撒母耳記下 第 16 章

1

(THR) Tāi-pı̍t kè soaⁿ-téng bô jōa-hn̄g, khòaⁿ-kìⁿ Bí-hui-pho-siat ê lô͘-po̍k, Sé-pa lâi tú-tio̍h i, tòa kòa-oaⁿ ê lû nn̄g-chiah, chài piáⁿ nn̄g-pah, phû-tô-koaⁿ, chı̍t-pah pha, hē-thiⁿ ê ké-chí chı̍t pah, chiú chı̍t phê-lông.

(BCL) 大衛過山頂無偌遠，看見米非波設的奴僕洗巴來抵著伊帶掛鞍的驢二隻，載餅二百，葡萄干一百葩，夏天的果子一百，酒一皮囊。

2

(THR) Ông mn̄g Sé-pa kóng, Lí tòa chiah-ê lâi sī sím-mı̍h ì-sù? Sé-pa kóng, Lû sī beh hō͘ ông ê ke-kòan khiâ, piáⁿ kap hē-thiⁿ ê ké-chí, sī beh hō͘ siàu-liân lâng chia̍h; chiú sī beh hō͘ tī khòng-iá ià-siān ê lâng lim.

(BCL) 王問洗巴講：「你帶諸個來是甚麼意思？」洗巴講：「驢是欲互王的家眷騎；餅及夏天的果子是欲互少年人食；酒是欲互佇曠野厭倦的人飲。」

3

(THR) Ông mn̄g kóng, Lí ê chú-lâng ê kiáⁿ tī toh-lo̍h? Sé-pa ìn ông kóng, I iû-gôan tī Iâ-lō͘-sat-léng; in-ūi i kóng, Í-sek-lia̍t lâng kin-á-jı̍t beh chiong góa ê pē ê kok hêng góa.

(BCL) 王問講：「你的主人的子佇叨落？」洗巴應王講：「伊猶原佇耶路撒冷，因為伊講：『以色列人今仔日欲將我的父的國還我。』」

4

(THR) Ông kā Sé-pa kóng, Bí-hui-pho-siat só͘ ū-ê lóng kui hō͘ lí. Sé-pa kóng, Góa kūi-pài; gōan tit-tio̍h un-tián tī góa ê chú góa ê ông ê bīn-chêng.

(BCL) 王給洗巴講：「米非波設所有的攏歸互你。」洗巴講：「我跪拜，願得著恩典佇我的主我的王的面前。」

5

(THR) Tāi-pı̍t ông kàu Pa-hō͘-lîm ê sî, khòaⁿ ah, ū Sò-lô cho̍k ê ke chı̍t-lâng chhut-lâi, chiū-sī Ki-la̍h ê kiáⁿ, miâ kiò Sī-múi; i chhut-lâi, ná-kiâⁿ ná chiù-chó͘;

(BCL) 大衛王到巴戶琳的時，看啊，有掃羅族的家一人出來，就是基拉的子，名叫示每。他出來愈行愈咒詛，

6

(THR) koh khioh chio̍h-thâu tìm Tāi-pı̍t kap Tāi-pı̍t ông ê jîn-sîn; hit-sî chèng peh-sìⁿ kap ióng-sū lóng tī ông ê chó-iū.

(BCL) 閣拾石頭擲大衛及大衛王的人臣；彼時眾百姓及勇士攏佇王的左右。

7

(THR) Sī-múi chiù-chó͘ kóng, Lí chit ê lâu lâng ê huih ê lâng ah, lí chit ê pháiⁿ-lâng ah, khì--ah, khì--ah.

(BCL) 示每咒詛講：「你此個流人的血的人啊，你此個歹人啊，去啊去啊！

8

(THR) Lí thòe Sò-lô chòe ông, taⁿ Iâ-hô-hoa ēng i ê ke ê huih lóng kui tī lí; Iâ-hô-hoa ēng chit ê kok kau tī lí ê kiáⁿ Ap-sa-liông ê chhiú; taⁿ lí tú-tio̍h ok-pò, in-ūi lí sī lâu lâng ê huih ê lâng.

(BCL) 你替掃羅做王，今耶和華用伊的家的血攏歸佇你，耶和華用此個國交佇你的子押沙龍的手。今你抵著惡報，因為你是流人的血的人。」

9

(THR) Sé-ló͘-ngá ê kiáⁿ A-pí-su kā ông kóng, Chit chiah sí-káu, kiám thang chiù-chó͘ góa ê chú góa ê ông mah? kiû lí chún góa kè--khì, koah i ê thâu.

(BCL) 洗魯雅的子亞比篩給王講：「此隻死狗豈通咒詛我的主我的王嗎？求你准我過去，割伊的頭。」

10

(THR) Ông kóng, Sé-ló͘-ngá chiah ê kiáⁿ ah, góa kap lín ū sím-mı̍h kan-sia̍p? chhut-chāi i chiù-chó͘, in-ūi Iâ-hô-hoa hoan-hù i kóng, Lí tio̍h chiù-chó͘ Tāi-pı̍t; án-ni chī-chūi káⁿ kóng, Lí siáⁿ-sū án-ni kiâⁿ ah?

(BCL) 王講：「洗魯雅諸個子啊，我及恁有甚麼干涉？出在伊咒詛因為耶和華吩咐伊講：『你著咒詛大衛。』按呢，是誰敢講你啥事按呢行啊？」

11

(THR) Tāi-pı̍t koh kā A-pí-su, kap i ê chèng jîn-sîn kóng, Góa chhin-siⁿ ê kiáⁿ siōng-chhiáⁿ siàu-siūⁿ góa ê sìⁿ-miā, hô-hòng chit ê Piān-ngá-bín lâng ah? iông-ún i, chhut-chāi i chiù-chó͘; in-ūi che sī Iâ-hô-hoa kah i ê.

