撒母耳記下 第 19 章

1

(THR) Ū lâng kā Iok-ap kóng, Khòaⁿ ah, ông ūi-tio̍h Ap-sa-liông thî-khàu pi-ai.

(BCL) 有人給約押講：「看啊，王為著押沙龍啼哭悲哀。」

2

(THR) Hit-jı̍t ê tek-sèng piàn-chòe chèng peh-sìⁿ ê pi-ai; in-ūi hit-jı̍t peh-sìⁿ thiaⁿ-kìⁿ kóng, Ông ūi-tio̍h i ê kiáⁿ iu-būn.

(BCL) 彼日的得勝變做眾百姓的悲哀，因為彼日百姓聽見講王為著伊的子憂悶。

3

(THR) Hit-jı̍t peh-sìⁿ àm-chīⁿ jı̍p siâⁿ, chhin-chhiūⁿ tī tīn--nih tô-cháu kiàn-siàu ê peh-sìⁿ àm-chīⁿ jı̍p-lâi chı̍t-iūⁿ.

(BCL) 彼日百姓暗靜入城，親像佇陣裡逃走、見誚的百姓暗靜入來一樣。

4

(THR) Ông tà i ê bīn, ông tōa-siaⁿ háu, kóng, Góa ê kiáⁿ Ap-sa-liông ah, Ap-sa-liông, góa ê kiáⁿ, góa ê kiáⁿ ah.

(BCL) 王罩伊的面，王大聲哮講：「我的子押沙龍啊！押沙龍，我的子，我的子啊！」

5

(THR) Iok-ap jı̍p chhù khì kìⁿ ông kóng, Lí kin-á-jı̍t hō͘ lí it-chhè ê lô͘-po̍k bô thé-biān; in kin-á-jı̍t kiù lí ê sìⁿ-miā, kap lí ê kiáⁿ cha-bó͘-kiáⁿ ê sìⁿ-miā, lí hiah ê bó͘ ê sìⁿ-miā, lí hiah ê sòe-î ê sìⁿ-miā;

(BCL) 約押入厝去見王，講：「你今仔日互你一切的奴僕無體面！今仔日救你的生命及你的子查某子的生命，你許個某的生命，你許個細姨的生命，

6

(THR) in-ūi òan-hūn lí ê, lí thiàⁿ i, thiàⁿ lí ê, lí òan-hūn i. Lí kin-á-jı̍t í-keng hián-bêng lí bô iàu-kín hiah ê siú-léng kap jîn-sîn; góa kin-á-jı̍t khòaⁿ-chhut, nā Ap-sa-liông o̍ah-teh, góan kin-á-jı̍t lóng sí, lí chiū hoaⁿ-hí.

(BCL) 因為怨恨你的你疼伊，疼你的你怨恨伊。你今仔日已經顯明你無要緊許個首領及人臣。我今仔日看出，若押沙龍活，阮今仔日攏死，你就歡喜。

7

(THR) Taⁿ lí tio̍h khí-lâi chhut-khì, an-ùi lí ê lô͘-po̍k ê sim; góa kí Iâ-hô-hoa lâi chiù-chōa, lí nā bô chhut-khì, kim-mî bô chı̍t-lâng kap lí tī-teh; che chai-ē pí lí tùi siàu-liân kàu taⁿ só͘ tú-tio̍h-ê khah-chhám.

(BCL) 今你著起來出去，安慰你的奴僕的心。我指耶和華來咒誓：你若無出去，今暝無一人及你佇；這災禍比你對少年到今所抵著的卡慘！」

8

(THR) Ông chiū khí-lâi, chē tī siâⁿ-mn̂g--nih; ū lâng kā chèng peh-sìⁿ kóng, Khòaⁿ ah, ông chē tī siâⁿ-mn̂g--nih; peh-sìⁿ chiū lóng kàu ông ê bīn-chêng. Í-sek-lia̍t lâng í-keng tô-cháu, ta̍k-lâng tò-khì i ê pò͘-pîⁿ.

