使徒行傳 第 16 章

1

(THR) Pó-lô kàu Te̍k-pì, koh kàu Lō͘-sū-tek: tú-tn̄g tī hia ū chı̍t ê ha̍k-seng miâ Thê-mô͘-thài, i ê lāu-bú sī Iû-thài sìn ê hū-jîn-lâng; i ê lāu-pē sī Hi-lī-nî lâng.

(BCL) 保羅到特庇，閣到路司得。抵當佇遐有一個學生，名提摩太，伊的老母是猶太信的婦仁人，伊的老父是希利尼人。

2

(THR) I hō͘ Lō͘-sū-tek Í-ko-liām chiah ê hiaⁿ-tī só͘ o-ló.

(BCL) 伊互路司得、以哥念諸個兄弟所謳咾。

3

(THR) Pó-lô ài chit lâng kap i khì; ūi-tio̍h hiah ê só͘-chāi ê Iû-thài lâng, chiū kā i kiâⁿ kat-lé; in-ūi in lóng chai i ê lāu-pē sī Hi-lī-nî lâng.

(BCL) 保羅愛此人及伊去，為著許個所在的猶太人，就給伊行割禮，因為攏知伊的老父是希利尼人。

4

(THR) In keng-kè chiah ê siâⁿ ê sî, chiong Iâ-lō͘-sat-léng sù-tô͘, tiúⁿ-ló só͘ tiāⁿ-tio̍h ê bēng-lēng thôan hō͘ in siú.

(BCL) 經過諸個城的時，將耶路撒冷使徒、長老所定著的命令傳互守。

5

(THR) Tùi án-ni chiah ê kàu-hōe sìn ná kian-kò͘, lâng-gia̍h jı̍t-jı̍t ke-thiⁿ.

(BCL) 對按呢諸個教會信愈堅固，人額日日加添。

6

(THR) In keng-kè Hut-lū-ka, Ka-lia̍p-thài ê tōe-hng, in-ūi Sèng Sîn bat kìm in thôan tō-lí tī A-se-a,

(BCL) 經過弗呂家、加拉太的地方，因為聖神曾禁傳道理佇亞西亞。

7

(THR) chiū kiâⁿ kàu Múi-se-a ê pian-kài, siūⁿ beh khì Pì-chhui-nî;

(BCL) 就行到每西亞的邊界，想欲去庇推尼，耶穌的神呣准。

8

(THR) Iâ-so͘ ê Sîn m̄ chún; chiū tùi Múi-se-a keng-kè, lo̍h kàu Te̍k-lô-a.

(BCL) 就對每西亞經過，落到特羅亞。

9

(THR) Pó-lô mî-sî khòaⁿ-kìⁿ īⁿ-siōng; ū chı̍t ê Má-kî-tùn lâng khiā-teh kiû i kóng, Chhiáⁿ kè-lâi Má-kî-tùn pang-chān góan.

(BCL) 保羅暝時看見異象。有一個馬其頓人徛求伊講：「請過來馬其頓幫助阮。」

10

(THR) Pó-lô í-keng khòaⁿ-kìⁿ īⁿ-siōng, góan chiah-ê liâm-piⁿ ì-ài beh khì Má-kî-tùn, lia̍h-chòe sī Siōng-tè tiàu góan thôan hok-im hō͘ in.

(BCL) 保羅已經看見異象，阮諸個連鞭意愛欲去馬其頓，掠做是上帝召阮傳福音互。

11

(THR) Só͘-í tùi Te̍k-lô-a tah chûn tı̍t-tı̍t kàu Sat-mô͘-te̍k-lat, keh jı̍t kàu Nî-a-pho-lī;

(BCL) 所以對特羅亞搭船，直直到撒摩特喇，隔日到尼亞坡里。

12

(THR) tùi hia kàu Hui-lı̍p-pí, chiū-sī Má-kî-tùn hit tè thâu chı̍t ê siâⁿ, iā sī Lô-má lâng hun-siat ê siâⁿ: góan tī chit ê siâⁿ tiàm kúi-nā jı̍t.

(BCL) 對遐到腓立比，就是馬其頓彼地頭一個城，也是羅馬人分設的城。阮佇此個城幾若日。

13

(THR) Tī an-hioh-jı̍t chhut siâⁿ-mn̂g gōa kàu hô-piⁿ, phah-sǹg tī hia ū kî-tó ê só͘-chāi; chiū chē-teh, kap só͘ chū-chı̍p ê hū-jîn-lâng tâm-lūn.

