撒母耳記下 第 23 章

1

(THR) Tāi-pı̍t kiat-bé ê ōe, pâi-lia̍t tī ē-tóe. Iâ-se ê kiáⁿ Tāi-pı̍t kóng, Tit-tio̍h seng-kôaiⁿ ê lâng, Sī Ngá-kok ê Siōng-tè só͘ boah-iû ê, Tī Í-sek-lia̍t gâu chòe-koa--ê kóng:

(BCL) 大衛結尾的話排列佇下底。耶西的子大衛講得著升高的人，是雅各的上帝所抹油的，佇以色列做歌者的講：

2

(THR) Iâ-hô-hoa ê Sîn ēng góa lâi kóng, I ê ōe tī góa ê chı̍h.

(BCL) 耶和華的神用我來講：伊的話佇我的舌。

3

(THR) Í-sek-lia̍t ê Siōng-tè ū kóng, Í-sek-lia̍t ê Chio̍h-pôaⁿ tùi góa kóng: Ēng kong-gī tī-lí lâng, Kèng-ùi Siōng-tè lâi tī-lí ê,

(BCL) 以色列的上帝有講，以色列的石磐對我講：用公義治理人，敬畏上帝來治理的，

4

(THR) I beh chhin-chhiūⁿ thàu-chá jı̍t tú-á chhut ê kng, Bô hûn ê chheng-chá, Hō͘ lo̍h kè-sin ê kng-chhái; Hō͘ tōe hoat iù-iù ê chháu.

(BCL) 伊欲親像透早日抵仔出的光，無雲的清早，雨落過身的光彩，互地發幼幼的草。

5

(THR) Góa ê ke tī Siōng-tè ê bīn-chêng m̄-sī án-ni; Iáu-kú I ū kap góa lı̍p éng-óan ê iok, Bô m̄ chiàu chhù-sū pâi-lia̍t koh kian-kò͘; Sui-jiân I bô hō͘ i seng-tióng, Che chiū-sī góa it-chhè ê chín-kiù, it-chhè ê ì-gōan.

(BCL) 我的家佇上帝的面前呣是按呢；猶久伊有及我立永遠的約。無呣照次序排列閣堅固，雖然伊無互伊生長，這就是我一切的拯救，一切的意願。

6

(THR) Chóng-sī húi-lūi lóng chhin-chhiūⁿ chhì-á beh siū koah-sak, Lâng m̄-káⁿ ēng chhiú the̍h i;

(BCL) 總是匪類攏親像莿仔欲受割拺：人呣敢用手提伊；

7

(THR) Beh bong i ê lâng, Tio̍h ēng thih-khì kap chhiuⁿ-pìⁿ, Tī i ê só͘-chāi beh hō͘ hé it-chīn sio-khì.

(BCL) 欲摸伊的人著用鐵器及槍柄，佇伊的所在欲互火一盡燒去。

8

(THR) Tāi-pı̍t ióng-sū ê miâ kì tī ē-tóe; kun-tiúⁿ ê thâu, Tha-kek-bûn lâng Iok-siat-pa-siat; chiū-sī I-su-nî lâng A-tí-lô, chı̍t-sî phah-sí poeh-pah lâng.

(BCL) 大衛勇士的名記佇下底：軍長的頭，他革捫人約設巴設，就是伊斯尼人亞底羅，一時拍死八百人。

9

(THR) Koh chı̍t-ê sī A-ha̍p lâng Tó-to ê kiáⁿ Í-lī-a-sat; chêng Hui-lī-sū lâng chū-chı̍p beh kau-chiàn, Í-sek-lia̍t lâng í-keng khì, ū saⁿ ê ióng-sū tè Tāi-pı̍t, tùi Hui-lī-sū lâng thó-chiàn; i sī in tiong-kan ê chı̍t-ê.

(BCL) 閣一個是亞合人朵多的子以利亞撒。前非利士人聚集欲交戰，以色列人已經去，有三個勇士隨大衛對非利士人討戰，伊是中間的一個。

10

(THR) I khí-lâi phah Hui-lī-sū lâng, kàu chhiú sng, chhiú kap kiàm saⁿ-liâm. Hit-jı̍t Iâ-hô-hoa tōa-tōa khah-iâⁿ, chèng peh-sìⁿ o̍at-tńg tī i ê āu-bīn, kò͘ chhiúⁿ-mı̍h nā-tiāⁿ.

(BCL) 伊起來拍非利士人，到手酸，手及劍相粘。彼日耶和華大大卡贏；眾百姓越轉佇伊的後面，顧搶物若定。

11

(THR) Koh chı̍t-ê sī Ha̍p-la̍h lâng A-ki ê kiáⁿ Sa-má; ū chı̍t-jı̍t Hui-lī-sū lâng chū-chı̍p chiâⁿ-tīn, tī chı̍t-khu âng-tāu ê hn̂g; peh-sìⁿ chiū tī Hui-lī-sū lâng ê bīn-chêng tô-cháu.