(BCL) 王就起來，坐佇城門裡。有人給眾百姓講：看啊，王坐佇城門裡，百姓就攏到王的面前。以色列人已經逃走，逐人倒去伊的布棚。

9

(THR) Í-sek-lia̍t chèng chi-phài ê lâng hun-hun gī-lūn, kóng, Ông bat kiù lán thoat-lī tùi-te̍k ê chhiú, koh kiù lán thoat-lī Hui-lī-sū lâng ê chhiú; taⁿ i siám-pī Ap-sa-liông cháu tī gōa-bīn.

(BCL) 以色列眾支派的人紛紛議論講：「王曾救咱脫離對敵的手，閣救咱脫離非利士人的手，今伊閃避押沙龍走佇外面。

10

(THR) Lán ēng iû boah Ap-sa-liông tī-lí lán, i í-keng tīn-bông. Lín taⁿ siáⁿ-sū m̄ chhut chı̍t-kù, chhiáⁿ ông tò-lâi ah?

(BCL) 咱用油抹押沙龍治理咱，伊已經陣亡。恁今啥事呣出一句請王倒來啊？」

11

(THR) Tāi-pı̍t ông chhe lâng khì kìⁿ chè-si Sat-tok kap A-pí-a-tha, kóng, Lín tio̍h kā Iû-tāi ê tióng-ló kóng, Í-sek-lia̍t chèng-lâng í-keng ū ōe kàu tī ông, chhiáⁿ ông tò-lâi i ê chhù; lín chhiáⁿ ông tò-lâi, siáⁿ-sū chòe lâng ê lō͘-bé ah?

(BCL) 大衛王差人去見祭司撒督及亞比亞他，講：「恁著給猶大的長老講：『以色列眾人已經有話到佇王，請王倒來伊的厝，恁請王倒來啥事做人的路尾啊？

12

(THR) Lín sī góa ê hiaⁿ-tī, sī góa ê kut-jio̍k; chhiáⁿ ông tò-lâi siáⁿ-sū chòe lâng ê lô͘-bé ah?

(BCL) 恁是我的兄弟，是我的骨肉，請王倒來啥事做人的路尾啊？』

13

(THR) Iā kā A-má-sat kóng, Lí kiám m̄-sī góa ê kut-jio̍k mah? Góa nā bô siat-lı̍p lí thòe Iok-ap tn̂g-tn̂g tī góa ê bīn-chêng chòe kun-tiúⁿ, gōan Siōng-tè ka-pē chek-ho̍at góa.

(BCL) 也給亞瑪撒講：『你豈呣是我的骨肉嗎？我若無設立你替約押長長佇我的面前做軍長，願上帝加倍責罰我！』」

14

(THR) Tùi án-ni, i chiū kám-kek Iû-tāi chèng-lâng ê sim, chhin-chhiūⁿ chı̍t-lâng ê sim; in chiū chhe lâng khì kìⁿ ông kóng, Gōan lí kap lí ê chèng jîn-sîn tò-lâi.

(BCL) 對按呢伊就感激猶大眾人的心，親像一人的心。就差人去見王，講：「願你及你的眾人臣倒來。」

15

(THR) Ông chiū tò-lâi, kàu Iok-tàn; Iû-tāi lâng lâi kàu Kiat-kah, beh ngiâ-chih ông, chhōa ông kè Iok-tàn.

(BCL) 王就倒來，到約但。猶大人來到吉甲，欲迎接王，導王過約但。

16

(THR) Pa-hō͘-lîm ê Piān-ngá-bín lâng, Ki-la̍h ê kiáⁿ Sī-múi kóaⁿ-kín kap Iû-tāi lâng lo̍h--lâi ngiâ-chih Tāi-pı̍t ông.

(BCL) 巴戶琳的便雅憫人、基拉的子示每趕緊及猶大人落來迎接大衛王。

17

(THR) Kap i lâi ê, ū chı̍t-chheng ê Piān-ngá-bín lâng, iā ū Sò-lô ke ê lô͘-po̍k Sé-pa, kap i cha̍p-gō͘ ê kiáⁿ, jī-cha̍p ê lô͘-po̍k, in lóng tī ông ê bīn-chêng kè Iok-tàn.