(BCL) 佇安息日，出城門外，到河邊，拍算佇遐有祈禱的所在，就坐及所聚集的婦仁人談論。

14

(THR) Ū chı̍t-ê bōe chí-sek pò͘ ê hū-jîn-lâng, miâ Lū-tí-a, lâi thiaⁿ, i sī Chhui-ngá-chhui-lat siâⁿ ê lâng, pêng-sò͘ kèng-pài Siōng-tè; Chú khui i ê sim, hō͘ i choan ǹg Pó-lô só͘ kóng ê ōe.

(BCL) 有一個賣紫色布的婦仁人，名呂底亞來聽，伊是推雅推喇城的人，平素敬拜上帝。主開伊的心，互伊專向保羅所講的話。

15

(THR) I kap i ê ke í-keng siū sóe-lé, chiū kiû góan, kóng, Nā lia̍h góa chòe chin-sı̍t sìn Chú ê lâng, chhiáⁿ kàu góa ê ke tòa. Chiū kiông-kiông lâu góan.

(BCL) 伊及伊的家已經受洗禮，就求阮講：「若掠我做真實信主的人，請到我的家住」；就強強留阮。

16

(THR) Āu-lâi góan khì kî-tó ê só͘-chāi, ū chı̍t ê lú-pī tú-tio̍h góan, i hō͘ pok-kòa ê sîn chiūⁿ sin; pêng-sò͘ ēng pok-kòa hō͘ hiah ê chú-lâng tōa thàn chîⁿ.

(BCL) 後來，阮去祈禱的所在。有一個女婢抵著阮，伊互卜卦的神上身，平素用卜卦互許個主人大趁錢。

17

(THR) I tè Pó-lô kap góan, kiò kóng, Chiah ê lâng chiū-sī chì-kôaiⁿ Siōng-tè ê lô͘-po̍k, ēng chín-kiù ê lō͘ thôan hō͘ lín.

(BCL) 伊隨保羅及阮，叫講：「諸個人就是至高上帝的奴僕，用拯救的路傳互恁。」

18

(THR) I chōe-chōe jı̍t án-ni kiâⁿ. Pó-lô chin iàm-hūn, o̍at-tńg-sin kā hit ê sîn kóng, Góa thok Iâ-so͘ Ki-tok ê miâ bēng-lēng lí tùi i chhut-khì. Sîn chek-sî chhut-khì.

(BCL) 伊多多日按呢行，保羅真厭恨，越轉身給彼個神講：「我託耶穌基督的名，命令你對伊出去！」神即時出去。

19

(THR) I hiah ê chú-lâng khòaⁿ-kìⁿ thàn chîⁿ ê ǹg-bāng í-keng sit-lo̍h, chiū lia̍h Pó-lô, Se-lah, thoa in jı̍p koe-chhī, khì kìⁿ iú-si-koaⁿ, koh ké-sàng kàu chiūⁿ-si-koaⁿ kóng,

(BCL) 伊許個主人看見趁錢的向望已經失落，就掠保羅、西拉，拖入街市去見有司官；閣解送到上司官講：

20

(THR) Chiah ê lâng sī Iû-thài lâng, tōa kiáu-jiáu lán ê siâⁿ,

(BCL) 「諸個人是猶太人，大攪擾咱的城，

21

(THR) thôan lán Lô-má lâng só͘ m̄ eng-kai siú, m̄ eng-kai kiâⁿ ê kui-lē.

(BCL) 傳咱羅馬人所呣應該守呣應該行的規例。」

22

(THR) Chèng lâng kui-kûn khí-lâi kong-kek in; chiūⁿ-si-koaⁿ pak in ê saⁿ, bēng-lēng ēng kùn phah in.

(BCL) 眾人歸群起來攻擊。上司官剝的衫，命令用棍拍；

23

(THR) Phah chin chōe ē, chiū koaiⁿ in lo̍h kaⁿ, hoan-hù kò͘-kaⁿ ê giâm-kín kò͘-siú;

(BCL) 拍真多下，就關落監，吩咐顧監的嚴謹顧守。

24

(THR) kò͘-kaⁿ ê siū chit hō bēng-lēng, chiū koaiⁿ in lo̍h lāi-têng kaⁿ, kông in ê kha tī chhâ-kông nı̍h.

(BCL) 顧監的受此號命令，就關落內庭監，楗的腳佇柴楗裡。

25

(THR) Nā-sī pòaⁿ-mî Pó-lô, Se-lah kî-tó gîm si, o-ló Siōng-tè;

(BCL) 若是半暝，保羅、西拉祈禱，吟詩謳咾上帝，關佇監裡的人也注意聽。

26

(THR) koaiⁿ tī kaⁿ-nı̍h ê lâng iā chù-ì teh thiaⁿ; hut-jiân tōe tōa tāng, tì-kàu kaⁿ ê tōe-ki lóng iô-tāng; chiah ê mn̂g iā liâm-piⁿ lóng khui; chèng lâng ê hêng-kū it-chīn lak.

