撒母耳記下 第 7 章

1

(THR) Tng ông tiàm tī chhù-lāi, Iâ-hô-hoa iā í-keng hō͘ i thoat-lī sì-ûi ê tùi-te̍k, tit-tio̍h an-chēng ê sî,

(BCL) 當王踮佇厝內，耶和華也已經互伊脫離四圍的對敵，得著安靜的時。

2

(THR) ông kā sian-ti Ná-tan kóng, Khòaⁿ ah, góa tiàm tī pek-hiuⁿ-chhâ ê chhù-lāi, chóng-sī Siōng-tè ê kūi tiàm tī tiùⁿ-lî-lāi.

(BCL) 王給先知拿單講：「看啊，我踮佇柏香柴的厝內，總是上帝的櫃踮佇帳簾內。」

3

(THR) Ná-tan tùi ông kóng, Kìⁿ-nā lí ê sim só͘-siūⁿ-ê, thang khì chòe; in-ūi Iâ-hô-hoa kap lí tī-teh.

(BCL) 拿單對王講：「見若你的心所想的通去做，因為耶和華及你佇。」

4

(THR) Hit-mî Iâ-hô-hoa ê ōe lîm-kàu Ná-tan kóng,

(BCL) 彼暝，耶和華的話臨到拿單講：

5

(THR) Lí khì kā Góa ê lô͘-po̍k Tāi-pı̍t kóng, Iâ-hô-hoa án-ni kóng, Lí beh khí chhù hō͘ Góa khiā-khí mah?

(BCL) 「你去給我的奴僕大衛講，耶和華按呢講：『你欲起厝互我徛起嗎？

6

(THR) Tùi Góa chhōa Í-sek-lia̍t lâng chhut Ai-kı̍p ê jı̍t kàu kin-á-jı̍t, Góa bē-bat tiàm tī chhù--nih, siông-siông kiâⁿ tī pò͘-pîⁿ kap hōe-bō͘.

(BCL) 對我導以色列人出埃及的日到今仔日，我未曾踮佇厝裡，常常行佇布棚及會幕。

7

(THR) Kìⁿ góa kap Í-sek-lia̍t lâng só͘ kiâⁿ-kàu ê só͘-chāi, kiám bat tùi Í-sek-lia̍t chı̍t chi-phài ê sū-su, chiū-sī Góa bēng-lēng chiàu-kò͘ Góa ê peh-sìⁿ Í-sek-lia̍t ê, kóng, Lín siáⁿ-sū bô kā Góa khí pek-hiuⁿ-chhâ ê chhù ah?

(BCL) 見我及以色列人所行到的所在，豈曾對以色列一支派的士師，就是我命令照顧我的百姓以色列的講：恁啥事無給我起柏香柴的厝啊？』

8

(THR) Taⁿ lí tio̍h kā Góa ê lô͘-po̍k Tāi-pı̍t kóng, Bān-kun ê Iâ-hô-hoa án-ni kóng, Góa tùi iûⁿ-tiâu-tiong, lí teh thàn iûⁿ-kûn, kéng lí, chòe Góa ê peh-sìⁿ Í-sek-lia̍t ê kun-ông.

(BCL) 「今，你著給我的奴僕大衛，講萬軍的耶和華按呢講：『我對羊　中，你趁羊群，揀你，做我的百姓以色列的君王。

9

(THR) Lí bô-lūn khì toh-lo̍h, Góa siông-siông kap lí tī-teh, tī lí ê bīn-chêng chián-tû lí it-chhè ê tùi-te̍k. Góa tek-khak hō͘ lí tit-tio̍h tōa-miâ, chhin-chhiūⁿ sè-chiūⁿ hiah ê úi-jîn ê tōa-miâ chı̍t-iūⁿ.

(BCL) 你無論去叨落，我常常及你佇，佇你的面前剪除你一切的對敵。我的確互你得著大名，親像世上許個偉人的大名一樣。

10

(THR) Góa beh ūi-tio̍h Góa ê peh-sìⁿ Í-sek-lia̍t tiāⁿ-tio̍h chı̍t ê só͘-chāi, chai-pôe in, hō͘ in tiàm tī ka-kī ê só͘-chāi, bô koh chhian-sóa, hiong-ok ê lūi bô chhin-chhiūⁿ chá-chêng kiáu-jiáu in,

(BCL) 我欲為著我的百姓以色列定著一個所在，栽培，互踮佇家己的所在，無閣遷徙；兇惡的類無親像早前攪擾，

11

(THR) iā bô chhin-chhiūⁿ tùi Góa bēng-lēng sū-su kóan-lí Góa ê peh-sìⁿ Í-sek-lia̍t ê jı̍t; Góa beh hō͘ lí thoat-lī it-chhè ê tùi-te̍k, tit-tio̍h an-chēng. Koh Iâ-hô-hoa kā lí kóng, Iâ-hô-hoa beh kā lí kiàn-lı̍p ke.

