撒母耳記下 第 13 章

1

(THR) Chit-ê í-āu Tāi-pı̍t ê kiáⁿ Ap-sa-liông ū chı̍t-ê chin-súi ê sió-bē, miâ kiò Tha-má; Tāi-pı̍t ê kiáⁿ Àm-lùn thiàⁿ i.

(BCL) 此個以後大衛的子押沙龍有一個真娞的小妹，名叫他瑪。大衛的子暗嫩疼伊。

2

(THR) Àm-lùn ūi-tio̍h i ê sió-bē Tha-má ut-chut kàu phòa-pīⁿ; in-ūi i sī chāi-sek-lú, Àm-lùn ka-kī chai oh-tit tùi i chòe sím-mı̍h tāi-chì.

(BCL) 暗嫩為著伊的小妹他瑪鬱悴到破病。因為伊是在室女，暗嫩家己知得對伊做甚麼代誌。

3

(THR) Àm-lùn ū chı̍t ê pêng-iú, miâ kiò Iok-ná-ta̍t, sī Tāi-pı̍t ê hiaⁿ Sī-bí-a ê kiáⁿ. Iok-ná-ta̍t sī chin lêng-khiàu ê lâng.

(BCL) 暗嫩有一個朋友，名叫約拿達，是大衛的兄示米亞的子。約拿達是真靈竅的人；

4

(THR) I tùi Àm-lùn kóng, Ông ê kiáⁿ ah, lí siáⁿ-sū chı̍t-jı̍t chı̍t-jı̍t khah siau-sán ah? siáⁿ-sū m̄ kā góa kóng? Àm-lùn kā i kóng, Góa thiàⁿ góa ê sió-tī Ap-sa-liông ê sió-bē Tha-má.

(BCL) 伊對暗嫩講：「王的子啊，你啥事一日一日卡消瘦啊？啥事呣給我講。」暗嫩給伊講：「我疼我的小弟押沙龍的小妹他瑪。」

5

(THR) Iok-ná-ta̍t kā i kóng, Lí tio̍h tó tī bîn-chhn̂g--nih, ké-chòe phòa-pīⁿ; lí ê lāu-pē lâi khòaⁿ lí, chiū tùi i kóng, Kiû lí chún góa ê sió-bē Tha-má lâi góa chia, ēng chia̍h-mı̍h hō͘ góa, pī-pān tī góa ê bīn-chêng, hō͘ góa khòaⁿ-kìⁿ, tùi i ê chhiú chih lâi chia̍h.

(BCL) 約拿達給伊講：「你著倒佇眠床裡假做破病；你的老父來看你，就對伊講：『求你准我的小妹他瑪來我遮，用食物互我，備辦佇我的面前，互我看見，對伊的手接來食。』」

6

(THR) Àm-lùn chiū tó-teh ké phòa-pīⁿ; ông lâi bāi i. Àm-lùn chiū tùi ông kóng, Kiû lí hō͘ góa ê sió-bē Tha-má lâi, tī góa ê bīn-chêng kā góa chòe nn̄g tè piáⁿ, góa thang tùi i ê chhiú chih lâi chia̍h i.

(BCL) 暗嫩就倒假破病。王來覓伊，暗嫩就對王講：「求你互我的小妹他瑪來，佇我的面前給我做二塊餅，我通對伊的手接來食伊。」

7

(THR) Tāi-pı̍t chiū chhe lâng kàu Tha-má ê chhù, kā i kóng, Taⁿ lí khì lí ê hiaⁿ Àm-lùn ê chhù, kā i pī-pān chia̍h-mı̍h.

(BCL) 大衛就差人到他瑪的厝，給伊講：「今你去你的兄暗嫩的厝，給伊備辦食物。」

8

(THR) Tha-má chiū kàu i ê hiaⁿ Àm-lùn ê chhù; Àm-lùn tó-teh. Tha-má the̍h mī-hún, tī i ê bīn-chêng chhiau chòe piáⁿ, koh pek hiah ê piáⁿ;

(BCL) 他瑪就到伊的兄暗嫩的厝；暗嫩倒。他瑪提麵粉，佇伊的面前摶做餅，閣許個餅，

9

(THR) chiū chiong chian-pôaⁿ piàⁿ tī i ê bīn-chêng. Àm-lùn m̄-chia̍h, chiū kóng, Chèng-lâng tio̍h lī-khui góa chhut-khì; chèng-lâng chiū lī-khui i chhut-khì.