(BCL) 大衛閣給亞比篩及伊的眾人臣講：「我親生的子尚且數想我的生命，何況此個便雅憫人啊？容允伊出在伊咒詛！因為這是耶和華教伊的。

12

(THR) Kiám-chhái Iâ-hô-hoa kàm-chhat góa ê oan-óng, in-ūi i kin-á-jı̍t ê chiù-chó͘, Iâ-hô-hoa beh ēng hó pò góa.

(BCL) 豈採耶和華鑑察我的冤枉，因為伊今仔日的咒詛，耶和華欲用好報我。」

13

(THR) Tāi-pı̍t kap tè i ê lâng kiâⁿ lō͘ khì. sī-múi kiâⁿ tī i saⁿ-tùi ê soaⁿ-phiâⁿ, ná-kiâⁿ ná chiù-chó͘, koh tìm chio̍h-thâu, iā thô͘.

(BCL) 大衛及隨伊的人行路去。示每行佇伊相對的山坪，愈行愈咒詛，閣擲石頭，撒土。

14

(THR) Ông kap tè i ê chèng peh-sìⁿ chin ià-siān, kàu chı̍t só͘-chāi, chiū tī-hia hioh-khùn.

(BCL) 王及隨伊的眾百姓真厭倦到一所在，就佇遐歇睏。

15

(THR) Ap-sa-liông kap chèng peh-sìⁿ Í-sek-lia̍t lâng, lâi kàu Iâ-lō͘-sat-léng. A-hi-to-hut iā kap i tī-hia.

(BCL) 押沙龍及眾百姓以色列人來到耶路撒冷；亞希多弗也及伊佇遐。

16

(THR) Tāi-pı̍t ê pêng-iú, A-ki lâng Hō͘-su, lâi kàu Ap-sa-liông hia; Hō͘-su kā Ap-sa-liông kóng, Gōan ông bān-sòe, gōan ông bān-sòe.

(BCL) 大衛的朋友亞基人戶篩來到押沙龍遐，戶篩給押沙龍講：「願王萬歲！願王萬歲！」

17

(THR) Ap-sa-liông kā Hō͘-su kóng, Lí hó khóan-thāi lí ê pêng-iú sī án-ni mah? siáⁿ-sū bô kap lí ê pêng-iú saⁿ-kap khì ah?

(BCL) 押沙龍給戶篩講：「你好款待你的朋友是按呢嗎？啥事無及你的朋友相及去啊？」

18

(THR) Hō͘-su kā Ap-sa-liông kóng, M̄-sī án-ni, Iâ-hô-hoa kap chit ê peh-sìⁿ, kap Í-sek-lia̍t chèng-lâng, só͘ kéng ê, góa beh kui i, iā beh kap i tòa.

(BCL) 戶篩給押沙龍講：「呣是按呢，耶和華及此個百姓，及以色列眾人，所揀的，我欲歸伊，也欲及伊住。

19

(THR) Koh chı̍t-hāng, góa tio̍h ho̍k-sāi chī-chūi ah? kiám-m̄-sī tī i ê kiáⁿ ê bīn-chêng mah? Góa cháiⁿ-iūⁿ tī lí ê lāu-pē ê bīn-chêng ho̍k-sāi, iā beh án-ni tī lí ê bīn-chêng.

(BCL) 閣一項，我著服事是誰啊？豈呣是佇伊的子的面前嗎？我怎樣佇你的老父的面前服事，也欲按呢佇你的面前。」

20

(THR) Ap-sa-liông kā A-hi-to-hut kóng, Lín tio̍h kè-e̍k, khòaⁿ lán tio̍h cháiⁿ-iūⁿ kiâⁿ.

(BCL) 押沙龍給亞希多弗講：「恁著計劃，看咱著怎樣行？」

21

(THR) A-hi-to-hut kā Ap-sa-liông kóng, Lí ê lāu-pē só͘ lâu--teh kò͘-chhù hiah ê pìn-hui, lí tio̍h kap i khùn; chiū Í-sek-lia̍t ê chèng-lâng thiaⁿ-kìⁿ lí hō͘ lí ê lāu-pē iàm-ò͘ⁿ, kìⁿ-nā kui lí ê lâng, i ê chhiú beh giám-ngī.

(BCL) 亞希多弗給押沙龍講：「你的老父所留顧厝許個嬪妃，你著及伊睏。就以色列的眾人聽見你互你的老父厭惡，見若歸你的人，伊的手欲嚴硬。」

22

(THR) In chiū kā Ap-sa-liông tah pò͘-pîⁿ, tī ông-kiong ê chng-pîⁿ-téng. Ap-sa-liông chiū tī Í-sek-lia̍t chèng-lâng ê bīn-chêng jı̍p--khì, kap i ê lāu-pē ê pìn-hui khùn.

(BCL) 就給押沙龍搭布棚，佇王宮的磚棚頂；押沙龍就佇以色列眾人的面前入去，及伊的老父的嬪妃睏。

23

(THR) Hit-sî A-hi-to-hut só͘ kè-e̍k ê kè-e̍k, chhin-chhiūⁿ lâng mn̄g Siōng-tè ê ōe chı̍t-iūⁿ; A-hi-to-hut tùi-tī Tāi-pı̍t á-sī tùi-tī Ap-sa-liông só͘ kè-e̍k ê, lóng sī án-ni.

(BCL) 彼時亞希多弗所計劃的計劃親像人問上帝的話一樣；亞希多弗對佇大衛，抑是對佇押沙龍所計劃的，攏是按呢。

Bible Color Mark

• 台語漢字羅馬本
• 巴克禮全羅