(BCL) 也無親像對我命令士師管理我的百姓以色列的日。我欲互你脫離一切的對敵，得著安靜，閣耶和華給你講，耶和華欲給你建立家。

12

(THR) Kàu lí ê jı̍t-chí í-keng móa, lí kap lí ê lia̍t-chó͘ saⁿ-kap khùn ê sî, Góa beh siat-lı̍p lí só͘ chhut ê hō͘-è lâi sòa-chiap lí, Góa iā beh kian-kò͘ i ê kok;

(BCL) 到你的日子已經滿、你及你的列祖相及睏的時，我欲設立你所出的後裔來續接你；我也欲堅固伊的國。

13

(THR) i beh ūi Góa ê miâ khí tiān; Góa beh kian-kò͘ i ê kok-ūi, tı̍t-kàu éng-óan.

(BCL) 伊欲為我的名起殿；我欲堅固伊的國位，直到永遠。

14

(THR) Góa beh chòe i ê pē, i beh chòe Góa ê kiáⁿ; i nā hōan-chōe, Góa beh ēng lâng ê kóaiⁿ, sè-kan lâng ê piⁿ, chek-tok i.

(BCL) 我欲做伊的父，伊欲做我的子；伊若犯罪，我欲用人的柺，世間人的鞭責督伊。

15

(THR) Chóng-sī Góa ê chû-ài bô beh lī-khui i, chhin-chhiūⁿ Góa hō͘ i lī-khui Sò-lô, chiū-sī Góa só͘ khì-sak tī lí ê bīn-chêng ê.

(BCL) 總是我的慈愛無欲離開伊，親像我互伊離開掃羅，就是我所棄拺佇你的面前的。

16

(THR) Lí ê ke kap lí ê kok, beh éng-óan kiàn-lı̍p tī lí ê bīn-chêng; lí ê kok-ūi iā beh kian-kò͘ kàu éng-óan.

(BCL) 你的家及你的國欲永遠建立佇你的面前。你的國位也欲堅固，到永遠。』」

17

(THR) Ná-tan chiu chiàu che it-chhè ê ōe, chiàu che it-chhè ê khé-sī, án-ni kā Tāi-pı̍t kóng.

(BCL) 拿單就照這一切的話，照這一切的啟示，按呢給大衛講。

18

(THR) Tāi-pı̍t ông chiū jı̍p--khì, chē tī Iâ-hô-hoa ê bīn-chêng, kóng, Chú Iâ-hô-hoa ah, góa sī chī-chūi, góa ê ke sǹg-chòe sím-mı̍h, Lí kèng-jiân chhōa góa kàu chit ê tōe-ūi ah?

(BCL) 大衛王就入去，坐佇耶和華的面前，講：「主耶和華啊，我是是誰？我的家算做甚麼？你竟然導我到此個地位啊？

19

(THR) Chú Iâ-hô-hoa ah, che Lí iáu khòaⁿ-chòe sió-khóa, Lí koh lūn-kàu Lí ê lô͘-po̍k ê ke kàu tī kú-tn̂g; Chú Iâ-hô-hoa ah, che sī jîn-kan ê lē.

(BCL) 主耶和華啊，這你猶看做小可，你閣論到你的奴僕的家到佇久長。主耶和華啊，這是人間的例？

20

(THR) Tāi-pı̍t iáu ū sím-mı̍h ōe thang tùi Lí kóng ah? Chú Iâ-hô-hoa ah, Lí chai Lí ê lô͘-po̍k.

(BCL) 大衛猶有甚麼話通對你講啊？主耶和華啊，你知你的奴僕。

21

(THR) Ūi-tio̍h Lí ê ōe, koh chiàu Lí ê sim, Lí kiâⁿ che it-chhè ê tōa-sū, hō͘ Lí ê lô͘-po̍k chai;

(BCL) 為著你的話，閣照你的心，你行這一切的大事，互你的奴僕知。

22

(THR) Iâ-hô-hoa Siōng-tè ah, Lí sī chì-tōa; chiàu góan ê hī-khang só͘ thiaⁿ-kìⁿ ê, bô chı̍t-ê ōe pí-tit Lí, Lí í-gōa bô ū Siōng-tè.