(BCL) 就將煎盤傾佇伊的面前，暗嫩呣食，就講：「眾人著離開我出去！」眾人就離開伊，出去。

10

(THR) Àm-lùn kā Tha-má kóng Lí phâng chia̍h-mı̍h jı̍p khùn-pâng, góa thang tùi lí ê chhiú chih lâi chia̍h. Tha-má chiū phâng só͘ chòe ê piáⁿ jı̍p khùn-pâng kàu i ê hiaⁿ Àm-lùn hia.

(BCL) 暗嫩給他瑪講：「你捧食物入睏房，我通對你的手接來食。」他瑪就捧所做的餅入睏房，到伊的兄暗嫩遐，

11

(THR) I phâng khì hō͘ i chia̍h, i chiū khiú i, kā i kóng, Góa ê sió-bē ah, lí lâi kap góa saⁿ-kap khùn.

(BCL) 伊捧去互伊食，伊就伊，給伊講：「我的小妹啊，你來及我相及睏。」

12

(THR) I kā i kóng, Góa ê hiaⁿ, m̄-thang, bo̍h-tit lêng-jio̍k góa, in-ūi tī Í-sek-lia̍t tiong m̄-eng-kai án-ni kiâⁿ; lí bo̍h-tit chòe chit ê gōng-sū;

(BCL) 伊給伊講：「我的兄，呣通莫得凌辱我。因為佇以色列中呣應該按呢行，你莫得做此個戇事；

13

(THR) iā góa, góa beh cháiⁿ-iūⁿ sóe góa ê kiàn-siàu? iā lí, lí tī Í-sek-lia̍t chòe gōng-lâng ê chı̍t-ê; taⁿ chhiáⁿ lí tùi ông kóng, i bô beh kìm-chí góa kè hō͘ lí.

(BCL) 也我，我欲怎樣洗我的見誚？也你，你佇以色列做戇人的一個。今請你對王講，伊無欲禁止我嫁互你。」

14

(THR) Chóng-sī Àm-lùn m̄-khéng thiaⁿ i ê ōe; in-ūi i pí i khah ū la̍t, chiū lêng-jio̍k i, kap i saⁿ-kap khùn.

(BCL) 總是暗嫩呣肯聽伊的話，因為伊比伊卡有力，就凌辱伊，及伊相及睏。

15

(THR) Í-āu Àm-lùn ke̍k-kî òan-hūn i; hit ê òan-hūn i ê òan-hūn, pí chêng thiàⁿ i ê thiàⁿ koh khah-tōa. Àm-lùn chiū kā i kóng, Khí-lâi, khì ah.

(BCL) 以後，暗嫩極其怨恨伊，彼個怨恨伊的怨恨比前疼伊的疼閣卡大，暗嫩就給伊講：「起來，去啊！」

16

(THR) I kā i kóng, M̄-thang án-ni, lí kóaⁿ góa chhut-khì ê hāi-tio̍h góa, pí lí chêng khóan-thāi góa-ê khah-thiám. Chóng-sī Àm-lùn m̄-khéng thiaⁿ i;

(BCL) 伊給伊講：「呣通按呢！你趕我出去的害著我比你前款待我的卡殄！」總是暗嫩呣肯聽伊，

17

(THR) chiū kiò hit ê su-hāu i ê lô͘-po̍k kóng, Tio̍h kóaⁿ chit ê cha-bó͘-gín-ná tùi góa chia chhut-khì; i chhut-khì, mn̂g chiū tio̍h chhòaⁿ.

(BCL) 就叫彼個伺候伊的奴僕，講：「著趕此個查某囝仔對我遮出去！伊出去，門就著閂。」

18

(THR) Hit-sî Tha-má chhēng chhái-sek ê saⁿ, in-ūi ông ê cha-bó͘-kiáⁿ, iáu-bē chhut-kè ê, lóng chhēng chit hō saⁿ; Àm-lùn ê lô͘-po̍k chiū khan i chhut-khì; chhut-khì liáu, mn̂g chiū chhòaⁿ--teh.

(BCL) 彼時他瑪穿彩色的衫，因為王的查某子，猶未出嫁的攏穿此號衫。暗嫩的奴僕就牽伊出去，出去了，門就閂。

19

(THR) Tha-má sám hé-hu tī thâu-khak, thiah-lı̍h só͘ chhēng chhái-sek ê saⁿ, ēng chhiú phō thâu-khak lâi kiâⁿ; ná-kiâⁿ ná-háu.