(BCL) 及伊來的有一千個便雅憫人，也有掃羅家的奴僕洗巴及伊十五個子，二十個奴僕；攏佇王的面前過約但。

18

(THR) U tō͘-chûn kè--khì, chài ông ê ke-kòan, chhut-chāi ông ēng. Ông kè Iok-tàn ê sî, Ki-la̍h ê kiáⁿ Sī-múi chiū phak tī ông ê bīn-chêng;

(BCL) 有渡船過去，載王的家眷，出在王用。王過約但的時，基拉的子示每就仆佇王的面前，

19

(THR) kā ông kóng, Góa ê chú góa ê ông chhut Iâ-lō͘-sat-léng ê jı̍t, lí ê lô͘-po̍k kiâⁿ pōe-ge̍k ê sū; taⁿ kiû góa ê chú bo̍h-tit chek-chōe góa, bo̍h-tit kì-tit, ông iā bo̍h-tit hē tī sim--nih.

(BCL) 給王講：「我的主我的王出耶路撒冷的日，你的奴僕行悖逆的事；今求我的主莫得責罪我，莫得記得，王也莫得下佇心裡。

20

(THR) Lí ê lô͘-po̍k bêng-bêng chai ka-kī ū chōe, só͘-í Iok-sek chôan-ke kin-á-jı̍t góa tē-it tāi-seng lo̍h-lâi ngiâ-chih góa ê chú góa ê ông.

(BCL) 你的奴僕明明知家己有罪，所以約瑟全家，今仔日我第一代先落來迎接我的主我的王。」

21

(THR) Sé-ló͘-ngá ê kiáⁿ A-pí-su kóng, Sī-múi bat chiù-chó͘ Iâ-hô-hoa só͘ boah-iû--ê, kiám m̄-tio̍h in-ūi án-ni hō͘ i sí mah?

(BCL) 洗魯雅的子亞比篩講：「示每曾咒詛耶和華所抹油者，豈呣著因為按呢互伊死嗎？」

22

(THR) Tāi-pı̍t kóng, Sé-ló͘-ngá ê kiáⁿ ah, góa kap lín sím-mı̍h kan-sia̍p, hō͘ lín kin-á-jı̍t hóan-tùi góa ah? kin-á-jı̍t Í-sek-lia̍t tiong kiám thang hō͘ lâng sí mah? góa kiám m̄-chai góa kin-á-jı̍t chòe Í-sek-lia̍t ông mah?

(BCL) 大衛講：「洗魯雅的子啊，我及恁甚麼干涉，互恁今仔日反對我啊？今仔日以色列中豈通互人死嗎？我豈呣知我今仔日做以色列王嗎？」

23

(THR) Tùi án-ni ông kā Sī-múi kóng, Lí m̄-bián sí; ông chiū tùi i chiù-chōa.

(BCL) 對按呢王給示每講：「你呣免死。」王就對伊咒誓。

24

(THR) Sò-lô ê sun, Bí-hui-pho-siat iā lo̍h-khì ngiâ-chih ông; i tùi ông khì ê jı̍t kàu ông pêng-an tò-lâi ê jı̍t, i bô siu-chéng kha, iā bô siu-chéng chhùi-chhiu, iā bô sóe-saⁿ.

(BCL) 掃羅的孫米非波設也落去迎接王。伊對王去的日，到王平安倒來的日，伊無修整腳，也無修整嘴鬚，也無洗衫。

25

(THR) I tī Iâ-lō͘-sat-léng ngiâ-chih ông ê sî, ông kā i kóng, Bí-hui-pho-siat, lí siáⁿ-sū bô kap góa lo̍h--khì?

(BCL) 伊佇耶路撒冷迎接王的時，王給伊講：「米非波設，你啥事無及我落去？」

26

(THR) I ìn kóng, Góa ê chú góa ê ông ah, tng-sî lí ê lô͘-po̍k siūⁿ kóng, góa beh pī-pān lû, khiâ i kap ông saⁿ-kap khì; in-ūi lí ê lô͘-po̍k sī pái-kha; chóng-sī góa ê lô͘-po̍k phiàn góa;

(BCL) 伊應講：「我的主我的王啊，當時你的奴僕想講我欲備辦驢騎伊，及王相及去，因為你的奴僕是跛腳，總是我的奴僕騙我，

27

(THR) koh tī góa ê chú góa ê ông ê bīn-chêng húi-pòng lí ê lô͘-po̍k; to̍k-to̍k góa ê chú góa ê ông chhin-chhiūⁿ Siōng-tè ê sù-chiá, chiàu lí só͘ khòaⁿ-chòe hó-ê kiâⁿ i.