(BCL) 閣一個是哈拉人亞基的子沙瑪。有一日，非利士人聚集成陣，佇一區紅豆的園，百姓就佇非利士人的面前逃走。

12

(THR) I tòng-tiâu tī hit khu hn̂g, lâi pó-siú i, phah Hui-lī-sū lâng; Iâ-hô-hoa tōa-tōa khah-iâⁿ.

(BCL) 伊擋住佇彼區園，來保守伊，拍非利士人，耶和華大大卡贏。

13

(THR) Siu-koah ê sî, saⁿ-cha̍p ê siú-léng tiong ū saⁿ lâng lo̍h-khì kàu A-tō͘-lân tōng, kìⁿ Tāi-pı̍t. Hui-lī-sū lâng kun-peng chat-iâⁿ tī Lī-ho̍at-im ê soaⁿ-kok.

(BCL) 收割的時，三十個首領中有三人落去到亞杜蘭洞見大衛。非利士人的軍兵紮營佇利乏音的山谷。

14

(THR) Hit-sî Tāi-pı̍t tī soaⁿ-chē; Hui-lī-sū lâng hông-siú ê peng tī Pek-lī-hêng.

(BCL) 彼時大衛佇山寨，非利士人防守的兵佇伯利恆。

15

(THR) Tāi-pı̍t him-sōan kóng, Chī-chūi ōe ēng Pek-lī-hêng siâⁿ-mn̂g-piⁿ ê chíⁿ-chúi hō͘ góa lim?

(BCL) 大衛欣羨，講：「是誰會用伯利恆城門邊的井水互我飲？」

16

(THR) Chí(**Chit) saⁿ ê ióng-sū chiū chhiong-kè Hui-lī-sū lâng ê iâⁿ-pôaⁿ, tùi Pek-lī-hêng siâⁿ-mn̂g-piⁿ ê chíⁿ chhiūⁿ-chúi, kōaⁿ lâi hō͘ Tāi-pı̍t; chóng-sī i m̄-kam lim, chiū piàⁿ tī Iâ-hô-hoa ê bīn-chêng, kóng,

(BCL) 此三個勇士就衝過非利士人的營盤，對伯利恆城門邊的井汲水，涫來互大衛。總是伊呣甘飲，就傾佇耶和華的面前，

17

(THR) Iâ-hô-hoa ah, góa koat-tòan m̄-chòe án-ni; che kiám m̄-sī phe-miā khì ê lâng ê huih? Só͘-í i m̄-lim. Chí(**Chit) saⁿ ê tōa ióng-sū ū chòe chiah ê tāi-chì.

(BCL) 講：「耶和華啊，我決斷呣做按呢；此豈呣是拼命去的人的血。」所以伊呣飲。此三個大勇士有做諸個代誌。

18

(THR) Sé-ló͘-ngá ê kiáⁿ Iok-ap ê sió-tī A-pí-su sī chòe saⁿ ê ióng-sū ê thâu-lâng; i kia̍h i ê chhiuⁿ phah-sí saⁿ-pah lâng, chiū tī saⁿ ê ióng-sū tiong ū miâ.

(BCL) 洗魯雅的子、約押的小弟亞比篩是做三個勇士的頭人；伊抬伊的槍拍死三百人，就佇三個勇士中有名。

19

(THR) I kiám m̄-sī saⁿ ê ióng-sū tiong ê tē-it chun-kùi-ê mah? só͘-í chòe in ê thâu; chóng-sī put-kı̍p chêng saⁿ ê ióng-sū.

(BCL) 伊豈呣是三個勇士中的第一尊貴的嗎？所以做的頭，總是不及前三個勇士。

20

(THR) Koh ū Kah-siat lâng tōa ióng-sū Iâ-hô-iâ-tāi ê kiáⁿ Pí-ná-ngá; i ū kiâⁿ-chhut chōe-chōe tōa-sū; i thâi-sí Mô͘-ap lâng A-lī-i-le̍k nn̄g ê kiáⁿ; koh tī lo̍h-seh ê sî lo̍h khiⁿ-lāi, thâi-sí chı̍t chiah sai.

(BCL) 閣有甲設人大勇士耶何耶大的子比拿雅，伊有行出多多大事；伊死摩押人亞利伊勒二個子，閣佇落雪的時落坑內，死一隻獅，

21

(THR) Koh thâi-sí Ai-kı̍p chı̍t ê tōa-hàn lâng; Ai-kı̍p lâng chhiú--nih kia̍h chhiuⁿ, Pí-ná-ngá chí-ū kia̍h thûi lo̍h-khì i hia, chhiúⁿ Ai-kı̍p lâng chhiú--nih ê chhiuⁿ, ēng hit ki chhiuⁿ kā i chân--sí.