(BCL) 他瑪摻火灰佇頭殼，拆裂所穿彩色的衫，用手抱頭殼來行，愈行愈哮。

20

(THR) I ê hiaⁿ Ap-sa-liông mn̄g i kóng, Lí ê hiaⁿ Àm-lùn bat kap lí chòe-tui mah? Góa ê sió-bē ah, taⁿ bô chòe siaⁿ, i sī lí ê hiaⁿ, bo̍h-tit khòa-ì chit ê sū. Tha-má chiū toaⁿ-sin tiàm tī i ê hiaⁿ Ap-sa-liông ê chhù.

(BCL) 伊的兄押沙龍問伊講：「你的兄暗嫩曾及你做堆嗎？我的小妹啊，今無做聲，伊是你的兄，莫得掛意此個事。」他瑪就單身踮佇伊的兄押沙龍的厝。

21

(THR) Tāi-pı̍t ông thiaⁿ-kìⁿ chiah ê sū, chiū put-chí siū-khì.

(BCL) 大衛王聽見諸個事，就不止受氣。

22

(THR) Ap-sa-liông bô kap Àm-lùn kóng-hó kóng-pháiⁿ; in-ūi Ap-sa-liông òan-hūn Àm-lùn, sī i ū lêng-jio̍k i ê sió-bē Tha-má.

(BCL) 押沙龍無及暗嫩講好講歹；因為押沙龍怨恨暗嫩，是伊有凌辱伊的小妹他瑪。

23

(THR) Kè nn̄g-nî, Ap-sa-liông tī kūn Í-hoat-liân ê Pa-le̍k-hā-só, ū lâng kā i chián iûⁿ-mn̂g; Ap-sa-liông chhiáⁿ ông ê chèng-kiáⁿ lóng-chóng khì.

(BCL) 過二年，押沙龍佇近以法蓮的巴力夏瑣有人給伊剪羊毛；押沙龍請王的眾子攏總去。

24

(THR) Ap-sa-liông lâi kìⁿ ông, kóng, Taⁿ lí ê lô͘-po̍k ū ēng lâng teh chián iûⁿ-mn̂g, chhiáⁿ ông, kap ông ê jîn-sîn, kap lô͘-po̍k, saⁿ-kap khì.

(BCL) 押沙龍來見王，講：「今你的奴僕有用人剪羊毛，請王及王的人臣及奴僕相及去。」

25

(THR) Ông kā Ap-sa-liông kóng, Góa ê kiáⁿ ah, m̄-thang, góan m̄-thang lóng khì, kiaⁿ-liáu lí khai-hùi siuⁿ siong-tiōng. Ap-sa-liông pek i, chóng-sī i m̄-khì; kan-ta kā i chiok-hok.

(BCL) 王給押沙龍講：「我的子啊，呣通，阮呣通攏去，驚了你開費甚傷重。」押沙龍迫伊，總是伊呣去，干單給伊祝福。

26

(THR) Ap-sa-liông kóng, Nā bô, chiū hō͘ góa ê hiaⁿ Àm-lùn kap góan khì. Ông kóng, Siáⁿ-sū tio̍h i kap lí khì ah?

(BCL) 押沙龍講：「若無，就互我的兄暗嫩及阮去。」王講：「啥事著伊及你去啊？」

27

(THR) Ap-sa-liông pek i. Ông chiū ún-chún Àm-lùn kap ông ê chèng-kiáⁿ saⁿ-kap khì.

(BCL) 押沙龍迫伊，王就允准暗嫩及王的眾子相及去。

28

(THR) Ap-sa-liông hoan-hù i ê lô͘-po̍k kóng, Lín tio̍h chù-ì, khòaⁿ Àm-lùn lim-chiú tek-kái ê sî, góa kā lín kóng, Phah Àm-lùn, lín chiū tio̍h thâi-sí i. bo̍h-tit kiaⁿ; che kiám-m̄-sī góa hoan-hù lín--ê mah? Lín chòe lín hó-táⁿ ióng-kám.

(BCL) 押沙龍吩咐伊的奴僕講：「恁著注意，看暗嫩飲酒得解的時，我給恁講拍暗嫩，恁就著死伊，莫得驚。這豈呣是我吩咐恁的嗎？恁做恁好膽勇敢！」

29

(THR) Ap-sa-liông ê lô͘-po̍k chiū chiàu Ap-sa-liông só͘ hoan-hù ê, lâi kiâⁿ tī Àm-lùn; ông ê chèng-kiáⁿ lóng peh--khí-lâi, ta̍k-lâng khiâ i ê lô͘ tô-cháu.

