使徒行傳 第 18 章

1

(THR) Chit tia̍p liáu-āu, Pó-lô lī-khui Ngá-tián, kàu Ko-lîm-to.

(BCL) 此霎了後，保羅離開雅典，到哥林多。

2

(THR) Tú-tio̍h chı̍t ê Iû-thài lâng, miâ A-ku-lah, chhut-sì tī Pún-to͘, kap i ê bó͘ Pek-ki-lah, tú-á tùi Ì-tāi-lī lâi, in-ūi Kek-ló-tiu bēng-lēng Iû-thài lâng lóng lī-khui Lô-má; Pó-lô chiū chiū-kūn in;

(BCL) 抵著一個猶太人，名亞居拉，出世佇本都；及伊的某百基拉，抵仔對意大利來，因為克勞丟命令猶太人攏離開羅馬。保羅就就近。

3

(THR) in-ūi in tâng kang-gē, chiū kap in saⁿ-kap tiàm, ha̍p teh chòe; in ê kang-gē chiū-sī chòe pò͘-pîⁿ.

(BCL) 因為同工藝，就及相及合做。的工藝就是做布棚。

4

(THR) Ta̍k ê an-hioh-jı̍t Pó-lô tī hōe-tn̂g piān-lūn, khó͘-khǹg Iû-thài lâng kap Hi-lī-nî lâng.

(BCL) 逐個安息日，保羅佇會堂辯論，苦勸猶太人及希利尼人。

5

(THR) Se-lah, Thê-mô͘-thài tùi Má-kî-tùn lo̍h-lâi ê sî, Pó-lô chiū ūi-tio̍h tō-lí put-chí pek-chhiat, tùi Iû-thài lâng kan-chèng Iâ-so͘ sī Ki-tok.

(BCL) 西拉、提摩太對馬其頓落來的時，保羅就為著道理不止迫切，對猶太人干證耶穌是基督。

6

(THR) In tùi-te̍k i lâi pòng-to̍k ê sî, Pó-lô chiū pōaⁿ saⁿ, tùi in kóng, Lín ê huih kui tī lín, bô góa ê koan-hē; taⁿ liáu-āu góa beh chiū-kūn gōa-pang lâng lah.

(BCL) 對敵伊來謗瀆的時，保羅就拂衫，對講：「恁的血歸佇恁，無我的關係。今了後，我欲就近外邦人啦。」

7

(THR) Chiū lī-khui khì, jı̍p chı̍t lâng ê chhù, hit lâng miâ Thê-to Iû-sū-to͘, sī kèng-pài Siōng-tè ê lâng, i ê chhù tī hōe-tn̂g ê keh-piah.

(BCL) 就離開去，入一人的厝；彼人名提多猶士都，是敬拜上帝的人，伊的厝佇會堂的隔壁。

8

(THR) Kóan hōe-tn̂g ê lâng, miâ Kek-lí-sū-pò͘, kap chôan ke sìn Chú; Ko-lîm-to lâng ia̍h chōe-chōe thiaⁿ-kìⁿ, sìn lâi siū sóe-lé.

(BCL) 管會堂的人名革利司布及全家信主，哥林多人亦多多聽見，信來受洗禮。

9

(THR) Mî-sî Chú tī īⁿ-siōng tiong tùi Pó-lô kóng, Bo̍h-tit kiaⁿ, tio̍h kóng, m̄-thang chēng-chēng;

(BCL) 暝時，主佇異象中對保羅講：「莫得驚，著講，呣通靜靜，

10

(THR) in-ūi góa kap lí tī-teh, bô lâng beh kong-kek lâi hāi lí; in-ūi góa ū chōe-chōe peh-sìⁿ tī chit ê siâⁿ.

(BCL) 因為我及你佇，無人欲攻擊來害你，因為我有多多百姓佇此個城。」

11

(THR) Pó-lô tòa hia chı̍t nî koh la̍k ge̍h jı̍t; tī in tiong-kan chiong Siōng-tè ê tō-lí lâi kà-sī lâng.

(BCL) 保羅住遐一年閣六月日，佇中間將上帝的道理來教示人。

12

(THR) Ka-liû chòe A-kai-a chóng-tok ê sî, Iû-thài lâng tâng-sim kong-kek Pó-lô, thoa i kàu kong-chō chêng, kóng,

(BCL) 迦流做亞該亞總督的時，猶太人同心攻擊保羅，拖伊到公座前，

13

(THR) Chit ê lâng khǹg lâng pài Siōng-tè bô chiàu lu̍t-hoat.

(BCL) 講：「此個人勸人拜上帝無照律法。」

14

(THR) Pó-lô tú-tú beh khui chhùi, Ka-liû kā Iû-thài lâng kóng, Iû-thài lâng ah, siat-sú sī sím-mı̍h put-gī kan-ok ê sū, chiàu lí góa tio̍h iông-ún lín;

(BCL) 保羅抵抵欲開嘴，迦流給猶太人講：「猶太人啊！設使是甚麼不義奸惡的事，照理我著容允恁。

15

(THR) chóng-sī piān-lūn giân-gú, miâ-jī, kap lín ê lu̍t-hoat, lín khì ka-kī liāu-lí; góa m̄ ài sím-phòaⁿ chiah-ê.

