撒母耳記下 第 12 章

1

(THR) Iâ-hô-hoa chhe Ná-tan khì kìⁿ Tāi-pı̍t; i kàu i hia, kā i kóng, Tī chı̍t ê siâⁿ ū nn̄g-lâng, chı̍t-ê hó-gia̍h, chı̍t-ê sòng-hiong.

(BCL) 耶和華差拿單去見大衛。伊到伊遐，給伊講：「佇一個城有二人：一個好額，一個喪鄉。

2

(THR) Hó-gia̍h-ê ū gû iûⁿ chin-chōe;

(BCL) 好額的有牛羊真多；

3

(THR) sòng-hiong lâng bô sím-mı̍h, chí-ū chı̍t chiah iûⁿ-chéng-á, chiū-sī i só͘ bóe lâi chhī ê, i kap i tī-hia, kap i ê kiáⁿ saⁿ-kap tióng-tōa, chia̍h i só͘ chia̍h-ê, lim i ê poe, khùn tī i ê heng-chêng, khòaⁿ i chhin-chhiūⁿ ka-kī ê cha-bó͘-kiáⁿ.

(BCL) 喪鄉人無甚麼，只有一隻羊種仔就是伊所買來飼的。伊及伊佇遐及伊的子相及長大，食伊所食的，飲伊的杯，睏佇伊的胸前，看伊親像家己的查某子。

4

(THR) Ū chı̍t ê chhut-gōa lâng kàu hó-gia̍h lâng hia, hó-gia̍h lâng m̄-kam tùi i ê iûⁿ-kûn gû-kûn chhú lâi pī-pān hō͘ lâng-kheh chia̍h; hóan-tńg chhú sòng-hiong lâng ê iûⁿ-á, pī-pān lâi hō͘ lâng-kheh chia̍h.

(BCL) 有一個出外人到好額人遐；好額人呣甘對伊的羊群牛群取來備辦互人客食，反轉取喪鄉人的羊仔，備辦來互人客食。」

5

(THR) Tāi-pı̍t tōa siū-khì hit-lâng, kā Ná-tan kóng, Góa kí éng-o̍ah ê Iâ-hô-hoa lâi chiù-chōa, kiâⁿ chit ê tāi-chì ê lâng tio̍h sí;

(BCL) 大衛大受氣彼人，給拿單講：「我指永活的耶和華來咒誓，行此個代誌的人著死！

6

(THR) tio̍h pê i ê iûⁿ-á sì-pē; in-ūi i kiâⁿ chit ê sū, iā in-ūi i bô lîn-bín ê sim.

(BCL) 著賠伊的羊仔四倍；因為伊行此個事，也因為伊無憐憫的心。」

7

(THR) Ná-tan kā Tāi-pı̍t kóng, Lí chiū-sī hit-lâng. Iâ-hô-hoa Í-sek-lia̍t ê Siōng-tè án-ni kóng, Góa ēng iû boah lí chòe Í-sek-lia̍t ê ông, kiù lí thoat-lī Sò-lô ê chhiú.

(BCL) 拿單給大衛講：「你就是彼人！耶和華──以色列的上帝按呢講：『我用油抹你做以色列的王，救你脫離掃羅的手。

8

(THR) Góa koh ēng lí ê chú ê chhù-the̍h hō͘ lí, ēng lí ê chú hiah ê bó͘ kau tī lí ê heng-chêng; koh ēng Í-sek-lia̍t kap Iû-tāi ke hō͘ lí; chiah-ê nā iáu lia̍h-chòe sió-khóa, Góa ōe ke-thiⁿ chit-hō hit-hō hō͘ lí.

(BCL) 我閣用你的主的厝宅互你，用你的主許個某交佇你的胸前，閣用以色列及猶大家互你；諸個若猶掠做小可，我會加添此號彼號互你。

9

(THR) Lí siáⁿ-sū khòaⁿ-khin Iâ-hô-hoa ê bēng-lēng, kiâⁿ I só͘ khòaⁿ-chòe pháiⁿ ê sū? lí ēng to thâi-sí Hek-lâng Ou-lī-à, chiū-sī chioh A-bûn lâng ê to thâi-sí i, koh chhōa i ê bó͘ chòe lí ê bó͘.

(BCL) 你啥事看輕耶和華的命令，行伊所看做歹的事？你用刀死赫、人烏利亞，就是借亞捫人的刀死伊，閣娶伊的某做你的某。

10

(THR) Taⁿ to-kiàm beh éng-óan bô lī-khui lí ê ke, in-ūi lí khòaⁿ-khin Góa, chhōa Hek-lâng Ou-lī-à ê bó͘ chòe lí ê bó͘.