(BCL) 閣佇我的主我的王的面前誹謗你的奴僕。獨獨我的主我的王親像上帝的使者，照你所看做好的行伊。

28

(THR) In-ūi góa ê chó͘ chôan-ke, tī góa ê chú góa ê ông ê bīn-chêng, lóng sī tio̍h sí ê lâng; chóng-sī lí hō͘ lí ê lô͘-po̍k kap lí chı̍t-toh ê lâng saⁿ-kap chia̍h, góa iáu ū sím-mı̍h lí-iû thang koh tùi ông kiû-kiò ah?

(BCL) 因為我的祖全家，佇我的主我的王的面前攏是著死的人，總是你互你的奴僕及你一桌的人相及食，我猶有甚麼理由通閣對王求叫啊？」

29

(THR) Ông tùi i kóng, Lí siáⁿ-sū koh kóng lí ê tāi-chì ah? Góa kóng, Lí kap Sé-pa tio̍h pîⁿ-pun hiah ê gia̍p-sán.

(BCL) 王對伊講：「你啥事閣講你的代誌啊？我講，你及洗巴著平分許個業產。」

30

(THR) Bí-hui-pho-siat kā ông kóng, Góa ê chú góa ê ông í-keng pêng-an tò-lâi kiong-lāi, kù-chāi i lóng the̍h--khì, iā thang.

(BCL) 米非波設給王講：「我的主我的王已經平安倒來宮內，據在伊攏提去也通。」

31

(THR) Ki-lia̍t lâng Pa-se-lâi tùi Lô-ki-lîm lo̍h-lâi, beh sàng ông kè Iok-tàn, chiū kap ông kè Iok-tàn.

(BCL) 基列人巴西萊對羅基琳落來，欲送王過約但，就及王過約但。

32

(THR) Pa-se-lâi chin-lāu, í-keng poeh-cha̍p hè; ông tòa tī Má-hap-liām ê sî, i ēng chia̍h-mı̍h kiong-kip ông; in-ūi i sī tōa hó-gia̍h lâng.

(BCL) 巴西萊真老，已經八十歲。王住佇瑪哈念的時，伊用食物供給王；因為伊是大好額人。

33

(THR) Ông kā Pa-se-lâi kóng, Lí kap góa kè--khì, kap góa tòa Iâ-lō͘-sat-léng, góa beh kiong-kip lí.

(BCL) 王給巴西萊講：「你及我過去，及我住耶路撒冷，我欲供給你。」

34

(THR) Pa-se-lâi kā ông kóng, Góa ê sìⁿ-miā iáu ū kúi nî, kúi jı̍t, hō͘ góa kap ông saⁿ-kap chiūⁿ Iâ-lō͘-sat-léng ah?

(BCL) 巴西萊給王講：「我的生命猶有幾年幾日，互我及王相及上耶路撒冷啊？

35

(THR) Góa hiān-kim í-keng poeh-cha̍p hè lah, iáu ōe hun-piat hó-pháiⁿ mah? Lí ê lô͘-po̍k iáu ōe chhì lim-chia̍h ê chu-bī mah? chhiùⁿ-koa ê lâm-lú góa ōe hiáu thiaⁿ i ê siaⁿ-im mah? Lô͘-po̍k siáⁿ-sū thoa-lūi góa ê chú góa ê ông ah?

(BCL) 我現今已經八十歲啦，猶會分別好歹嗎？你的奴僕猶會試飲食的滋味嗎？唱歌的男女我會曉聽伊的聲音嗎？奴僕啥事拖累我的主我的王啊？

36

(THR) Lí ê lô͘-po̍k chí-ū sī beh kap ông kè Iok-tàn chı̍t-chām-á; ông siáⁿ-sū tio̍h ēng chit ê pò-siúⁿ pò-siúⁿ góa ah?