(BCL) 總是辯論言語、名字，及恁的律法，恁去家己料理！我呣愛審判諸個」；

16

(THR) Chiū kóaⁿ in lī-khui kong-chō chêng.

(BCL) 就趕離開公座前。

17

(THR) Chèng lâng lia̍h kóan hōe-tn̂g ê Só͘-thê-nî, tī kong-chō chêng phah i. Chiah ê tāi-chì Ka-liû lóng bô lia̍h chòe iàu-kín.

(BCL) 眾人掠管會堂的所提尼，佇公座前拍伊。諸個代誌迦流攏無掠做要緊。

18

(THR) Pó-lô iáu tiàm kúi-nā jı̍t, chiū lī-pia̍t chiah ê hiaⁿ-tī, tah chûn beh khì Sū-lī-a; Pek-ki-lah, A-ku-lah saⁿ-kap khì; tī Kian-kek-lí chián thâu-mn̂g; ū hē-gōan ê iân-kò͘.

(BCL) 保羅猶幾若日，就離別諸個兄弟，搭船欲去敘利亞；百基拉、亞居拉相及去。佇堅革哩剪頭毛，有下願的緣故。

19

(THR) In kàu Í-hut-só͘, Pó-lô chiū lâu in tòa hia; ka-kī jı̍p hōe-tn̂g, kap Iû-thài lâng piān-lūn.

(BCL) 到以弗所，保羅就留住遐，家己入會堂及猶太人辯論。

20

(THR) In chhiáⁿ i ke tòa kúi jı̍t;

(BCL) 請伊加住幾日，無允，

21

(THR) bô ún, chiū lī-pia̍t in, kóng, Siōng-tè nā chún, góa beh tò-tńg lâi chiū-kūn lín.

(BCL) 就離別，講：「上帝若准，我欲倒轉來就近恁」；就開船離開以弗所。

22

(THR) Chiū khui chûn lī-khui Í-hut-só͘. Kàu Kai-sat-lī-a, chiū chiūⁿ-khì chhéng-an kàu-hōe, chiah lo̍h-khì An-thê-o.

(BCL) 到該撒利亞，就上去請安教會，才落去安提阿。

23

(THR) Tòa hia kúi jı̍t, koh khí-sin, chiàu chhù-sū keng-kè Ka-lia̍p-thài, Hut-lū-ka ê tōe-hng, kian-kò͘ chèng ha̍k-seng.

(BCL) 住遐幾日，閣起身，照次序經過加拉太、弗呂家的地方，堅固眾學生。

24

(THR) Ū chı̍t ê Iû-thài lâng, miâ A-pho-lô kàu Í-hut-só͘, i chhut-sì tī A-le̍k-san-thài, sī ū ha̍k-būn, tī sèng-keng ia̍h put-chí ōe.

(BCL) 有一個猶太人，名亞波羅，到以弗所。伊出世佇亞歷山大，是有學問，佇聖經亦不止會。

25

(THR) I bat ha̍k-sı̍p Chú ê lō͘; jia̍t-sim chiong Iâ-so͘ ê sū siông-sè kóng lâi kà-sī lâng, chí-ū chai Iok-hān ê sóe-lé nā-tiāⁿ.

(BCL) 伊曾學習主的路，熱心將耶穌的事詳細講來教示人；只有知約翰的洗禮若定。

26

(THR) I tī hōe-tn̂g hó-táⁿ lâi kóng, Pek-ki-lah A-ku-lah thiaⁿ-kìⁿ, chiū chhōa i lâi, tùi i pâi-lia̍t Siōng-tè ê lō͘ khah siông-sè.

(BCL) 伊佇會堂好膽來講；百基拉、亞居拉聽見，就導伊來，對伊排列上帝的路卡詳細。

27

(THR) A-pho-lô ài khì A-kai-a ê sî, hiaⁿ-tī khòan-bián i, koh kià phoe chhiáⁿ ha̍k-seng chiap-la̍p i; í-keng kàu, chiū tùi un-tián lâi tōa-tōa pang-chān hia ê sìn-tô͘:

(BCL) 亞波羅愛去亞該亞的時，兄弟勸勉伊，閣寄批請學生接納伊。伊已經到，就對恩典來大大幫助許個信徒，

28

(THR) in-ūi i tī chèng lâng ê bīn-chêng chhut-la̍t piān-tó Iû-thài lâng, ín sèng-keng chí-bêng Iâ-so͘ sī Ki-tok.

(BCL) 因為伊佇眾人的面前出力辯倒猶太人，引聖經指明耶穌是基督。

Bible Color Mark

• 台語漢字羅馬本
• 巴克禮全羅