâⁿ ê sî, tī i só͘ chai ū ióng-sū ê só͘-chāi, chiū phài Ou-lī-à tī-hia.

(BCL) 約押圍城的時，佇伊所知有勇士的所在，就派烏利亞佇遐。

17

(THR) Siâⁿ-lāi ê lâng ū chhut-lâi kap Iok-ap kau-chiàn; Tai-pı̍t ê lô͘-po̍k sí kúi-nā lâng, Hek-lâng Ou-lī-à iā sí.

(BCL) 城內的人有出來及約押交戰；大衛的奴僕死幾若人，赫人烏利亞也死。

18

(THR) Iok-ap chhe lâng ēng kau-chiàn ê sū lóng kā Tāi-pı̍t kóng;

(BCL) 約押差人用交戰的事攏給大衛講，

19

(THR) chiū hoan-hù sù-chiá kóng, Lí ēng kau-chiàn it-chhè ê sū kā ông kóng bêng-pe̍k,

(BCL) 就吩咐使者講：「你用交戰一切的事給王講明白，

20

(THR) ông nā siū-khì, kā lín kóng, Lín kau-chiàn ê sî, siáⁿ-sū pek-kūn siâⁿ-chhiûⁿ? kiám m̄-chai in ōe tùi siâⁿ-téng siā-chìⁿ mah?

(BCL) 王若受氣，給恁講：『恁交戰的時啥事迫近城牆？豈呣知會對城頂射箭嗎？

21

(THR) Chêng phah-sí Iâ-lō͘-pí-siat ê kiáⁿ A-pí-bí-le̍k-ê sī chī-chūi? kiám-m̄-sī chı̍t ê hū-jîn-lâng, tùi chhiûⁿ-téng hiat chio̍h-bō ê téng-tún tī i ê téng-bīn, hō͘ i sí tī Thê-pī-su mah? lín siáⁿ-sū pek-kūn siâⁿ ah? lí tio̍h kóng, Lí ê lô͘-po̍k Hek-lâng Ou-lī-à iā sí.

(BCL) 前拍死耶路比設的子亞比米勒的是是誰？豈呣是一個婦仁人對牆頂石磨的頂礅，佇伊的頂面，互伊死佇提備斯嗎？恁啥事迫近城啊？』你著講：『你的奴僕──赫人烏利亞也死。』」

22

(THR) Sù-chiá khì, chiàu Iok-ap it-chhè só͘ bēng-lēng-ê lâi kā Tāi-pı̍t kóng.

(BCL) 使者去，照約押一切所命令的來給大衛講。

23

(THR) Sù-chiá kā Tāi-pı̍t kóng, Tùi-te̍k pí góan khah-kiông, chhut-lâi kau-iá kong-kek góan, góan phah i kàu siâⁿ-mn̂g-kháu.

(BCL) 使者給大衛講：「對敵比阮卡強，出來郊野攻擊阮，阮拍伊到城門口。

24

(THR) Siā-chìⁿ ê lâng tùi chhiûⁿ-téng siā lí ê lô͘-po̍k; ông ê lô͘-po̍k sí kúi-nā lâng, lí ê lô͘-po̍k Hek-lâng Ou-lī-à iā sí.

(BCL) 射箭的人對牆頂射你的奴僕，王的奴僕死幾若人，你的奴僕赫人烏利亞也死。」

25

(THR) Tāi-pı̍t kā hit ê sù-chiá kóng, Lí tio̍h án-ni kā Iok-ap kóng, M̄-bián khòa-lū chit ê sū, in-ūi to-kiàm thâi-sí lâng, chit-ê hit-ê bô it-tēng; lí tio̍h koh-khah chīn-la̍t kong-siâⁿ, lâi chhia-tó i; tio̍h án-ni bián-lē i.

(BCL) 大衛給彼個使者講：「你著按呢給約押講：『呣免掛慮此個事，因為刀劍死人，此個彼個無一定；你著閣卡盡力攻城，來捙倒伊。』著按呢勉勵伊。」

26

(THR) Ou-lī-à ê bó͘ thiaⁿ-kìⁿ tiōng-hu Ou-lī-à í-keng sí, chiū ūi i ê tiōng-hu thî-khàu.

(BCL) 烏利亞的某聽見丈夫烏利亞已經死，就為伊的丈夫啼哭。

27

(THR) Teng-iu í-keng bêng-pe̍k, Tāi-pı̍t chhe lâng chhōa i kàu kiong-lāi; i chiū chòe i ê bó͘, kā i siⁿ chı̍t ê kiáⁿ. Chóng-sī Tāi-pı̍t só͘ kiâⁿ ê sū, Iâ-hô-hoa chin bô hoaⁿ-hí.

(BCL) 丁憂已經明白，大衛差人導伊到宮內，伊就做伊的某，給伊生一個子。總是大衛所行的事，耶和華真無歡喜。

Bible Color Mark

• 台語漢字羅馬本
• 巴克禮全羅