(BCL) 閣死埃及一個大漢人；埃及人手裡抬槍，比拿雅只有抬槌落去伊遐，搶埃及人手裡的槍，用彼支槍給伊　死。

22

(THR) Che sī Iâ-hô-iâ-tāi ê kiáⁿ Pí-ná-ngá só͘ kiâⁿ ê sū; chiū tī saⁿ ê ióng-sū tiong tit-tio̍h miâ.

(BCL) 這是耶何耶大的子比拿雅所行的事，就佇三個勇士中得著名。

23

(THR) I pí saⁿ-cha̍p ê ióng-sū khah chun-kùi; chóng-sī put-kı̍p chêng saⁿ ê ióng-sū. Tāi-pı̍t siat-lı̍p i chòe i ê sī-ōe-tiúⁿ.

(BCL) 伊比三十個勇士卡尊貴，總是不及前三個勇士。大衛設立伊做伊的侍衛長。

24

(THR) Saⁿ-cha̍p ê ióng-sū tiong ū Iok-ap ê sió-tī A-sat-hek; koh ū Pek-lī-hêng lâng Tó-to ê kiáⁿ Í-le̍k-hap-lân;

(BCL) 三十個勇士中有約押的小弟亞撒黑；閣有伯利恆人朵多的子伊勒哈難，

25

(THR) Hap-lu̍t lâng Sa-má, Hap-lu̍t lâng Í-lī-ka;

(BCL) 哈律人沙瑪，哈律人以利加，

26

(THR) Phaⁿ-le̍k-thê lâng Hi-lī-su, Thê-ko-a lâng Ek-kiat ê kiáⁿ Í-la̍h;

(BCL) 帕勒提人希利斯，提哥亞人益吉的子以拉，

27

(THR) A-ná-tu̍t lâng A-pí-í-siā, Hō͘-sa lâng Bí-pún-nái;

(BCL) 亞拿突人亞比以謝，戶沙人米本乃，

28

(THR) A-ha̍p lâng Sat-bûn, Nî-tô-hoat lâng Má-hap-lâi;

(BCL) 亞合人撒們，尼陀法人瑪哈萊，

29

(THR) Nî-tô-hoat lâng Pa-ná ê kiáⁿ Hi-lı̍p, Piān-ngá-bín cho̍k Ki-pí-a lâng Lī-pài ê kiáⁿ Í-thài;

(BCL) 尼陀法人巴拿的子希立，便雅憫族、基比亞人利拜的子以太；

30

(THR) Pí-la̍h-tùn lâng Pí-ná-ngá, Ka-sı̍t khoe lâng Hi-thài;

(BCL) 比拉頓人比拿雅，迦實溪人希太；

31

(THR) Pek-a-la̍h-pa lâng A-pí-a-pún, Pa-ló͘-bí lâng Ap-su-má-hut;

(BCL) 伯亞拉巴人亞比亞本，巴魯米人押斯瑪弗，

32

(THR) Sa-pún lâng Í-lī-ngá-hap-pa, Ngá-siān chiah ê kiáⁿ tiong ê Iok-ná-tan;

(BCL) 沙本人以利雅哈巴，雅善諸個子中的約拿單，

33

(THR) Hap-la̍h lâng Sa-má, Hap-la̍h lâng Sa-la̍h ê kiáⁿ A-hi-àm;

(BCL) 哈拉人沙瑪，哈拉人沙拉的子亞希暗，

34

(THR) Má-ka lâng A-hap-pài ê kiáⁿ Í-lī-hoat-lia̍t, Ki-lô lâng A-hi-to-hut ê kiáⁿ Í-liân;

(BCL) 瑪迦人亞哈拜的子以利法列，基羅人亞希多弗的子以連，

35

(THR) Ka-bı̍t lâng Hi-su-lâi, A-pa lâng Phàⁿ-lâi;

(BCL) 迦密人希斯萊，亞巴人帕萊，

36

(THR) Só-pa lâng Ná-tan ê kiáⁿ Í-kah, Ka-te̍k lâng Pa-nî;

(BCL) 瑣巴人拿單的子以甲，迦得人巴尼，

37

(THR) A-bûn lâng Sé-le̍k, Pí-lio̍k lâng Ná-hap-lâi, sī kā Sé-ló͘-ngá ê kiáⁿ Iok-ap kia̍h kun-khì ê;

(BCL) 亞捫人洗勒，比錄人拿哈萊（是給洗魯雅的子約押抬軍器的），

38

(THR) Í-thiap lâng Í-la̍h, Í-thiap lâng Ka-lı̍p;

(BCL) 以帖人以拉，以帖人迦立，

39

(THR) Hek lâng Ou-lī-à; kiōng saⁿ-cha̍p-chhit lâng.

(BCL) 赫人烏利亞，共三十七人。

Bible Color Mark

• 台語漢字羅馬本
• 巴克禮全羅