(BCL) 你的奴僕只有是欲及王過約但一站仔，王啥事著用此個報賞報賞我啊？

37

(THR) Kiû lí chún lí ê lô͘-po̍k tò-khì, hō͘ góa thang sí tī góa ê pún siâⁿ, góa ê pē-bú ê bōng hia. Khòaⁿ ah, lí ê lô͘-po̍k Kim-hán tī-chia; hō͘ i kap góa ê chú góa ê ông kè-khì; chiàu lí só͘ khòaⁿ-chòe hó-ê khóan-thāi i.

(BCL) 求你准你的奴僕倒去，互我通死佇我的本城，我的父母的墓遐，看啊，你的奴僕金罕佇遮，互伊及我的主我的王過去，照你所看做好的款待伊。」

38

(THR) Ông kóng, Kim-hán thang kap góa khì; góa beh chiàu lí só͘ khòaⁿ-chòe hó-ê lâi khóan-thāi i; lí kìⁿ-ū tùi góa kiû--ê, góa beh kā lí chiâⁿ.

(BCL) 王講：「金罕通及我去，我欲照你所看做好的來款待伊。你見有對我求的，我欲給你成。」

39

(THR) Tùi án-ni chèng peh-sìⁿ kè Iok-tàn, ông iā kè--khì; ông chiū kap Pa-se-lâi chim-chhùi, kā i chiok-hok; i chiū tò-khì i pún só͘-chāi.

(BCL) 對按呢眾百姓過約但，王也過去。王就及巴西萊唚嘴，給伊祝福，伊就倒去伊本所在。

40

(THR) Tùi án-ni ông kè-khì, kàu Kiat-kah; Kim-hán iā kap i kè-khì; Iû-tāi chèng peh-sìⁿ, kap Í-sek-lia̍t peh-sìⁿ ê chı̍t-pòaⁿ, iā lóng sàng ông kè-khì.

(BCL) 對按呢王過去，到吉甲，金罕也及伊過去。猶大眾百姓及以色列百姓的一半也攏送王過去。

41

(THR) Í-sek-lia̍t chèng-lâng lâi kìⁿ ông, kā i kóng, Góan ê hiaⁿ-tī Iû-tāi lâng siáⁿ-sū thau lí khì, lâi chhōa ông kap i ê ke-kòan, kap kun-tè Tāi-pı̍t ê lâng, lóng saⁿ-kap kè Iok-tàn?

(BCL) 以色列眾人來見王，給伊講：「阮的兄弟猶大人啥事偷你去，來導王及伊的家眷，及跟隨大衛的人，攏相及過約但？」

42

(THR) Iû-tāi chèng-lâng ìn Í-sek-lia̍t lâng, kóng, In-ūi ông kap góan sī tâng-chong, lín siáⁿ-sū in-ūi chit ê sū siū-khì ah? Góan bat chia̍h-tio̍h ông sím-mı̍h ah? ông bat ēng sím-mı̍h sàng góan mah?

(BCL) 猶大眾人應以色列人講：「因為王及阮是同宗，恁啥事因為此個事受氣啊？阮曾食著王甚麼啊？王曾用甚麼送阮嗎？」

43

(THR) Í-sek-lia̍t lâng ìn Iû-tāi lâng kóng, Chiàu chi-phài, chit ê ông góan ū cha̍p-hūn, góan tùi-tī Tāi-pı̍t pí lín khah ū koan-hē; lín siáⁿ-sū khòaⁿ-khin góan, chhōa góan ê ông tò-lâi, bô tāi-seng kap góan chham-siông ah? To̍k-to̍k Iû-tāi lâng ê ōe, pí Í-sek-lia̍t lâng ê ōe, khah-ngī.

(BCL) 以色列人應猶大人講：「照支派，此個王阮有十份；阮對佇大衛比恁卡有關係。恁啥事看輕阮，導阮的王倒來無代先及阮參詳啊？」獨獨猶大人的話比以色列人的話卡硬。

Bible Color Mark

• 台語漢字羅馬本
• 巴克禮全羅