(BCL) 耶和華上帝啊，你是至大，照阮的耳孔所聽見的，無一個會比得你；你以外無有上帝。

23

(THR) Tōe-chiūⁿ ū sím-mı̍h kok chhin-chhiūⁿ Lí ê peh-sìⁿ Í-sek-lia̍t ah? chiū-sī Siōng-tè khì kiù-sio̍k i, kui tī ka-kī chòe peh-sìⁿ, hō͘ I ū miâ-siaⁿ, koh tī Lí ê peh-sìⁿ ê bīn-chêng, chiū-sī Lí tùi Ai-kı̍p, kap lia̍t-pang, í-kı̍p in hiah ê siōng-tè só͘ kiù-sio̍k chhut-lâi ê, ūi-tio̍h lín kiâⁿ tōa ê tāi-chì, ūi-tio̍h Lí ê tōe chòe thang kiaⁿ ê sū ah?

(BCL) 地上有甚麼國親像你的百姓以色列啊？就是上帝去救贖伊歸佇家己做百姓，互伊有名聲閣佇你的百姓的面前，就是你對埃及及列邦，以及許個上帝所救贖出來的，為著恁行大的代誌，為著你的地做通驚的事啊！

24

(THR) Lí bat ūi ka-kī kiàn-lı̍p Lí ê peh-sìⁿ Í-sek-lia̍t éng-óan chòe Lí ê peh-sìⁿ; Iâ-hô-hoa ah, Lí iā chòe in ê Siōng-tè.

(BCL) 你曾為家己建立你的百姓以色列，永遠做你的百姓；耶和華啊，你也做的上帝。

25

(THR) Iâ-hô-hoa Siōng-tè ah, taⁿ Lí só͘ lūn-kàu Lí ê lô͘-po̍k, kap Lí ê lô͘-po̍k ê ke, gōan Lí éng-óan kian-kò͘ i, chiàu Lí só͘-kóng-ê lâi kiâⁿ.

(BCL) 「耶和華上帝啊，今你所論到你的奴僕及你的奴僕的家，願你永遠堅固伊，照你所講的來行。

26

(THR) Gōan lâng éng-éng chun Lí ê miâ chòe-tōa, kóng, Bān-kun ê Iâ-hô-hoa sī kóan-lí Í-sek-lia̍t ê Siōng-tè; koh Lí ê lô͘-po̍k Tāi-pı̍t ê ke beh tī Lí ê bīn-chêng kian-kò͘.

(BCL) 願人永永尊你的名做大，講：『萬軍的耶和華是管理以色列的上帝。』閣你的奴僕大衛的家欲佇你的面前堅固。

27

(THR) Bān-kun ê Iâ-hô-hoa, Í-sek-lia̍t ê Siōng-tè ah, in-ūi Lí khé-sī Lí ê lô͘-po̍k, kóng, Góa beh kā lí kiàn-lı̍p ke, só͘-í Lí ê lô͘-po̍k hó-táⁿ ēng chit ê kî-tó lâi tùi Lí kî-tó.

(BCL) 萬軍的耶和華──以色列的上帝啊，因為你啟示你的奴僕講：『我欲給你建立家』，所以你的奴僕好膽用此個祈禱來對你祈禱。

28

(THR) Taⁿ Chú Iâ-hô-hoa ah, Lí sī Siōng-tè ah, Lí ê ōe sī chin-sı̍t, Lí iā ēng chit ê hok-khì èng-ún Lí ê lô͘-po̍k;

(BCL) 「今主耶和華啊，你是上帝啊，你的話是真實；你也用此個福氣應允你的奴僕。

29

(THR) taⁿ kiû Lí sù-hok Lí ê lô͘-po̍k ê ke, hō͘ i éng-óan tī Lí ê bīn-chêng; Chú Iâ-hô-hoa ah, in-ūi Lí ū kóng i, gōan Lí ê lô͘-po̍k ê ke tùi Lí ê sù-ho̍k lâi tit-tio̍h hok-khì, kàu éng-óan.

(BCL) 今求你賜福你的奴僕的家，互伊永遠佇你的面前。主耶和華啊，因為你有講伊，願你的奴僕的家對你的賜福來得著福氣到永遠！」

Bible Color Mark

• 台語漢字羅馬本
• 巴克禮全羅