(BCL) 押沙龍的奴僕就照押沙龍所吩咐的，來行佇暗嫩。王的眾子攏絔起來，逐人騎伊的驢，逃走。

30

(THR) In iáu tī lō͘--nih ū hong-siaⁿ thôan kàu Tāi-pı̍t, kóng, Ap-sa-liông ū thâi-sí ông ê chèng-kiáⁿ, bô lâu chı̍t-ê.

(BCL) 猶佇路裡，有風聲傳到大衛，講：「押沙龍有死王的眾子，無留一個。」

31

(THR) Ông chiū khí--lâi thiah-lı̍h saⁿ, tó tī tōe--nih; ông ê jîn-sîn iā thiah-lı̍h saⁿ, khiā tī i ê sin-piⁿ.

(BCL) 王就起來，拆裂衫，倒佇地裡。王的人臣也拆裂衫，徛佇伊的身邊。

32

(THR) Tāi-pı̍t ê hiaⁿ Sī-bí-a ê kiáⁿ, Iok-ná-ta̍t ìn kóng, Góa ê chú, bo̍h-tit phah-sǹg ông ê chèng-kiáⁿ, hiah ê siàu-liân lâng lóng hō͘ i thâi-sí; chí-ū Àm-lùn sí nā-tiāⁿ; in-ūi tùi Àm-lùn lêng-jio̍k i ê sió-bē Tha-má hit-jı̍t, Ap-sa-liông chiū í-keng ū chit ê ì-sù.

(BCL) 大衛的兄示米亞的子約拿達應講：「我的主，莫得拍算王的眾子──許個少年人攏互伊死，只有暗嫩死若定。因為對暗嫩凌辱伊的小妹他瑪彼日，押沙龍就已經有此個意思。

33

(THR) Taⁿ góa ê chú góa ê ông, bo̍h-tit khòa-ì chit ê sū, phah-sǹg ông ê chèng-kiáⁿ lóng sí; kî-sı̍t chí-ū Àm-lùn sí nā-tiāⁿ.

(BCL) 今我的主我的王，莫得掛意此個事，拍算王的眾子攏死，其實只有暗嫩死若定。」

34

(THR) Ap-sa-liông chiū tô-cháu. Siú-bāng ê siàu-liân lâng kia̍h-ba̍k khòaⁿ, khòaⁿ-kìⁿ chōe-chōe peh-sìⁿ tùi i ê āu-bīn, tùi soaⁿ-piⁿ ê lō͘ lâi.

(BCL) 押沙龍就逃走。守望的少年人抬目看，看見多多百姓對伊的後面對山邊的路來。

35

(THR) Iok-ná-ta̍t kā ông kóng, Khòaⁿ ah, ông ê chèng-kiáⁿ lóng lâi lah, kó-jiân chiàu lí ê lô͘-po̍k só͘ kóng ê.

(BCL) 約拿達給王講：「看啊，王的眾子攏來啦，果然照你的奴僕所講的。」

36

(THR) Ōe tú-á kóng-soah, ông hiah ê kiáⁿ chiū kàu, khui-siaⁿ thî-khàu; ông kap jîn-sîn iā lóng tōa thî-khàu kàu-ke̍k.

(BCL) 話抵仔講息，王許個子就到，開聲啼哭；王及人臣也攏大啼哭到極。

37

(THR) Ap-sa-liông cháu kàu Ki-su̍t ông A-bí-hut ê kiáⁿ Ta̍t-mái hia; Tāi-pı̍t jı̍t-jı̍t ūi-tio̍h i ê kiáⁿ pi-ai.

(BCL) 押沙龍走到基述王亞米忽的子達買遐。大衛日日為著伊的子悲哀。

38

(THR) Ap-sa-liông cháu kàu Ki-su̍t, tiàm hia saⁿ-nî.

(BCL) 押沙龍走到基述，踮遐三年。

39

(THR) Tāi-pı̍t ông ê sim chhiat-chhiat siàu-liām Ap-sa-liông; in-ūi Àm-lùn í-keng sí, chiū siū an-ùi.

(BCL) 大衛王的心切切數念押沙龍，因為暗嫩已經死，就受安慰。

Bible Color Mark

• 台語漢字羅馬本
• 巴克禮全羅