(BCL) 今刀劍欲永遠無離開你的家，因為你看輕我，娶赫人烏利亞的某做你的某。』

11

(THR) Iâ-hô-hoa koh án-ni kóng, Khòaⁿ ah, Góa beh tùi lí ê ke heng-khí chai-ē kong-kek lí; Góa beh tī lí ê ba̍k-chiu-chêng, ēng lí hiah ê bó͘ hō͘ lí ê chhù-piⁿ, i beh tī chheng-thian pe̍k-jı̍t kap lí hiah ê bó͘ tâng-pâng.

(BCL) 耶和華閣按呢講：『看啊，我欲對你的家興起災禍攻擊你；我欲佇你的目睭前，用你許個某互你的厝邊，伊欲佇青天白日及你許個某同房。

12

(THR) In-ūi lí tī àm-tiong kiâⁿ i, chóng-sī Góa beh tī chheng-thian pe̍k-jı̍t, tī Í-sek-lia̍t chèng-lâng ê bīn-chêng, kiâⁿ chit ê sū.

(BCL) 因為你佇暗中行伊，總是我欲佇青天白日，佇以色列眾人的面前，行此個事。』」

13

(THR) Tāi-pı̍t kā Ná-tan kóng, Góa ū tek-chōe Iâ-hô-hoa. Ná-tan kā Tāi-pı̍t kóng, Iâ-hô-hoa í-keng tû-khì lí ê chōe, lí bōe tì-kàu sí.

(BCL) 大衛給拿單講：「我有得罪耶和華！」拿單給大衛講：「耶和華已經除去你的罪，你致到死。

14

(THR) Chóng-sī in-ūi lí kiâⁿ chit ê sū, hō͘ Iâ-hô-hoa ê tùi-te̍k ū siat-to̍k ê in-iû, só͘-í i kā lí só͘ siⁿ ê kiáⁿ tek-khak sí.

(BCL) 總是因為你行此個事，互耶和華的對敵有褻瀆的因由，所以，伊給你所生的子的確死。」

15

(THR) Ná-tan chiū tò-khì in chhù. Iâ-hô-hoa phah Ou-lī-à ê bó͘ kā Tāi-pı̍t só͘ siⁿ ê eⁿ-á, i chiū phòa-pīⁿ chin siong-tiōng.

(BCL) 拿單就倒去厝。耶和華拍烏利亞的某給大衛所生的嬰仔，伊就破病真傷重。

16

(THR) Tāi-pı̍t chiū ūi-tio̍h hit ê kiáⁿ kî-tó Siōng-tè. Tāi-pı̍t koh kìm-chia̍h, jı̍p lāi-bīn thong-mî tó tī tōe--nih.

(BCL) 大衛就為著彼個子祈禱上帝，大衛閣禁食，入內面，通暝倒佇地裡。

17

(THR) I ke-tiong hiah ê lāu-lâng khí-lâi, kàu i ê sin-piⁿ, beh hû i tùi tōe khí-lâi; chóng-sī i m̄-khéng, iā bô beh kap in saⁿ-kap chia̍h.

(BCL) 伊家中許個老人起來到伊的身邊，欲扶伊對地起來，總是伊呣肯，也無欲及相及食。

18

(THR) Kàu tē-chhit jı̍t gín-ná sí; Tāi-pı̍t ê jîn-sîn m̄-káⁿ kā i kóng gín-ná sí lah; in-ūi in kóng, Gín-ná iáu o̍ah-teh ê sî, lán khǹg i, i siōng-chhiáⁿ m̄-thiaⁿ lán ê ōe, nā kā i kóng gín-ná sí, i siong-sim beh kàu cháiⁿ-iūⁿ?

(BCL) 到第七日，囝仔死。大衛的人臣呣敢給伊講囝仔死啦，因為講：「囝仔猶活的時，咱勸伊，伊尚且呣聽咱的話，若給伊講囝仔死，伊傷心欲到怎樣？」

19

(THR) Tāi-pı̍t khòaⁿ-kìⁿ i ê jîn-sîn chī-bú-chī-chū teh kóng, Tāi-pı̍t chiū chai gín-ná í-keng sí. Tāi-pı̍t chiū mn̄g i ê jîn-sîn kóng, Gín-ná sí--lah mah? In kóng, Sí--lah.

(BCL) 大衛看見伊的人臣嗤舞嗤呲講，大衛就知囝仔已經死，大衛就問伊的人臣講：「囝仔死啦嗎？」講：「死啦。」

20

(THR) Tāi-pı̍t chiū tùi tōe--nih khí-lâi, sóe sin-khu, boah iû, ōaⁿ-saⁿ, jı̍p Iâ-hô-hoa ê tiān kèng-pài; jiân-āu tò-khì i ê chhù. I hoan-hù lâng pâi mı̍h tī i ê bīn-chêng, i chiū chia̍h.