(BCL) 忽然，地大動，致到監的地基攏搖動，諸個門也連鞭攏開，眾人的刑具一盡落。

27

(THR) Kò͘-kaⁿ ê lâng chhíⁿ, khòaⁿ-kìⁿ kaⁿ-mn̂g khui, phah-sǹg kaⁿ-siû lóng í-keng tô-cháu, chiū pu̍ih to, beh ka-kī thâi.

(BCL) 顧監的人醒，看見監門開，拍算監囚攏已經逃走，就拔刀欲家己。

28

(THR) Nā-sī Pó-lô tōa siaⁿ kiò, kóng, Bo̍h-tit ka-kī siong-hāi; góan lóng tī chia.

(BCL) 若是保羅大聲叫講：「莫得家己傷害！阮攏佇遮。」

29

(THR) Kò͘-kaⁿ ê lâng kiò lâng kia̍h hé lâi, thiàu jı̍p khì, ngia̍uh-ngia̍uh-chhoah phak tī Pó-lô, Se-lah ê bīn-chêng, chhōa in chhut-lâi, kóng,

(BCL) 顧監的人叫人抬火來，跳入去，愕愕惙仆佇保羅、西拉的面前；

30

(THR) Sian-siⁿ ah, góa tio̍h cháiⁿ-iūⁿ chòe, chiah ōe tit-tio̍h kiù?

(BCL) 導出來，講：「先生啊，我著怎樣做才會得著救？」

31

(THR) Ìn kóng, Tio̍h sìn Chú Iâ-so͘, lí chiū tit-tio̍h kiù, í-kı̍p lí ê ke.

(BCL) 應講：「著信主耶穌，你就得著救以及你的家。」

32

(THR) Chiū ēng Chú ê tō-lí kóng hō͘ i kap i ke-lāi lóng-chóng ê lâng thiaⁿ.

(BCL) 就用主的道理講互伊及伊家內攏總的人聽。

33

(THR) Tī hit mî hit sî, kò͘-kaⁿ ê lâng chhōa in khì sóe in ê siong; i kap chôan-ke ê lâng chek-sî lóng siū sóe-lé.

(BCL) 佇彼暝，彼時，顧監的人導去，洗的傷；伊及全家的人即時攏受洗禮。

34

(THR) Chhōa in chiūⁿ i ê chhù, pī-pān hō͘ in chia̍h; í-keng sìn Siōng-tè, chiū kap thong-ke tōa hoaⁿ-hí.

(BCL) 導上伊的厝，備辦互食。已經信上帝，就及通家大歡喜。

35

(THR) Kàu thiⁿ kng, chiūⁿ-si-koaⁿ chhe gê-ia̍h lâi, kóng, Pàng hiah ê lâng.

(BCL) 到天光，上司官差衙役來，講：「放許個人。」

36

(THR) Kò͘-kaⁿ ê chiong chiah ê ōe kā Pó-lô kóng, Chiūⁿ-si-koaⁿ chhe lâng lâi beh pàng lín; taⁿ thang chhut-lâi, an-jiân khì.

(BCL) 顧監的將諸個話給保羅講：「上司官差人來欲放恁，今通出來，安然去。」

37

(THR) Nā-sī Pó-lô kā hiah ê lâng kóng, Góan sī Lô-má lâng, bē sím-mn̄g, chiū kong-hêng phah góan, koh koaiⁿ góan lo̍h kaⁿ; taⁿ beh àm-chīⁿ kóaⁿ góan chhut mah? tek-khak bōe chòe tit, tio̍h in chhin-sin lâi chhōa góan chhut.

(BCL) 若是保羅給許個人講：「阮是羅馬人，未審問，就公刑拍阮，閣關阮落監，今欲暗靜趕阮出嗎？的確做得，著親身來導阮出！」

38

(THR) Gê-ia̍h chiong chiah ê ōe hê-hok chiūⁿ-si-koaⁿ; chiūⁿ-si-koaⁿ thiaⁿ-kìⁿ in sī Lô-má lâng, chiū kiaⁿ.

(BCL) 衙役將諸個話回覆上司官。上司官聽見是羅馬人，就驚，

39

(THR) Chiah lâi khó͘-khǹg in; chhōa in chhut, chhiáⁿ in lī-khui hit ê siâⁿ.

(BCL) 才來苦勸，導出，請離開彼個城。

40

(THR) In chhut kaⁿ, jı̍p Lū-tí-a ê chhù; í-keng kìⁿ-tio̍h chiah ê hiaⁿ-tī, chiū khó͘-khǹg in, chiah lī-khui hia.

(BCL) 出監，入呂底亞的厝，已經見著諸個兄弟，就苦勸，才離開遐。

Bible Color Mark

• 台語漢字羅馬本
• 巴克禮全羅