(BCL) 大衛就對地裡起來，洗身軀，抹油，換衫，入耶和華的殿敬拜；然後倒去伊的厝，伊吩咐人排物佇伊的面前，他就食。

21

(THR) Jîn-sîn mn̄g i kóng, Lí só͘ kiâⁿ--ê sī cháiⁿ-iūⁿ? Gín-ná o̍ah--teh ê sî, lí kìm-chia̍h thî-khàu; gín-ná sí, lí hóan-tńg khí-lâi chia̍h.

(BCL) 人臣問伊講：「你所行的是怎樣？囝仔活的時，你禁食啼哭；囝仔死，你反轉起來食。」

22

(THR) Tāi-pı̍t kóng, Gín-ná iáu o̍ah--teh, góa kìm-chia̍h thî-khàu, in-ūi góa phah-sǹg kóng, Kiám-chhái Iâ-hô-hoa lîn-bín góa, hō͘ gín-ná o̍ah--teh, iā káⁿ.

(BCL) 大衛講：「囝仔猶活，我禁食啼哭；因為我拍算講，豈採耶和華憐憫我，互囝仔活也敢。

23

(THR) Gín-ná í-keng sí, góa kìm-chia̍h beh siáⁿ-sū? góa kiám ōe hō͘ i tò-tńg--lâi mah? góa beh khì i hia, i bōe-ōe lâi góa chia.

(BCL) 囝仔已經死，我禁食欲啥事，我豈會互伊倒轉來嗎？我欲去伊遐，伊會來我遮。」

24

(THR) Tāi-pı̍t an-ùi i ê bó͘ Po̍at-sī-pa, jı̍p--khì kap i tâng-pâng, i chiū siⁿ-kiáⁿ; chiū kā i hō-miâ kiò Só͘-lô-bûn;

(BCL) 大衛安慰伊的某拔示巴，入去及伊同房，伊就生子，就給伊號名叫所羅門。耶和華也疼伊，

25

(THR) Iâ-hô-hoa iā thiàⁿ i, chiū thok sian-ti Ná-tan kā i hō miâ kiò Iâ-tí-tí-a, in-ūi Iâ-hô-hoa thiàⁿ i.

(BCL) 就託先知拿單給伊號名，叫耶底底亞，因為耶和華疼伊。

26

(THR) Iok-ap kong A-bûn lâng ê La̍h-pa, chhú in ê kiaⁿ-siâⁿ.

(BCL) 約押攻亞捫人的拉巴取的京城。

27

(THR) Iok-ap chhe sù-chiá khì kìⁿ Tāi-pı̍t kóng, Góa kong La̍h-pa, í-keng chhú i ê chúi-siâⁿ.

(BCL) 約押差使者去見大衛，講：「我攻拉巴，已經取伊的水城。

28

(THR) Taⁿ lí tio̍h chū-chı̍p kî-û ê peh-sìⁿ lâi, chat-iâⁿ kong chit ê siâⁿ lâi chhú i; kiaⁿ-liáu góa chhú chit ê siâⁿ, lâng chiū ēng góa ê miâ lâi kiò i.

(BCL) 今你著聚集其餘的百姓來，紮營攻此個城來取伊，驚了我取此個城，人就用我的名來叫伊。」

29

(THR) Tāi-pı̍t chiū chū-chı̍p chèng peh-sìⁿ, khì La̍h-pa kong-kek, lâi chhú i.

(BCL) 大衛就聚集眾百姓，去拉巴攻擊，來取伊，

30

(THR) I chhú in ê ông thâu-khak-téng ê bián-liû, i ê kim tāng chı̍t tha-liân-tek, koh siuⁿ pó-chio̍h; chiong chit-ê lâi tì tī Tāi-pı̍t ê thâu-khak. I koh tùi siâⁿ-lāi chhú chin-chōe châi-bu̍t.

(BCL) 伊取的王頭殼頂的冕旒，伊的金重一他連得，閣鑲寶石。將此個來戴佇大衛的頭殼。伊閣對城內取真多財物，

31

(THR) Koh lia̍h hiah ê siâⁿ ê peh-sìⁿ chhut-lâi, hō͘ in ēng kù-á, kap thih-pē, í-kı̍p thih ê pó͘-thâu chòe khó͘-kang, á-sī tī hiā-iô tio̍h-bôa; i khóan-thāi A-bûn lâng hiah ê siâⁿ lóng sī án-ni. Tāi-pı̍t chiū kap chèng peh-sìⁿ tò-khì Iâ-lō͘-sat-léng.

(BCL) 閣掠許個城的百姓出來，互用鋸仔，及鐵耙，以及鐵的斧頭做苦工，抑是佇瓦窯著磨；伊款待亞捫人許個城攏是按呢。大衛就及眾百姓倒去耶路撒冷。

Bible Color Mark

• 台語漢字羅馬本
• 巴克禮全羅